Adat Lewi 13:1-59
13 Ku Jehovah bejaku enggau Moses seduai Aron:
2 “Enti kulit siku ari bala kita bisi kembai, kuris, tauka betumpuk, lalu tau ngujungka iya bisi penyakit kulit ti balat,* iya mesti betemu enggau imam, iya nya Aron tauka siku ari anak lelaki iya.
3 Imam patut meresa begian kulit ke bisi jangkitan nya. Enti bulu ba begian nya nyadi putih lalu begian nya tengelam dalam agi ari kulit ke ngelingi iya, nya penyakit kulit ti balat. Enti imam meda tanda nya, iya deka madahka orang nya enda tuchi.
4 Tang enti tumpuk ba kulit iya putih lalu tumpuk nya enda tengelam ba kulit, lalu bulu ba begian nya enda mega nyadi putih, imam deka ngasuh orang nya dikuarantin pengelama tujuh hari.
5 Ba hari ti ketujuh, imam patut meresa orang nya baru. Enti gamal jangkitan nya enda berubah lalu enda ngerampit ngagai begian kulit ke bukai, imam deka ngasuh orang nya dikuarantin baru pengelama tujuh hari da agi.
6 “Ba hari ti ketujuh, imam patut meresa orang nya baru. Enti jangkitan ba kulit nya udah belabuh gerai lalu enda ngerampit ngagai begian kulit ke bukai, imam deka madahka orang nya udah tuchi. Nya semina kuris aja. Udah nya, orang nya patut masu gari iya lalu dikumbai tuchi.
7 Tang pengudah imam madahka iya udah tuchi, lalu jangkitan nya pansut baru ba kulit iya lalu ngerampit ngagai begian kulit iya ke bukai, iya mesti betemu baru enggau imam.
8 Imam patut meresa baru jangkitan nya. Lalu enti jangkitan nya udah ngerampit ngagai begian kulit iya ke bukai, imam deka madahka orang nya enda tuchi. Nya penyakit kulit ti balat.
9 “Enti siku ari bala kita kena penyakit kulit ti balat, iya mesti dibai betemu enggau imam.
10 Imam patut meresa orang nya. Enti kulit iya bisi kembai, lalu begian nya bewarna putih ke ngujungka bulu ba begian nya nyadi putih, lalu bisi telih ba begian ke kembai nya,
11 nya penyakit kulit ti balat ke enda ulih gerai. Imam deka madahka orang nya enda tuchi. Orang nya enda ibuh dikuarantin ngambika diperesa baru laban iya endang enda tuchi.
12 Enti penyakit nya udah ngerampit semua tubuh orang nya, lalu imam meda penyakit nya udah ngerampit orang nya ari pala nyentukka kaki,
13 imam patut meresa orang nya baru. Enti imam meda penyakit nya udah ngerampit semua tubuh orang nya, imam deka madahka orang nya tuchi. Ketegal semua kulit orang nya udah nyadi putih, iya nyadi tuchi.*
14 Tang enti bisi telih ba kulit iya, iya enda tuchi.
15 Enti imam meda kulit iya bisi telih, imam deka madahka orang nya enda tuchi, laban telih nya utai ti enda tuchi. Nya penyakit kulit ti balat.
16 Tang enti telih nya gerai lalu nyadi putih, orang nya mesti betemu enggau imam.
17 Imam patut meresa iya baru. Enti telih nya udah nyadi putih, imam deka madahka orang nya tuchi.
18 “Enti siku ari bala kita bisi pisa ba kulit iya lalu pisa nya gerai,
19 tang udah nya abi pisa nya kembai lalu begian nya bewarna putih tauka betumpuk mirah putih, orang nya mesti betemu enggau imam.
20 Imam patut meresa begian kulit nya. Enti bulu ba begian nya nyadi putih lalu begian nya tengelam ba kulit, imam deka madahka orang nya enda tuchi. Nya penyakit kulit ti balat ketegal pisa nya.
21 Tang enti imam beratika begian nya udah belabuh gerai lalu begian nya enda tengelam, lalu bulu ba begian nya enda mega nyadi putih, imam deka ngasuh orang nya dikuarantin pengelama tujuh hari.
22 Lalu enti tumpuk nya udah ngerampit ngagai begian kulit iya ke bukai, imam deka madahka orang nya enda tuchi. Nya penyakit kulit ti balat.
