Adat Lewi 16:1-34
-
Hari Pengampun Dosa (1-34)
16 Pengudah dua iku anak lelaki Aron mati ketegal seduai iya datai ngagai Jehovah enggau chara ti enda bebasa, Jehovah lalu bejaku ngagai Moses.
2 Ku Jehovah: “Padah ngagai menyadi nuan Aron, iya enda tau sebarang maya tama ngagai Endur ti Pemadu Kudus, ke ba belakang tirai, lalu bediri ba depan penutup peti lampang batu Adat. Enti iya ngereja nya, iya deka mati laban Aku deka mandangka Diri dalam remang,* ba atas penutup peti nya.
3 “Sebedau Aron tama ngagai Endur ti Pemadu Kudus, iya patut nyerahka siku sapi ti lelaki ke biak nyadika pemeri kena ngulihka pengampun dosa enggau siku bedus ti lelaki nyadika pemeri tunu.
4 Iya patut ngerasukka baju jubah linin enggau seluar pandak* linin kena nutup tubuh iya. Iya mega patut ngena tali pinggang linin enggau serban linin. Semua nya gari ti kudus. Sebedau iya ngerasukka semua nya, iya patut mandi.
5 “Orang Israel patut meri Aron dua iku kambin ti lelaki ke biak nyadika pemeri kena ngulihka pengampun dosa enggau siku bedus ti lelaki nyadika pemeri tunu.
6 “Udah nya, Aron patut nyerahka sapi ti lelaki kena ngulihka pengampun dosa ke iya empu. Enggau nya, iya ulih minta pengampun dosa ke iya empu enggau ke ruang bilik iya.
7 “Udah nya, Aron deka mai dua iku kambin ngagai depan Aku, Jehovah, iya nya ba pintu penama langkau gempuru.
8 Aron deka ngena batu ti mit kena nentuka ni bagi kambin ke deka diserahka ngagai Aku, Jehovah, lalu ni bagi kambin* ke deka mai dosa semua orang.
9 Aron deka nyerahka kambin ke udah dipilih ke Aku, Jehovah, nyadika pemeri kena ngulihka pengampun dosa.
10 Tang kambin ke dipilih kena mai dosa semua orang patut dibai idup-idup ngagai depan Aku, Jehovah, kena ngulihka pengampun dosa. Udah nya, kambin nya deka dilepaska ba menua puang.
11 “Aron patut nyerahka sapi ti lelaki kena ngulihka pengampun dosa ke iya empu. Enggau nya, iya ulih minta pengampun dosa ke iya empu enggau ke ruang bilik iya. Udah nya, iya deka nyayat sapi nya.
12 “Aron patut mai siti pekekas endur engkah bara api lalu ngisi pekekas nya enggau bara api ari alta ke ba depan Aku, Jehovah. Iya mega patut ngambi dua genggam menyan alus ti bebau rengut lalu mai semua utai nya ngagai belakang tirai.
13 Iya patut ngengkahka menyan nya ba atas bara api ba depan Aku, Jehovah, ngambika asap ari menyan nya nutup penutup peti lampang batu Adat nya. Enggau nya, iya enda mati.
14 “Aron patut ngambi sekeda ari darah sapi nya ngena tunjuk jari iya lalu mechikka darah nya tujuh kali ba depan peti nya, ke nunga ngagai arah timur.
15 “Udah nya, iya deka nyayat kambin nya, ke diserahka nyadi pemeri kena ngulihka pengampun dosa ke orang Israel. Iya deka mai darah nya ngagai belakang tirai lalu mechikka darah nya ngagai depan penutup peti nya, baka ke digaga iya enggau darah sapi.
16 “Nya meh utai ke patut digaga Aron kena ngasuh Endur ti Pemadu Kudus diterima Aku sereta tuchi ari ulah ti ngelaban enggau dosa orang Israel. Iya mega mesti ngereja utai ti sama ngagai langkau gempuru, ke ba tengah-tengah orang Israel ke ngereja utai ti enda tuchi.
17 “Lebuh Aron nyerahka darah kena ngulihka pengampun dosa ba dalam Endur ti Pemadu Kudus, nadai siku pan tau tama ngagai langkau gempuru. Aron deka nyerahka darah kena ngulihka pengampun dosa ke iya empu, ke ruang bilik iya, sereta ke semua bansa Israel.
