Dua Tesalonika 1:1-12
1 Surat tu ari Paul, Silvanus,* enggau Timoti. Surat tu ditujuka ngagai raban gempuru* ba Tesalonika ke beserakup enggau Petara ti Apai kitai, sereta enggau Tuan Jesus Kristus:
2 Ngarapka semua kita bulih pemanah ati ti besai sereta pengelantang ari Petara ti Apai kitai, enggau ari Tuan Jesus Kristus.
3 Bala menyadi, kami seruran patut beterima kasih ngagai Petara ke bala kita. Kami sigi patut ngereja nya, laban pengarap ke diayanka kita majak mansang nyadi amat tegap, lalu tiap iku kita majak rinduka pangan diri.
4 Nya alai, kami temegah ati bejaku pasal kita ngagai raban gempuru Petara, ketegal kita mengkang betan sereta mengkang arap lebuh napi semua macham pemerinsa enggau penusah.*
5 Semua tu nunjukka Petara ngakim enggau lurus, lalu nya ngasuh kita dikumbai layak nerima Perintah Petara. Ketegal nya meh kita merinsa.
6 Ketegal Petara endang lurus, Iya deka ngenataika pemerinsa kena malas orang ke merinsaka kita.
7 Tang kita ke napi pemerinsa deka bulih pengelantang sama enggau kami, lebuh Tuan Jesus enggau bala melikat iya ti bekuasa dipandangka ari serega
8 dalam api ti mau. Iya deka ngukum sida ke enda ngelala Petara sereta sida ke enda ngasika Berita Manah pasal Tuan kitai, Jesus.
9 Sida deka diakim lalu diukum. Sida deka dipunaska belama iya, lalu sida enda diperening Tuan agi sereta enda ulih meda kuasa iya ti bemulia.
10 Nya deka nyadi maya iya datai, ngambika dimuliaka enggau bala nembiak iya ti kudus. Maya nya mega, iya deka ditinggika semua orang ke arapka iya. Bala sida nya mega nyengkaum kita, laban kita arapka saksi ke diberi kami.
11 Nya meh kebuah kami seruran besampi ke kita, ngambika Petara ngumbai kita layak dikangau Iya. Ngarapka nengah kuasa Iya, Iya ngereja enggau pengabis iya, semua utai manah ke ngelantangka ati Iya sereta semua pengawa ke digaga kita ketegal kita arap.
12 Enggau nya nama Tuan kitai, Jesus, deka dimuliaka nengah kita, lalu kita mega deka dimuliaka ketegal kita beserakup enggau iya. Nya sejalai enggau pemanah ati ti besai ari Petara kitai sereta ari Tuan Jesus Kristus.
