Adat Lewi 14:1-57
14 Ku Jehovah bejaku baru enggau Moses:
2 “Tu adat ke patut dititihka orang ke kena penyakit kulit ti balat* lebuh iya betemu enggau imam ba hari iya deka dikumbai tuchi.
3 Imam deka pansut ke luar kem lalu meresa orang nya. Enti orang ke kena penyakit kulit ti balat nya udah gerai,
4 imam deka ngasuh iya mai dua iku burung ti tuchi ba mata Petara, kayu sidar, kain ke bewarna mirah terang, enggau tangkai hisop* kena iya nyadi tuchi.
5 Imam deka ngasuh siku ari burung nya dibunuh ba atas periuk tanah ke diisi enggau ai sungai.
6 Tang imam deka ngambi burung siku da agi seretai enggau kayu sidar, kain ke bewarna mirah terang, enggau tangkai hisop, lalu nyepuhka semua utai nya dalam darah burung ke udah dibunuh tadi.
7 Imam deka mechikka darah nya tujuh kali ba orang ke deka nuchi diri ari penyakit kulit ti balat, lalu madahka iya udah tuchi. Udah nya, imam deka ngelepaska burung ke agi idup nya ba padang.
8 “Orang ke deka nyadi tuchi nya mesti masu gari iya lalu nyukur buk sereta semua bulu ba tubuh iya, lalu mandi. Enggau nya, iya deka nyadi tuchi. Pengudah nya, iya tau tama ngagai kem. Tang iya patut diau ba luar langkau kain iya pengelama tujuh hari.
9 Ba hari ketujuh, orang nya patut nyukur semua buk ba pala iya, ragum, enggau bulu bansu iya. Pengudah iya nyukur semua nya, iya patut masu gari iya lalu mandi. Udah nya, iya nyadi tuchi.
10 “Ba hari kelapan, orang nya patut mai dua iku bedus ti lelaki ke biak enggau siku bedus ti indu ke beumur setaun tauka kurang. Semua jelu nya enda tau bisi penimpang. Iya mega patut mai 3.5 kilogram* tepung ti alus ke dichampur enggau minyak nyadika pemeri bijirin enggau 0.31 liter* minyak.
11 Imam ke madahka orang nya tuchi deka mai orang nya enggau pemeri iya ngagai depan Jehovah, ba pintu penama langkau gempuru.
12 Imam deka ngambi siku ari bedus ti lelaki ke biak nya lalu nyerahka nya nyadika pemeri ganti rugi seretai enggau 0.31 liter minyak. Udah nya, iya deka ngayunka semua nya ke depan enggau ke belakang nyadika pemeri* ngagai Jehovah.
13 Bedus ti lelaki nya deka disayat ba endur alai pemeri kena ngulihka pengampun dosa enggau pemeri tunu disayat, iya nya ba laman endur ti kudus. Baka pemeri kena ngulihka pengampun dosa, pemeri ganti rugi mega deka diempu imam. Pemeri nya utai ti pemadu kudus.
14 “Udah nya, imam deka ngambi sekeda ari darah jelu ke nyadi pemeri ganti rugi nya lalu ngunsutka darah nya ba cuping pending kanan, ba tunjuk indu jari kanan, enggau ba tunjuk indu kaki kanan orang ke deka nyadi tuchi nya.
15 Imam deka ngambi sekeda ari minyak lalu nuang minyak nya ba tapa jari kiba iya empu.
16 Udah nya, imam deka ngechalka tunjuk jari kanan iya ngagai minyak ba tapa jari kiba iya, lalu mechikka sekeda ari minyak nya tujuh kali ba depan Jehovah.
17 Imam lalu ngunsut laluh ari minyak nya ba cuping pending kanan, ba tunjuk indu jari kanan, enggau ba tunjuk indu kaki kanan orang ke deka nyadi tuchi nya. Iya deka ngunsut minyak nya ba endur alai iya ngunsut darah pemeri ganti rugi nya.
18 Laluh ari minyak ke ba tapa jari iya deka dituang iya ngagai pala orang ke deka nyadi tuchi nya, lalu imam deka minta pengampun dosa ke orang nya ba depan Jehovah.
