Adat Lewi 18:1-30
18 Ku Jehovah bejaku baru enggau Moses:
2 “Padah ngagai orang Israel: ‘Aku tu Jehovah, Petara kita.
3 Anang nitihka pengawa orang ba menua Ejip, menua alai kita diau suba. Lalu anang nitihka pengawa orang ba menua Kanaan, menua ke deka diberi Aku ngagai kita. Anang ngereja utai baka ke dikereja sida.
4 Titihka adat Aku, ngasika atur Aku, lalu idup sejalai enggau semua nya. Aku tu Jehovah, Petara kita.
5 Kita patut idup nitihka adat enggau atur ke udah ditetapka Aku. Barang sapa ke nitihka adat tu deka idup. Aku tu Jehovah.
6 “‘Anang ngereja pengawa seks enggau kaban belayan diri empu. Aku tu Jehovah.
7 Anang ngereja pengawa seks enggau apai nuan. Anang ngereja pengawa seks enggau indai nuan, laban iya indai nuan.
8 “‘Anang ngereja pengawa seks enggau bini apai nuan, laban nya deka ngemaluka apai nuan empu.
9 “‘Anang ngereja pengawa seks enggau menyadi indu nuan, enda ngira iya anak indu apai nuan tauka anak indu indai nuan, sekalika iya ada ba ruang bilik ti sama tauka enda.
10 “‘Anang ngereja pengawa seks enggau uchu indu nuan, enda ngira iya datai ari anak lelaki nuan tauka anak indu nuan, laban nya deka ngemaluka nuan empu.
11 “‘Anang ngereja pengawa seks enggau anak indu bini apai nuan, laban iya anak indu apai nuan, menyadi nuan.
12 “‘Anang ngereja pengawa seks enggau menyadi indu apai nuan, laban iya menyadi kandung apai nuan.
13 “‘Anang ngereja pengawa seks enggau menyadi indu indai nuan, laban iya menyadi kandung indai nuan.
14 “‘Anang ngereja pengawa seks enggau bini menyadi lelaki apai nuan, laban nya deka ngemaluka menyadi apai nuan. Bini iya ibu nuan.
15 “‘Anang ngereja pengawa seks enggau menantu indu nuan, laban iya bini anak lelaki nuan.
16 “‘Anang ngereja pengawa seks enggau bini menyadi lelaki nuan, laban nya deka ngemaluka menyadi lelaki nuan.
17 “‘Nuan enda tau ngereja pengawa seks enggau siku indu, lalu udah nya ngereja pengawa seks mega enggau anak indu iya tauka uchu indu iya. Seduai iya kaban belayan indu nya. Nya pengawa ti ngemaluka.
18 “‘Anang ngambi menyadi indu bini nuan nyadika bini lumur dua nuan, lalu ngereja pengawa seks enggau iya lebuh bini nuan agi idup, enggaika seduai iya bemunsuh enggau pangan diri.
19 “‘Anang ngereja pengawa seks enggau indu ke benung datai kain, laban iya enda tuchi.
20 “‘Anang ngereja pengawa seks enggau bini orang bukai, laban nya deka ngasuh nuan enda tuchi.
21 “‘Anang nyerahka anak nuan nyadika pemeri ngagai petara Molek.* Anang ngamahka nama Aku enggau pengawa ke baka nya. Aku tu Jehovah.
22 “‘Orang lelaki enda tau ngereja pengawa seks enggau orang ke sama lelaki.* Nya pengawa ti dipegedika Petara.
23 “‘Indu tauka lelaki bela enda tau ngereja pengawa seks enggau jelu, laban nya pengawa ti kamah sereta ngasuh diri empu enda tuchi.
24 “‘Anang ngereja semua nya ngambika kita mengkang tuchi. Orang bansa bukai udah ngasuh diri enda tuchi ketegal semua pengawa nya. Nya alai, Aku muru sida ari kita.
25 Ketegal nya, menua sida nyadi enda tuchi. Aku deka ngukum orang ke diau ba menua nya ketegal penyalah sida, lalu muru sida ari menua nya.
26 Semua kita mesti idup nitihka adat enggau atur ke udah ditetapka Aku. Kita enggau orang bansa bukai ke diau enggau kita enda tau ngereja pengawa ti kamah nya.
27 Semua pengawa ti kamah nya udah dulu digaga orang ke diau ba menua nya. Nya kebuah menua nya nyadi enda tuchi.
28 Enti kita enda ngamahka menua nya, kita enda diburu. Enda baka orang bansa bukai ke diau dulu ba menua nya ari kita.
29 Barang sapa ke ngereja utai ti kamah nya mesti dibunuh.
30 Kita mesti nitihka semua utai ke diasuh Aku. Anang ngereja semua utai ti kamah, ke suah dikereja orang ke dulu diau ba menua tu sebedau kita. Enggau nya, kita deka mengkang tuchi. Aku tu Jehovah, Petara kita.’”
Nota Kaki
^ Peda Penerang Leka Jaku, “Molek.”
^ Tauka “ngereja pengawa seks enggau orang ke sama lelaki, sama baka iya ke ngereja pengawa seks enggau orang ke indu.”
