Adat Lewi 11:1-47
-
Jelu ti tuchi enggau ti enda tuchi (1-47)
11 Udah nya, ku Jehovah bejaku enggau Moses seduai Aron:
2 “Padahka ngagai orang Israel: ‘Tu bansa jelu ke idup ba darat ti tau diempa kita:
3 Kita tau makai semua jelu ke bisi belah tunjing lalu tunjing iya belah abis sereta ke ngunyah pemakai sida dua kali.*
4 “‘Tang kita enda tau makai jelu ke semina ngunyah pemakai iya dua kali, tauka jelu ke semina bisi belah tunjing. Anang makai unta laban iya ngunyah pemakai iya dua kali, tang tunjing iya enda belah. Jelu nya enda tuchi ba mata Petara.
5 Anang makai jelu hiraks* laban iya ngunyah pemakai iya dua kali, tang tunjing iya enda belah. Jelu nya enda tuchi ba mata Petara.
6 Anang makai ribit laban iya ngunyah pemakai iya dua kali, tang tunjing iya enda belah. Jelu nya enda tuchi ba mata Petara.
7 Pia mega, anang makai babi laban iya bisi belah tunjing lalu tunjing iya belah abis, tang iya enda ngunyah pemakai iya dua kali. Jelu nya enda tuchi ba mata Petara.
8 Kita enda tau makai jelu nya tauka negu bangkai sida. Jelu nya enda tuchi ba mata Petara.
9 “‘Tu utai idup ba ai ti tau diempa kita: Kita tau makai utai idup ba tasik tauka ba sungai ke bisi sirip enggau tisik.
10 Tang semua utai idup ba tasik enggau ba sungai, nyengkaum utai idup ti mit,* ke nadai sirip tauka tisik, patut dikumbai haram.
11 Au, kita patut kejika semua utai nya. Kita enda tau makai dagin sida, lalu kita patut kejika bangkai sida.
12 Kita patut kejika semua utai idup ba ai ke nadai sirip enggau tisik.
13 “‘Tu bansa utai idup ti besayap ke dikumbai haram, lalu kita enda tau makai sida: Menaul, menaul ke makai ikan, menaul ke makai bangkai,
14 menaul mirah enggau semua bansa menaul chelum,
15 semua bansa burung gagak,
16 burung unta, burung antu, burung camar, semua bansa burung falkon,
17 burung antu ti mit, burung antu ti panjai pending, burung dendang ai,
18 burung swan, burung undan, burung hering,
19 bangau, semua bansa burung heron, burung hudhud, enggau kelawar.
20 Kita patut kejika semua bansa indu utai ti besayap* ke ngerayap.
21 “‘Ari semua indu utai ti besayap ke ngerayap, kita semina tau makai indu utai ke bisi sepasang kaki ti panjai kena engkechit ba tanah.
22 Kita tau makai semua macham bansa buntak enggau cengkerik.
23 Tang kita patut kejika semua indu utai ke bukai ti besayap sereta ngerayap.
24 Enti kita makai indu utai nya, kita deka nyadi enda tuchi. Barang sapa ke negu bangkai indu utai nya deka nyadi enda tuchi nyentukka mata panas padam.
25 Enti bangkai indu utai tekena ba gari siku ari kita, iya patut masu gari nya. Iya deka dikumbai enda tuchi nyentukka mata panas padam.
26 “‘Semua jelu ke bisi belah tunjing tang tunjing sida enda belah abis, lalu enda ngunyah pemakai sida dua kali, jelu nya enda tuchi ba mata Petara. Barang sapa ke negu jelu nya deka dikumbai enda tuchi.
27 Semua utai idup ti bekaki empat lalu bejalai ngena tapa kaki,* jelu nya dikumbai enda tuchi ba mata Petara. Barang sapa ke negu bangkai jelu nya deka nyadi enda tuchi nyentukka mata panas padam.
28 Enti siku ari kita mai bangkai jelu nya, iya patut masu gari iya. Iya deka dikumbai enda tuchi nyentukka mata panas padam. Semua jelu nya enda tuchi ba mata Petara.
