Adat Lewi 1:1-17
-
Pemeri tunu (1-17)
1 Jehovah ngangauka Moses lalu bejaku enggau iya ari langkau gempuru. Ku Iya:
2 “Padah ngagai orang Israel: ‘Enti siku ari bala kita deka nyerahka jelu tupi nyadika pemeri ngagai Aku, Jehovah, iya patut nyerahka sapi, bedus, tauka kambin.
3 “‘Enti iya nyerahka siku sapi nyadika pemeri tunu, iya patut nyerahka sapi ti lelaki ke nadai penimpang. Iya patut nyerahka sapi nya ngagai Aku, Jehovah, ba pintu penama langkau gempuru. Lalu iya patut ngereja nya enggau ati ti deka.
4 Iya patut ngengkahka jari iya ba atas pala sapi ke diserahka iya nya. Enggau chara nya, Aku deka nerima pemeri iya lalu ngampunka dosa iya.
5 “‘Sapi ti biak nya mesti disayat ba depan Aku, Jehovah. Udah nya, bala anak lelaki Aron, ke nyadi imam, deka nyerahka darah sapi nya lalu mechikka darah nya ba empat iti tisi alta.* Alta nya ba pintu penama langkau gempuru.
6 Kulit sapi nya patut dibuai, lalu sapi nya patut ditetak nyadi beberapa iti begian.
7 Bala anak lelaki Aron, ke nyadi imam, patut mai bara api ngagai alta nya lalu nugungka kayu ba atas api nya.
8 Sida mega patut nusun begian jelu ke udah ditetak nya sama enggau pala sereta lemak* iya ba atas kayu api ba alta nya.
9 Gelung perut enggau betis sapi nya patut dibasu ngena ai. Udah nya, imam deka nunu semua nya ba atas alta nyentukka asap niki ke atas. Bau ari pemeri tunu nya deka ngelantangka ati Aku, Jehovah.
10 “‘Enti iya nyerahka bedus tauka kambin nyadika pemeri tunu, iya patut nyerahka bedus tauka kambin ti lelaki ke nadai penimpang.
11 Jelu nya patut disayat ba depan Aku, Jehovah, iya nya muak ke utara alta. Udah nya, bala anak lelaki Aron, ke nyadi imam, deka mechikka darah jelu nya ba empat iti tisi alta nya.
12 Jelu nya patut ditetak nyadi beberapa iti begian. Udah nya, imam deka nusun begian jelu ke udah ditetak nya sama enggau pala sereta lemak* jelu nya ba atas kayu api ba alta nya.
13 Gelung perut enggau betis jelu nya patut dibasu ngena ai. Udah nya, imam deka nunu semua nya ba atas alta nyentukka asap niki ke atas. Bau ari pemeri tunu nya deka ngelantangka ati Aku, Jehovah.
14 “‘Tang enti iya deka nyerahka burung nyadika pemeri tunu ngagai Aku, Jehovah, iya patut nyerahka burung kukur tauka burung achang ti biak.
15 Imam patut mai burung nya ngagai alta lalu ngetil rekung iya. Darah burung nya deka ditejuka neritik ba tisi alta nya. Udah nya, imam deka nunu burung nya ba atas alta nyentukka asap niki ke atas.
16 Bulu burung nya patut dichabut, lalu kuman* iya patut dibuai. Bulu enggau kuman iya patut dibuai muak ke timur alta nya, iya nya endur alai muai amau.*
17 Burung nya patut dibelah ba entara dua iti sayap iya, tang enda tau dibelah sampai abis. Imam deka nunu burung nya ba atas alta nyentukka asap niki ke atas. Bau ari pemeri tunu nya deka ngelantangka ati Aku, Jehovah.
Nota Kaki
^ Peda Penerang Leka Jaku.
^ Tauka “lemak ke bisi ngelingi buah pinggang.”
^ Tauka “lemak ke bisi ngelingi buah pinggang.”
^ Kantung dalam rekung burung alai iya nyimpan pemakai.
^ Iya nya, amau ke bechampur enggau lemak jelu korban ke ditunu.