23 Tang enti tumpuk nya enda berubah lalu enda ngerampit ngagai begian kulit ke bukai, imam deka madahka orang nya tuchi, laban nya semina kembai ketegal pisa nya.
24 “Enti bisi siku ari bala kita betu laban api, lalu begian ke betu nya bisi tumpuk ke bewarna mirah putih tauka putih,
25 imam patut meresa begian kulit nya. Enti bulu ba begian nya nyadi putih lalu begian nya tengelam ba kulit, nya penyakit kulit ti balat ketegal bekau betu nya. Imam deka madahka orang nya enda tuchi laban orang nya udah kena penyakit kulit ti balat.
26 Tang enti imam beratika begian nya udah belabuh gerai lalu begian nya enda tengelam, lalu bulu ba begian nya enda mega nyadi putih, imam deka ngasuh orang nya dikuarantin pengelama tujuh hari.
27 Ba hari ti ketujuh, imam patut meresa orang nya baru. Enti tumpuk nya udah ngerampit ngagai begian kulit iya ke bukai, imam deka madahka orang nya enda tuchi. Nya penyakit kulit ti balat.
28 Tang enti tumpuk nya enda berubah lalu enda ngerampit ngagai begian kulit ke bukai sereta udah belabuh gerai, imam deka madahka orang nya tuchi. Nya semina kembai ketegal bekau betu nya.
29 “Enti siku lelaki tauka siku indu bisi jangkitan ba pala tauka dagu iya,
30 imam patut meresa jangkitan nya. Enti begian jangkitan nya tengelam ba kulit lalu buk tauka ragum iya kuning sereta nipis, imam deka madahka orang nya enda tuchi laban kulit pala tauka ragum orang nya udah kena jangkitan. Nya penyakit kulit ti balat ba pala tauka dagu.
31 Tang enti imam beratika begian nya enda tengelam lalu nadai buk chelum tauka ragum chelum ke tumbuh ba begian nya, imam deka ngasuh orang nya dikuarantin pengelama tujuh hari.
32 Ba hari ti ketujuh, imam patut meresa orang nya baru. Enti begian ke kena jangkitan nya enda ngerampit ngagai begian kulit ke bukai lalu nadai buk tauka ragum ke bewarna kuning tumbuh ba begian nya, sereta kulit ke kena jangkitan nya enda tengelam,
33 orang nya mesti nyukur buk tauka ragum iya. Tang iya enda tau nyukur begian ke kena jangkitan nya. Udah nya, imam deka ngasuh orang nya dikuarantin baru pengelama tujuh hari.
34 “Ba hari ti ketujuh, imam patut meresa orang nya baru. Enti jangkitan ba kulit pala enggau ragum enda ngerampit ngagai begian kulit ke bukai sereta kulit ke kena jangkitan nya enda tengelam, imam deka madahka orang nya udah tuchi. Udah nya, orang nya patut masu gari iya lalu dikumbai tuchi.
35 Tang pengudah imam madahka iya udah tuchi, lalu jangkitan nya pansut baru ba kulit iya lalu ngerampit ngagai begian kulit iya ke bukai,
36 imam patut meresa baru jangkitan nya. Lalu enti jangkitan nya udah ngerampit ngagai begian kulit iya ke bukai, imam enda ibuh ngiga buk tauka ragum ke bewarna kuning ba begian jangkitan nya, laban orang nya endang enda tuchi.
37 Tang enti imam beratika jangkitan nya enda ngerampit ke bukai lalu bisi buk chelum tauka ragum chelum tumbuh ba endur ke dijangkit nya, nya reti iya jangkitan nya udah suman. Orang nya tuchi lalu imam deka madahka orang nya udah tuchi.
38 “Enti siku lelaki tauka siku indu bisi tumpuk ba kulit lalu tumpuk nya bewarna putih,
39 imam patut meresa tumpuk nya. Enti tumpuk nya bewarna putih pudar, tumpuk nya enda bahaya laban nya semina ruam aja. Orang nya tuchi.
40 “Enti siku lelaki gugur buk lalu nyadi botak, iya tuchi.
41 Enti iya gugur buk ba begian depan pala iya, lalu begian nya botak, iya tuchi.
42 Enti bisi telih ke bewarna mirah putih ba endur ke botak nya tauka ba depan pala orang nya, nya penyakit kulit ti balat ke bepun ari begian ke nadai buk nya.
