Adat Lewi 12:1-8
-
Nuchi diri pengudah beranak (1-8)
12 Udah nya, ku Jehovah bejaku enggau Moses:
2 “Padah ngagai orang Israel: ‘Enti bisi indu ke ngandung lalu ngadaka anak lelaki, iya deka nyadi enda tuchi pengelama tujuh hari, sama baka iya ke nyadi enda tuchi maya iya datai kain.
3 Ba hari kelapan, anak iya mesti disunat.
4 Ketegal iya agi pansut darah pengudah beranak, iya patut nuchi diri pengelama 33 hari da agi sebedau iya ulih nyadi tuchi nitihka adat. Dalam timpuh nya, iya enda tau negu nama-nama utai ti kudus. Iya mega enda tau tama ngagai endur ti kudus.
5 “‘Enti indu nya ngadaka anak indu, iya deka nyadi enda tuchi pengelama 14 hari, sama baka iya ke nyadi enda tuchi maya iya datai kain. Ketegal iya agi pansut darah pengudah beranak, iya patut nuchi diri pengelama 66 hari da agi sebedau iya ulih nyadi tuchi nitihka adat.
6 Pengudah timpuh alai iya nuchi diri ketegal ngadaka anak lelaki tauka anak indu abis, iya patut mai siku bedus ti lelaki ke beumur setaun tauka kurang nyadika pemeri tunu. Iya mega patut mai siku burung achang ti biak tauka siku burung kukur nyadika pemeri kena ngulihka pengampun dosa. Iya patut meri semua nya ngagai imam, ba pintu penama langkau gempuru.
7 Imam nya deka nyerahka semua utai nya ngagai Jehovah, lalu deka minta pengampun dosa ke indu nya. Enggau nya, iya deka nyadi tuchi baru ba mata Petara, laban darah ke pansut pengudah iya beranak udah ngetu. Nya meh adat pasal indu ke ngadaka anak lelaki tauka anak indu.
8 Tang enti iya enda mampu nyerahka siku bedus, iya tau nyerahka dua iku burung kukur tauka dua iku burung achang ti biak. Siku nyadika pemeri tunu, lalu siku da agi nyadika pemeri kena ngulihka pengampun dosa. Imam deka minta pengampun dosa ke indu nya, lalu iya deka nyadi tuchi baru.’”
