Adat Lewi 17:1-16
17 Ku Jehovah bejaku enggau Moses:
2 “Padah ngagai Aron enggau bala anak lelaki iya sereta semua orang Israel: ‘Tu utai ke diasuh Aku, Jehovah:
3 “‘“Enti siku ari orang Israel nyayat sapi ti lelaki tauka bedus ti lelaki ke biak tauka kambin ba dalam kem tauka ba luar kem,
4 orang nya udah berutang darah. Iya patut mai jelu nya ngagai pintu penama langkau gempuru, lalu nyerahka nya ngagai Aku, Jehovah, ba depan langkau sembiang Aku, Jehovah. Tang ketegal iya udah munuh jelu nya enggau chara ti salah, iya mesti dibunuh.
5 Nya alai, orang Israel enda tau agi nyayat jelu sida ba padang, tang patut nyerahka nya ngagai Aku, Jehovah. Sida patut mai jelu nya ngagai imam ba pintu penama langkau gempuru. Sida patut nyerahka jelu nya nyadika pemeri bebaik ngagai Aku, Jehovah.
6 Imam deka mechikka darah jelu nya ba alta Aku, Jehovah, ba pintu penama langkau gempuru. Iya mega deka nunu lemak jelu nya nyentukka asap niki ke atas. Bau ari pemeri nya deka ngelantangka ati Aku, Jehovah.
7 Orang Israel enda tau agi nyerahka pemeri ngagai petara ke baka gamal kambin, ti disembah sida. Adat tu patut seruran dititihka kita enggau bala peturun kita.”’
8 “Nuan patut madah ngagai sida: ‘Enti siku ari bala kita, enda ngira nya orang Israel tauka orang bansa bukai ke diau enggau kita, nyerahka pemeri tunu tauka pemeri bukai,
9 lalu iya nadai mai pemeri nya ngagai pintu penama langkau gempuru ngambika diserahka ngagai Aku, Jehovah, iya mesti dibunuh.
10 “‘Enti siku ari bala kita, enda ngira nya orang Israel tauka orang bansa bukai ke diau enggau kita makai darah, enda ngira nya darah nama, Aku enggai nerima orang nya. Aku deka munuh iya laban iya makai darah.
11 Nyawa tiap iti utai ti idup bisi dalam darah. Aku udah ngaga atur ngambika darah diserahka ba alta, lalu dosa kita ulih diampun. Ketegal nyawa bisi dalam darah, kita tau bulih pengampun dosa ngena darah.
12 Nya alai, Aku madah ngagai orang Israel: “Nadai siku pan ari kita tau makai darah, lalu nadai siku pan orang bansa bukai ke diau enggau kita tau makai darah.”
13 “‘Enti siku ari bala kita, enda ngira nya orang Israel tauka orang bansa bukai ke diau enggau kita pansut ngasu lalu bulih jelu liar tauka burung ke tau diempa, orang nya mesti nuangka darah jelu nya ke tanah lalu ngelamun darah nya ngena tanah,
14 laban nyawa tiap iti utai ti idup bisi dalam darah. Nya alai Aku madah ngagai orang Israel: “Kita enda tau makai darah, enda ngira nya darah nama, laban nyawa tiap iti utai ti idup bisi dalam darah. Barang sapa ke makai darah deka dibunuh.”
15 Enti siku ari bala kita, enda ngira nya orang Israel tauka orang bansa bukai, ke makai jelu ke ditemu mati tauka jelu ke mati ketegal dibunuh jelu liar, orang nya patut masu gari iya sereta mandi. Iya deka dikumbai enda tuchi nyentukka mata panas padam. Udah nya, iya deka nyadi tuchi baru.
16 Tang enti iya enda masu gari iya sereta enda mandi, iya deka diukum ketegal penyalah iya.’”
