Adat Lewi 19:1-37
-
Adat pasal pengawa ti kudus (1-37)
19 Ku Jehovah bejaku baru ngagai Moses:
2 “Padah ngagai semua orang Israel: ‘Kita patut kudus, laban Aku, Jehovah, Petara kita, kudus.
3 “‘Tiap iku kita patut bebasaka apai indai kita. Kita patut ngintu Hari Sabat. Aku tu Jehovah, Petara kita.
4 Anang nyembah petara-petara ke nadai guna, lalu anang ngaga patung petara ari besi. Aku tu Jehovah, Petara kita.
5 “‘Lebuh kita nyerahka pemeri bebaik ngagai Aku, Jehovah, kita patut nyerahka pemeri nya enggau chara ti betul ngambika pemeri nya diterima Aku.
6 Pemeri nya patut diempa ba hari pemeri nya diserahka enggau ba hari siti. Tang enti laluh ari pemeri nya agi bisi nyentukka hari ketiga, laluh nya mesti ditunu abis.
7 Enti laluh ari pemeri nya diempa ba hari ti ketiga, pemeri nya udah nyadi utai ti enda tuchi, lalu Aku enggai nerima pemeri nya.
8 Barang sapa ke makai pemeri nya patut betanggungjawapka pengawa iya empu, laban iya enda bebasaka utai ti kudus ke enggi Aku, Jehovah. Orang nya mesti dibunuh.
9 “‘Lebuh kita ngetau ba ladang, anang ngetau sampai abis utai tanam ba tisi ladang kita. Enti sema bisi asil ketau ke tinggal, anang ngumpul iya.
10 Pia mega, anang ngambi buah anggur ke tinggal ba ladang kita tauka ngumpul buah anggur ke labuh ba ladang kita. Tinggalka buah nya ngagai orang ke miskin sereta orang asing ke diau enggau kita. Aku tu Jehovah, Petara kita.
11 “‘Anang ngenchuri, anang nipu, sereta anang enda jujur enggau orang bukai.
12 Anang bulaka semaya* ke udah digaga kita dalam nama Aku, laban nya enda nunjukka basa ngagai nama Aku. Aku tu Jehovah.
13 Anang nipu sereta anang ngerumpak. Anang ngetanka gaji kuli nuan nyentukka hari siti.
14 “‘Anang nyumpah orang ke bengal tauka ngengkahka utai kena ngempang jalai orang ke buta. Kita patut nangika Aku. Aku tu Jehovah.
15 “‘Kita mesti ngakim enggau adil. Anang pilih kasih ngagai orang ke miskin tauka kaya. Kita mesti ngakim orang bukai enggau adil.
16 “‘Anang madahka utai ti bula pasal orang bukai kena ngenyaika nama orang nya. Anang sengaja ngereja utai ke ulih nabanka nyawa* orang bukai.* Aku tu Jehovah.
17 “‘Anang begedika menyadi nuan dalam ati. Rara menyadi nuan, enggaika nuan sama bedosa enggau iya.
18 “‘Anang bedendam tauka malas dendam ngagai orang bukai. Kita patut rinduka orang bukai, baka kita ke rinduka diri empu. Aku tu Jehovah.
19 “‘Kita patut ngasika adat Aku: Anang ngawinka jelu tupi ke enda sama bansa. Anang nanam dua bansa benih ba ladang ti sama. Anang ngena gari ke digaga ari dua bansa ubung.
20 “‘Enti siku lelaki ngereja pengawa seks enggau siku ulun indu, lalu tuan indu nya udah besemaya deka nyerahka indu nya nyadika bini lelaki bukai, tang indu nya bedau dibayar rega tauka dilepaska, lelaki nya enggau ulun indu nya mesti diukum. Tang seduai iya enda diukum bunuh, laban indu nya bedau dilepaska.
21 Lelaki nya patut mai siku bedus ti lelaki nyadika pemeri ganti rugi ngagai Aku, Jehovah, ba pintu penama langkau gempuru.
22 Imam deka nyerahka bedus nya nyadika pemeri ganti rugi ngagai Aku, Jehovah, kena minta pengampun dosa ke penyalah ke udah dikereja lelaki nya. Enggau nya, lelaki nya deka diampun.
23 “‘Lebuh kita tama ngagai menua ke deka diberi Aku ngagai kita, lalu kita nanam bemacham pun buah, kita patut ngumbai buah nya enda tuchi sereta haram dalam tiga taun ti keterubah. Dalam timpuh nya, kita enda tau makai buah nya.
24 Tang ba taun ti keempat, semua buah nya deka nyadi kudus. Kita patut nyerahka nya ngagai Aku, Jehovah, enggau ati ti gaga.
25 Ba taun ti kelima, nya baru kita tau makai buah ke ditanam kita. Buah ke digumpul kita tau ditambahka ngagai asil utai ke diketau kita. Aku tu Jehovah, Petara kita.
26 “‘Anang makai dagin ke agi bedarah.
“‘Anang betilitka nasit tauka ngereja pengawa ilmu sihir.*
27 “‘Anang nyukur ragum kita, lalu anang nguntin begian ujung ragum* kita.
28 “‘Anang nelihka tubuh diri* ketegal orang ke udah mati, lalu anang ngaga pantang ba tubuh diri empu. Aku tu Jehovah.
29 “‘Anang ngasuh anak indu kita nyadi pelacur, laban nya deka ngemaluka iya. Enggau nya, menua kita enda kamah laban pelacur sereta ulah ti kamah.
30 “‘Kita patut ngintu Hari Sabat. Kita patut bebasaka endur Aku ti kudus. Aku tu Jehovah.
31 “‘Anang ngiga manang, lalu anang betanya ngagai orang ke nemu nilit nasit, enggaika kita nyadi enda tuchi. Aku tu Jehovah, Petara kita.
32 “‘Kita patut bediri lebuh orang tuai mansa, lalu bebasaka sida. Kita patut nangika Petara kita. Aku tu Jehovah.
33 “‘Kita mesti manah enggau orang asing ke diau enggau kita.
34 Kita patut ngelayan sida baka chara kita ngelayan orang ke sama bansa enggau kita empu. Kita patut rinduka sida, baka kita ke rinduka diri empu. Suba, kita pan kala nyadi orang asing ba menua Ejip. Aku tu Jehovah, Petara kita.
35 “‘Anang nipu orang lebuh kita nyukat, nimbang, tauka nakar utai.
36 Kita patut ngena dachin ti betul, timbang ti betul, enggau takar ti betul, enda ngira sekalika nya kena nyukat cecair tauka utai ti rangkai. Aku tu Jehovah, Petara kita, ke udah mai kita pansut ari menua Ejip.
37 Titihka semua adat enggau atur ke udah digaga Aku. Aku tu Jehovah.’”
Nota Kaki
^ Tauka “sumpah.”
^ Jaku Asal, “darah.”
^ Tauka engka, “Anang diau diri lebuh meda orang bukai dalam bahaya.”
^ Peda Penerang Leka Jaku, “Ilmu sihir.”
^ Engka merujuk ngagai pengawa ke biasa digaga orang kapir. Tang ukai reti nya lelaki orang Israel langsung enda tau nguntin ragum sida.
^ Merujuk ngagai pengawa ke biasa digaga orang kapir lebuh sida ngulit.