19 “Pengudah nya, imam deka nyerahka pemeri kena ngulihka pengampun dosa, lalu minta pengampun ke orang ke deka nyadi tuchi nya. Udah nya, imam deka nyayat jelu ke pemeri tunu.
20 Imam deka nyerahka pemeri tunu enggau pemeri bijirin ba alta, lalu minta pengampun dosa ke orang nya. Udah nya, orang nya deka nyadi tuchi.
21 “Tang enti orang nya miskin lalu enda mampu nyediaka semua utai nya, iya patut mai siku bedus ti lelaki ke biak nyadika pemeri ganti rugi ke diayun kena ngulihka pengampun dosa ke iya empu. Iya patut nyediaka satu kilogram* tepung ti alus ke dichampur enggau minyak nyadika pemeri bijirin, 0.31 liter minyak,
22 enggau dua iku burung kukur tauka dua iku burung achang ti biak, nitihka utai ke ulih diberi iya. Siku ari burung nya deka diserahka nyadi pemeri kena ngulihka pengampun dosa, lalu siku da agi deka diserahka nyadi pemeri tunu.
23 Ngambika orang nya ulih nyadi tuchi baru, iya patut mai semua pemeri nya ngagai imam ba hari kelapan. Pemeri nya deka dibai ngagai depan Jehovah, iya nya ba pintu penama langkau gempuru.
24 “Imam deka ngambi bedus ke nyadi pemeri ganti rugi nya seretai enggau minyak nya. Udah nya, iya deka ngayunka semua nya ke depan enggau ke belakang nyadika pemeri ngagai Jehovah.
25 Imam lalu nyayat bedus nya. Udah nya, imam deka ngambi sekeda ari darah jelu ke nyadi pemeri ganti rugi nya lalu ngunsutka darah nya ba cuping pending kanan, ba tunjuk indu jari kanan, enggau ba tunjuk indu kaki kanan orang ke deka nyadi tuchi nya.
26 Imam deka nuang sekeda ari minyak nya ba tapa jari kiba iya empu,
27 lalu mechikka sekeda ari minyak nya ngena tunjuk jari kanan iya tujuh kali ba depan Jehovah.
28 Imam lalu ngunsut sekeda ari minyak nya ba cuping pending kanan, ba tunjuk indu jari kanan, enggau ba tunjuk indu kaki kanan orang ke deka nyadi tuchi nya. Iya deka ngunsut minyak nya ba endur alai iya ngunsut darah pemeri ganti rugi nya.
29 Laluh ari minyak ke ba tapa jari iya deka dituang iya ngagai pala orang ke deka nyadi tuchi nya. Udah nya, imam deka minta pengampun dosa ke orang nya ba depan Jehovah.
30 “Imam deka nyerahka siku ari burung kukur tauka siku ari burung achang ti biak nitihka utai ke ulih diberi orang nya.
31 Siku deka diserahka nyadi pemeri kena ngulihka pengampun dosa, lalu siku da agi deka diserahka nyadi pemeri tunu. Imam deka nyerahka utai ke ulih diberi orang nya seretai enggau pemeri bijirin. Enggau nya, imam deka minta pengampun dosa ke orang nya ba depan Jehovah.
32 “Nya meh adat ke orang ke bisi penyakit kulit ti balat tang sida enda mampu nyediaka utai ke patut ngambika ulih nyadi tuchi.”
33 Udah nya, ku Jehovah bejaku enggau Moses seduai Aron:
34 “Enti kita datai ba menua Kanaan, iya nya menua ke deka diberi Aku ngagai kita, lalu bisi rumah ba menua nya ke ditejuka Aku bisi kuap,*
35 orang ke bempu rumah nya patut madah ngagai imam: ‘Bisi utai tumbuh ba rumah aku.’
36 Sebedau imam datai meresa utai nya, iya deka ngasuh rumah nya dikusungka dulu enggaika semua utai dalam rumah nya dikumbai enda tuchi magang. Udah nya, baru iya datai meresa rumah nya.