18 “Udah nya, Aron mesti mansang ngagai alta ke ba depan Aku, Jehovah, lalu nguduska alta nya. Iya deka ngambi sekeda ari darah sapi enggau sekeda ari darah kambin lalu ngunsutka darah nya ba tanduk ke ba empat iti tisi alta.
19 Iya mega deka mechikka darah nya ngena tunjuk jari iya tujuh kali ngagai alta kena nguduska alta nya ari utai ti enda tuchi ke dikereja orang Israel.
20 “Pengudah Aron nguduska Endur ti Pemadu Kudus, langkau gempuru, enggau alta, iya mega deka nyerahka kambin ti agi idup nya ngagai Aku.
21 Aron deka ngengkahka kedua-dua jari iya ba atas pala kambin nya lalu iya patut ngaku semua penyalah enggau dosa orang Israel. Enggau nya, iya baka ke udah mindahka semua dosa orang Israel ngagai pala kambin nya. Udah nya, siku orang ke udah dipilih deka ngelepaska kambin nya ba menua puang.
22 Lelaki nya deka ngelepaska kambin nya ngambika kambin nya mai dosa semua orang Israel ngagai menua puang.
23 “Udah nya, Aron deka tama ngagai langkau gempuru lalu muka gari linin ke dikena iya tama ngagai Endur ti Pemadu Kudus, lalu ninggalka gari nya ba dia.*
24 Iya patut mandi ba endur ti kudus* lalu ngerasukka gari iya ke bukai. Udah nya, iya patut mansang ngagai alta lalu nyerahka pemeri tunu ke iya empu enggau pemeri tunu ke semua orang Israel. Enggau chara tu, iya deka minta pengampun dosa ke iya empu enggau ke semua orang Israel.
25 Iya deka nunu lemak jelu ke diserahka nyadi pemeri kena ngulihka pengampun dosa ba alta nyentukka asap niki ke atas.
26 “Lelaki ke ngelepaska kambin ke mai dosa semua orang Israel nya patut masu gari diri sereta mandi. Udah nya, baru iya tau tama ngagai kem.
27 “Sapi ti lelaki enggau kambin ke udah diserahka nyadi pemeri kena ngulihka pengampun dosa, lalu darah sida udah dibai ngagai Endur ti Pemadu Kudus kena ngulihka pengampun dosa, patut dibai keluar ari kem. Lalu kulit, isi, enggau tai jelu nya mesti ditunu ba luar kem.
28 Orang ke nunu semua utai nya patut masu gari diri sereta mandi. Udah nya, baru iya tau tama ngagai kem.
29 “Tu adat ke patut seruran dititihka kita: Ba hari ke-10, kena bulan ketujuh, kita patut nunjukka diri tusah ati* ke dosa ke udah dikereja kita, lalu kita enda tau gawa. Adat tu patut dititihka semua orang Israel enggau orang bansa bukai ke diau enggau kita.
30 Ba hari nya, imam deka minta pengampun dosa ke kita ngambika kita nyadi tuchi. Enggau nya, dosa kita deka diampun, lalu kita deka nyadi tuchi ba mata Aku, Jehovah.
31 Nya meh Hari Sabat, hari kita patut berehat, lalu nunjukka diri tusah ati ke dosa ke udah dikereja kita. Nya deka nyadi adat ti tetap.
32 “Imam ke ditata sereta dilantik kena nganti apai iya nyadi imam patut nyerahka pemeri kena ngulihka pengampun dosa. Iya deka ngerasukka gari ti kudus, iya nya gari imam ke digaga ari linin.
33 Iya deka nyerahka pemeri kena nguduska Endur ti Pemadu Kudus, langkau gempuru, enggau alta, sereta kena minta pengampun dosa ke bala imam sereta ke semua orang Israel.
34 Setaun sekali, imam patut minta pengampun dosa ke semua orang Israel ngambika dosa sida diampun. Adat tu patut seruran dititihka kita.”
Aron pan ngereja semua utai nya, baka ke dipadah Jehovah ngagai Moses.
Nota Kaki
^ Tauka “awan.”
^ Tauka “tanchut dalam.”
^ Jaku Asal, “kambin ke deka diserahka ngagai Asasel.” Peda Penerang Leka Jaku, “Asasel.”
^ Iya nya, langkau gempuru.
^ Engka merujuk ngagai laman ba langkau gempuru.
^ Tu engka merujuk ngagai bepuasa sereta pantang larang ke bukai.