43 Imam patut meresa telih ba pala orang nya. Enti telih ba endur ke botak nya kembai lalu bewarna mirah putih, sereta gamal telih nya baka gamal penyakit kulit ti balat,
44 imam deka madahka orang nya enda tuchi laban orang nya bisi penyakit kulit ti balat.
45 Enti sesiku orang kena penyakit kulit ti balat, iya patut ngena gari ti charik. Iya patut nejuka buk iya enda disugu sereta patut nutup mulut* iya ngena kain, lalu enggau nyawa ti inggar nyebut: ‘Enda tuchi! Enda tuchi!’
46 Seagi-agi iya bisi penyakit nya, iya mengkang dikumbai enda tuchi. Iya patut diau ba luar kem, jauh ari orang bukai laban iya enda tuchi.
47 “Enti bisi kuap* ba gari ke digaga ari bulu bedus tauka kain linin,
48 enda ngira sekalika nya ba ubung ke digaga ari linin tauka bulu bedus ke dikena nenun, kulit jelu, tauka nama-nama utai ke digaga ari kulit,
49 lalu kuap nya bewarna kuning ijau tauka mirah, nya reti iya gari, kain ke ditenun, kulit jelu, tauka nama-nama utai ke digaga ari kulit nya endang udah kena rampit kuap nya, lalu utai nya patut ditunjukka ngagai imam.
50 Imam patut meresa kuap nya. Iya patut nyimpan lalu nyeraraka utai ke bisi kuap nya pengelama tujuh hari.
51 Ba hari ti ketujuh, imam patut meresa utai nya baru. Enti kuap nya udah ngerampit ba gari, ba kain ke ditenun, tauka ba kulit jelu (enda ngira nama guna kulit nya), utai nya enda tuchi laban kuap ke bansa nya bahaya sereta nemu ngerampit.
52 Imam patut nunu gari nya, kain ke ditenun, tauka nama-nama utai ke digaga ari kulit ke udah dirampit kuap nya, laban kuap nya bahaya sereta nemu ngerampit. Nya alai, utai ke endur iya tumbuh nya patut ditunu ngena api.
53 “Tang enti imam meresa utai nya lalu beratika kuap nya enda ngerampit ngagai begian bukai ba gari, tauka ba kain ke ditenun, tauka ba nama-nama utai ke digaga ari kulit,
54 imam deka ngasuh utai nya dibasu, lalu iya deka nyeraraka utai nya ari orang bukai pengelama tujuh hari da agi.
55 Tujuh hari pengudah utai nya dibasu, imam patut meresa utai nya baru. Enti kuap nya agi bisi ba dia, taja pan kuap nya enda ngerampit ke bukai, utai nya enda tuchi. Utai nya patut ditunu enggau api laban kuap nya udah makai utai nya ari dalam tauka ari luar.
56 “Tang enti imam meresa utai nya lalu beratika begian ke kena kuap nya pudar pengudah dibasu, imam deka nyarikka begian nya ari gari, kulit jelu, tauka kain ke ditenun.
57 Tang enti kuap nya tumbuh lalu ngerampit ngagai begian bukai ba gari, kain ke ditenun, tauka nama-nama utai ke digaga ari kulit, utai nya patut ditunu.
58 Enti kuap nya nadai agi ayan ba gari, ba kain ke ditenun, tauka ba nama-nama utai ke digaga ari kulit pengudah dibasu, utai nya patut dibasu sekali da agi. Udah nya, utai nya deka nyadi tuchi.
59 “Tu meh adat pasal kuap ke tumbuh ba gari ke digaga ari bulu bedus tauka linin, ba kain ke ditenun, tauka ba nama-nama utai ke digaga ari kulit jelu. Enggau nya, imam ulih nentuka sekalika utai nya tuchi tauka enda.”
Nota Kaki
^ Tauka “sakit lan; kusta.” Ba jaku Hebrew, rambai jaku tu ulih nyengkaum mayuh macham penyakit kulit ke tau ngerampit. Tu mega engka mai reti kuap ke ba gari enggau rumah.
^ Tauka “iya enda ulih ngerampit orang bukai.”
^ Tauka “sumit.”
^ Jaku Asal, “sakit lan; kusta.” Engka merujuk ngagai sebengkah kulat tauka kuap; tang utai tu bedau pasti.