37 Imam deka meresa begian ke bisi kuap nya. Enti dinding ba rumah nya udah diempa tumpuk ke bewarna kuning ijau tauka mirah,
38 imam deka pansut ari rumah nya lalu meri atur ngambika nadai siku pan orang tau tama ngagai rumah nya pengelama tujuh hari.
39 “Ba hari ketujuh, imam deka pulai baru lalu meresa rumah nya. Enti kuap nya udah ngerampit ngagai begian bukai ba dinding rumah nya,
40 imam deka ngasuh orang mansutka batu-batu ke bisi kuap nya lalu muai batu-batu nya ke luar kuta, iya nya ba endur alai muai utai ti enda tuchi.
41 Udah nya, iya deka ngasuh orang ngikis semua semin* ba dinding rumah nya lalu muai semin nya ke luar kuta, iya nya ba endur alai muai utai ti enda tuchi.
42 Batu-batu ke dibuai nya patut diganti enggau batu-batu ke baru, lalu dinding rumah nya deka diplaster ngena semin ke baru.
43 “Tang enti kuap nya tumbuh baru ba rumah nya pengudah batu-batu ke alai kuap nya tumbuh dibuai, lalu dinding ba rumah nya udah dikikis sereta disemin baru,
44 imam deka datai lalu meresa rumah nya. Enti utai nya udah ngerampit ngagai begian bukai ba rumah nya, nya bansa kuap ke bahaya sereta nemu ngerampit. Rumah nya enda tuchi.
45 Rumah nya deka dirubuh. Semua batu, kayu, enggau semin ba rumah nya deka dibai ke luar kuta, iya nya ba endur alai muai utai ti enda tuchi.
46 Dalam timpuh lebuh orang enda dikemendarka tama ngagai rumah nya, lalu bisi orang tama kia, iya deka nyadi enda tuchi nyentukka mata panas padam.
47 Barang sapa ke bemalam tauka makai ba rumah nya, patut masu gari iya.
48 “Tang enti imam datai lalu beratika utai nya enda ngerampit ngagai begian bukai ba rumah nya pengudah rumah nya disemin baru, imam deka madahka rumah nya tuchi laban utai nya nadai agi.
49 Ngambika rumah nya tau nyadi tuchi baru, imam deka ngambi dua iku burung, kayu sidar, kain ke bewarna mirah terang, enggau tangkai hisop.
50 Imam deka munuh siku ari burung nya ba atas periuk tanah ke diisi enggau ai sungai.
51 Imam deka ngambi burung siku da agi seretai enggau kayu sidar, kain ke bewarna mirah terang, enggau tangkai hisop, lalu nyepuhka semua utai nya dalam darah burung ke udah dibunuh tadi, lalu mechikka darah nya tujuh kali ngagai rumah nya.
52 Iya deka ngasuh rumah nya nyadi tuchi ngena darah burung, ai ke diambi ari sungai, burung ke agi idup, kayu sidar, tangkai hisop, enggau kain ke bewarna mirah terang.
53 Udah nya, imam deka ngelepaska burung ke agi idup nya ba padang, ba luar kuta. Nya meh chara imam deka muai utai ti enda tuchi ari rumah nya. Enggau nya, rumah nya deka nyadi tuchi baru.
54 “Nya meh adat pasal semua bansa penyakit kulit ti balat, jangkitan ba kulit pala tauka ba ragum,
55 kuap ba gari tauka ba rumah,
56 sereta jangkitan ke ngasuh kulit kembai, kuris, enggau betumpuk.
57 Enggau nya, imam ulih nentuka sekalika utai nya tuchi tauka enda. Nya meh adat pasal penyakit kulit ti balat.”
Nota Kaki
^ Tauka “sakit lan; kusta.”
^ Peda Penerang Leka Jaku.
^ Jaku Asal, “tiga persepuluh efah.” Peda Rujukan B14.
^ Jaku Asal, “satu log.” Peda Rujukan B14.
^ Jaku Asal, “pemeri ke diayun.”
^ Jaku Asal, “satu persepuluh efah.”
^ Jaku Asal, “sakit lan; kusta.” Engka merujuk ngagai sebengkah kulat tauka kuap; tang utai tu bedau pasti.
^ Tauka “tanah liat.”
