Adat Lewi 20:1-27
20 Ku Jehovah nampung jaku Iya enggau Moses:
2 “Padahka ngagai orang Israel: ‘Enti siku ari kita tauka siku ari orang bansa bukai ke diau enggau kita ke nyerahka anak iya ngagai petara Molek, iya patut diukum bunuh. Semua orang ba endur nya patut nuku iya ngena batu nyentukka iya mati.
3 Aku enggai nerima orang nya, lalu Aku deka munuh iya laban iya udah nyerahka anak iya ngagai petara Molek. Iya udah ngamahka endur Aku ti kudus sereta enda bebasaka nama Aku ti kudus.
4 Enti orang ba endur nya meda orang nya nyerahka anak iya ngagai petara Molek, tang sida enda munuh iya,
5 Aku Empu deka munuh iya sereta munuh sapa-sapa ke nitihka iya nyembah petara Molek.* Aku enggai nerima orang nya enggau ruang bilik iya.
6 “‘Enti siku ari kita enda tetap ati ngagai Aku,* laban iya betanya ngagai manang enggau orang ke nemu betilit nasit, Aku enggai nerima orang nya, lalu deka munuh iya.
7 “‘Kita mesti tuchi sereta kudus laban Aku, Jehovah, Petara kita.
8 Kita mesti ngasika lalu nitihka adat Aku. Aku tu Jehovah, ke ngasuh kita tuchi.
9 “‘Enti siku ari kita nyumpah apai tauka indai diri, iya patut dibunuh. Ketegal iya udah nyumpah apai tauka indai diri, iya patut mati ketegal penyalah iya empu.
10 “‘Tu utai ke deka nyadi ngagai siku lelaki ke butang* enggau bini orang bukai: Enti siku lelaki butang enggau bini orang bukai, lelaki enggau indu nya mesti sama dibunuh.
11 Lelaki ke ngereja pengawa seks enggau bini apai iya udah ngemaluka apai iya. Lelaki nya enggau indu nya mesti sama dibunuh ketegal penyalah seduai iya empu.
12 Enti siku lelaki ngereja pengawa seks enggau menantu indu iya, seduai iya mesti sama dibunuh ketegal penyalah seduai iya. Seduai iya udah ngereja utai ti kamah.
13 “‘Enti siku lelaki ngereja pengawa seks enggau orang ke sama lelaki,* seduai iya mesti sama dibunuh ketegal penyalah seduai iya. Seduai iya udah ngereja utai ti dipegedika Petara.
14 “‘Enti siku lelaki ngereja pengawa seks enggau siku indu, lalu ngereja pengawa seks mega enggau indai indu nya, semua sida tiga nya mesti dibunuh lalu ditunu. Ketegal sida enda malu ngereja pengawa ti jai nya, semua sida mesti diukum ngambika pengawa nya enda agi dikereja bala kita.
15 “‘Enti siku lelaki ngereja pengawa seks enggau jelu, lelaki nya enggau jelu nya mesti dibunuh.
16 Enti siku indu ngereja pengawa seks enggau jelu, indu nya enggau jelu nya mesti dibunuh ketegal penyalah seduai iya.
17 “‘Enti siku lelaki ngereja pengawa seks enggau menyadi indu iya, enda ngira nya anak indu apai iya tauka anak indu indai iya, seduai iya mesti sama dibunuh ba depan orang mayuh. Seduai iya udah ngereja pengawa ti balat ngemaluka. Seduai iya udah meda pangan diri telanjai. Lelaki nya udah ngemaluka menyadi indu iya. Lelaki nya mesti diukum ketegal penyalah iya.
18 “‘Enti siku lelaki ngereja pengawa seks enggau siku indu ke benung datai kain, seduai iya mesti sama dibunuh, laban seduai iya enda ngumbai darah nya utai ti kudus.
19 “‘Anang ngereja pengawa seks enggau menyadi indu indai nuan tauka menyadi indu apai nuan, laban pengawa nya ngemaluka kaban belayan. Lelaki enggau indu ke ngereja pengawa nya deka betanggungjawapka penyalah diri.
20 Lelaki ke ngereja pengawa seks enggau bini aya iya udah ngemaluka aya iya. Lelaki enggau indu nya patut betanggungjawapka penyalah diri. Seduai iya mesti mati, lalu enda tau bisi anak.
21 Enti siku lelaki kawin enggau bini menyadi iya,* iya udah ngemaluka menyadi iya. Pengawa nya, pengawa ti kamah. Lelaki enggau indu nya mesti mati, lalu enda tau bisi anak.
22 “‘Kita mesti nitihka semua adat enggau atur ke diberi Aku ngagai kita, ngambika kita enda diburu ari menua ke deka diberi Aku ngagai kita.
23 Anang nitihka pengawa orang bansa bukai. Aku begedika sida laban sida ngereja semua pengawa nya. Nya meh kebuah Aku deka muru sida ari menua nya.
24 Nya alai, Aku madah ngagai kita: “Kita deka bempu menua sida, lalu Aku deka meri menua sida nyadi enggi kita, menua ke kaya enggau ai tusu sereta madu. Aku tu Jehovah, Petara kita, ke udah nyeraraka kita ari semua bansa bukai.”
25 Kita mesti nemu bida entara jelu ti tuchi enggau ke enda tuchi, sereta burung ti tuchi enggau ke enda tuchi. Anang makai jelu, burung, tauka nama-nama utai idup ti ngerayap ke udah dikumbai Aku enda tuchi, ngambika kita mengkang tuchi.
26 Kita mesti kudus laban Aku, Jehovah, Petara kita, kudus. Aku deka nyeraraka kita ari semua bansa bukai ngambika kita nyadi enggi Aku.
27 “‘Barang sapa ke nyadi manang tauka nemu nilit nasit, patut dibunuh ketegal penyalah iya. Semua orang deka nuku iya ngena batu nyentukka iya mati.’”
Nota Kaki
^ Tauka “ke nyerahka diri baka pelacur ngagai petara Molek.”
^ Tauka “Enti siku ari kita nyerahka diri baka pelacur ngagai petara bukai.”
^ Orang ti udah kawin ngereja ulah seks enggau orang ke ukai kaling pengidup iya.
^ Tauka “ngereja pengawa seks enggau orang ke sama lelaki, sama baka iya ke ngereja pengawa seks enggau orang ke indu.”
^ Iya nya, lebuh menyadi iya agi idup.