29 “‘Tu bansa utai idup ti mit ke diau beraban, ke enda tuchi ba mata Petara: Tikus, tikus ke ngurik tanah, semua bansa tichak,
30 tichak biasa, tichak ke besai, tichak pasir, tichak ke nemu betukar warna, enggau salamander.
31 Semua utai tu enda tuchi ba mata Petara. Barang sapa ke negu bangkai jelu nya deka nyadi enda tuchi nyentukka mata panas padam.
32 “‘Enti bangkai jelu nya labuh ba sesiti utai, utai nya nyadi enda tuchi. Tu nyengkaum gari, kulit jelu, kain guni, tauka pekekas ke digaga ari kayu. Enda ngira nama utai nya, iya patut dibasu ngena ai. Utai nya deka dikumbai enda tuchi nyentukka mata panas padam. Udah nya, iya deka dikumbai tuchi baru.
33 Enti bangkai nya labuh ke dalam periuk tanah, periuk nya mesti dipechahka. Semua utai dalam periuk nya nyadi enda tuchi.
34 Nama-nama pemakai ke kena ai ari pekekas nya deka nyadi enda tuchi. Lalu nama-nama ai ke tau diirup ari pekekas nya mega nyadi enda tuchi.
35 Enda ngira dini alai bangkai jelu nya labuh, utai nya deka nyadi enda tuchi. Enti bangkai jelu nya labuh ba oven tauka ba penuduk periuk,* utai nya mesti dipechahka. Utai nya deka nyadi enda tuchi, lalu kita enda tau ngena utai nya agi.
36 Enti bangkai jelu nya labuh ke dalam mata ai tauka telaga, endur nya agi dikumbai tuchi. Tang orang ke negu bangkai jelu nya deka nyadi enda tuchi.
37 Enti bangkai jelu nya labuh ba leka benih ke deka ditanam, leka benih nya agi dikumbai tuchi.
38 Tang enti leka benih nya dipanjah enggau ai, lalu bangkai jelu nya labuh ba leka benih nya, leka benih nya nyadi enda tuchi.
39 “‘Enti jelu ke tau diempa kita mati, barang sapa ke negu bangkai jelu nya deka nyadi enda tuchi nyentukka mata panas padam.
40 Enti siku ari kita makai begian ari bangkai jelu nya tauka mindahka bangkai jelu nya, iya patut masu gari iya. Iya deka nyadi enda tuchi nyentukka mata panas padam.
41 Kita patut kejika semua utai idup ti mit ke diau beraban. Kita enda tau makai utai nya.
42 Kita enda tau makai jelu ke ngerayap ngena perut, jelu ke bejalai ngena empat iti kaki, tauka utai idup ti mit ke bisi mayuh kaki. Kita patut kejika semua utai tu.
43 Enti kita makai utai idup ti mit ke diau beraban, Aku deka kejika kita. Anang ngelakka utai nya ngasuh kita enda tuchi,
44 laban Aku tu Jehovah, Petara kita. Kita mesti tuchi sereta kudus, laban Aku kudus. Nya alai, kita enda tau makai utai idup ti mit ke diau beraban ngambika kita mengkang tuchi.
45 Aku tu Jehovah, ke mai kita pansut ari menua Ejip, kena nunjukka Aku tu Petara kita. Kita patut kudus, laban Aku kudus.
46 “‘Tu meh adat pasal jelu ke ba darat, utai idup ti besayap, utai idup ke diau ba dalam ai, sereta semua utai idup ti mit ke diau beraban.
47 Enggau nya, kita ulih nemu bida entara utai ti tuchi enggau utai ti enda tuchi ba mata Petara, sereta utai idup ke tau diempa enggau ke enda tau diempa.’”
Nota Kaki
^ Iya nya, ngunyah baru pemakai ke udah ditelan.
^ Sebengkah jelu ke baka gamal tikus belanda ti besai. Jelu tu nadai iku lalu diau ba endur ti bebatu.
^ Tu merujuk ngagai utai idup ti mit ke diau beraban.
^ Tauka “semua bansa utai idup ti mit ke besayap lalu diau beraban.”
^ Tu nyengkaum jelu baka singa, beruang, enggau serigala.
^ Iya nya, penuduk periuk kena ngangatka pemakai.
