Adat Lewi 10:1-20
10 Dua iku anak Aron, iya nya Nadap enggau Abihu, mai pekekas endur engkah bara api siti siku. Seduai iya ngengkahka bara api ba pekekas nya lalu ngengkahka menyan ba atas bara api nya. Udah nya, seduai iya nyerahka nya ngagai Jehovah. Tang Petara nadai ngasuh seduai iya nyerahka api nya. Nya alai, api ke diserahka seduai iya nya enda sah.
2 Tekala nya, Jehovah ngenataika api lalu nganguska seduai iya. Seduai iya pan mati ba depan Jehovah.
3 Udah nya, ku Moses bejaku ngagai Aron: “Tu utai ke dipadah Jehovah: ‘Semua orang ke datai semak ngagai Aku patut ingat, Aku tu kudus. Aku patut dimuliaka ba depan semua orang.’” Tang Aron enda bemunyi.
4 Udah nya, Moses ngangauka anak lelaki Uziel, iya nya Misael enggau Elsapan. Uziel nya aya Aron. Ku Moses bejaku enggau seduai iya: “Datai kitu. Bai bangkai anak petunggal seduai pansut ari laman endur ti kudus tu lalu bai bangkai seduai iya ngagai luar kem.”
5 Seduai iya pan datai lalu mai bangkai Nadap enggau Abihu, ke agi ngena gari imam, pansut ngagai luar kem nitihka utai ke diasuh Moses.
6 Udah nya, Moses bejaku enggau Aron sereta dua iku da agi anak lelaki Aron, iya nya Eleasar enggau Itamar. Ku Moses: “Anang ngelakka buk kita enda disugu tauka nyarikka gari kita ngambika kita enda mati, lalu Petara enda ringat ngagai semua orang Israel. Tang orang Israel ke bukai ke deka nyabakka pemati seduai iya ke udah dibunuh Jehovah ngena api.
7 Kita enda tau jauh ari pintu penama langkau gempuru ngambika kita enda mati laban Jehovah udah nata kita ngena minyak.” Sida pan ngereja semua utai ke diasuh Moses.
8 Ku Jehovah bejaku enggau Aron:
9 “Nuan enggau bala anak lelaki nuan enda tau ngirup wain tauka ai ti bisa sebedau tama ngagai langkau gempuru. Enti kita ngereja nya, kita deka mati. Adat tu patut seruran dititihka nuan enggau bala peturun nuan.
10 Enggau nya, kita ulih nemu bida entara utai ti kudus enggau utai ke enda diterima dalam sembah ngagai Aku, bida entara utai ti tuchi enggau enda tuchi,
11 sereta ulih ngajar orang Israel pasal semua atur ke udah diberi Aku, Jehovah, ngagai sida nengah Moses.”
12 Ku Moses bejaku enggau Aron enggau bala anak lelaki Aron ke agi idup, iya nya Eleasar enggau Itamar: “Ari pemeri bijirin ke udah ditunu lalu diserahka ngagai Jehovah, ambi laluh ke bedau ditunu lalu gaga iya nyadi roti ti enda beragi. Kita patut makai roti nya semak alta laban laluh ari pemeri bijirin nya utai ti pemadu kudus.
13 Kita patut makai nya ba endur ti kudus.* Ungkup nya udah diberi ngagai kita enggau bala anak lelaki kita, ke diambi ari pemeri ke udah ditunu lalu diserahka ngagai Jehovah. Nya meh pesan ke udah dipadah Petara ngagai aku.
14 Kita, bala anak lelaki kita, enggau bala anak indu kita tau makai dada jelu ari pemeri ke diayun enggau kaki jelu ke diungkupka nyadi begian ti kudus. Kita patut makai nya ba endur ti tuchi, laban nya ungkup ke udah diberi ngagai kita enggau bala anak lelaki kita ari pemeri bebaik ke diserahka orang Israel.
15 Orang Israel patut mai kaki jelu ke diungkupka nyadi begian ti kudus, dada jelu ari pemeri ke diayun, enggau lemak ari pemeri ke ditunu. Udah nya, sida deka nyerahka pemeri nya nyadika pemeri ke diayun ba depan Jehovah. Dada enggau kaki jelu nya deka seruran diempu kita enggau bala anak lelaki kita baka ke diasuh Jehovah.”
16 Moses lalu nanyaka pasal kambin ke udah disayat nyadika pemeri kena ngulihka pengampun dosa. Tang dagin nya udah ditunu abis. Nya alai, iya ringat ngagai dua iku anak lelaki Aron ke agi idup nya, iya nya Eleasar enggau Itamar. Ku iya:
17 “Nama kebuah seduai enda makai pemeri kena ngulihka pengampun dosa nya? Seduai patut makai nya ba laman endur ti kudus laban nya utai ti pemadu kudus. Petara udah meri nya ngagai seduai ngambika seduai ulih nanggung semua dosa orang Israel lalu minta pengampun dosa ke sida ba depan Jehovah.
18 Darah kambin nya bedau dibai tama ngagai endur ti kudus. Nya alai, seduai patut makai dagin nya ba laman endur ti kudus, baka ke udah dipadahka Petara ngagai aku.”
19 Ku Aron nyaut Moses: “Seharitu orang Israel udah nyerahka pemeri kena ngulihka pengampun dosa enggau pemeri tunu ba depan Jehovah. Tang aku enda ulih makai dagin ari pemeri nya. Nuan empu nemu utai ke udah ninggang aku seharitu. Enti aku makai pemeri kena ngulihka pengampun dosa nya, kati nya deka ngelantangka ati Jehovah?”
20 Pengudah Moses ninga saut iya, Moses pan setuju.
Nota Kaki
^ Engka ba laman endur ti kudus.
