Adat Lewi 21:1-24
21 Ku Jehovah bejaku baru enggau Moses: “Padah ngagai bala imam, iya nya bala anak lelaki Aron: ‘Nadai siku pan ari kita tau datai semak ngagai orang ke udah mati, ke sama bansa enggau kita, laban nya ulih ngasuh kita enda tuchi.
2 Tang enti orang ke mati nya kaban belayan ke semak enggau kita, baka indai, apai, anak lelaki, anak indu, menyadi lelaki,
3 tauka menyadi indu ke agi dara, ke bedau belaki lalu diau begulai enggau kita, kita tau nyabakka pemati sida lalu ngasuh diri nyadi enda tuchi.
4 Tang enti indu ke udah jadi enggau orang ke sama bansa enggau kita udah nadai, kita enda tau datai semak ngagai bangkai indu nya, laban nya ulih ngasuh kita enda tuchi.
5 Kita enda tau nyukur pala, nguntin begian ujung ragum,* tauka nelihka tubuh diri.*
6 Kita patut kudus lalu bebasaka nama Aku. Kita patut kudus laban kita meh ke nyerahka roti nyadika pemeri ke ditunu ngagai Aku, Jehovah, Petara kita.
7 Kita enda tau jadi enggau pelacur, indu ke ukai agi dara, tauka indu ke udah sarak, laban imam patut kudus ba mata Aku.
8 Orang Israel patut ngumbai bala imam nya kudus, laban sida meh ke nyerahka roti nyadika pemeri ngagai Aku. Bala imam patut dikumbai kudus, laban Aku, Jehovah, Petara ti kudus, udah nyeraraka kita bansa Israel nyadi bansa ti kudus.
9 “‘Enti anak indu siku imam nyadi pelacur, iya udah ngasuh diri empu nyadi enda tuchi. Iya udah ngemaluka apai iya. Iya patut diukum bunuh, lalu ditunu.
10 “‘Imam ke dipilih ari bala imam ke bukai* lalu dilantik nyadi imam besai, enda tau nejuka buk iya enda disugu tauka nyarikka gari imam iya. Iya udah ditata ngena minyak ti kudus, lalu ngena gari imam.
11 Iya enda tau datai semak ngagai bangkai orang, enda ngira nya bangkai indai tauka bangkai apai iya, laban nya ulih ngasuh iya nyadi enda tuchi.
12 Iya enda tau pansut ari endur ti kudus lalu ngasuh endur nya nyadi enda tuchi. Tu ketegal minyak ti kudus ke nunjukka iya udah nyerahka diri ngagai Aku, bisi ba iya. Aku tu Jehovah.
13 “‘Imam besai patut jadi enggau indu ke agi dara.
14 Iya enda tau jadi enggau indu ke balu, indu ke udah sarak, indu ke ukai agi dara, tauka pelacur. Iya patut jadi enggau indu ke agi dara, ke sama bansa enggau iya.
15 Enggau nya, iya enda ngemaluka bala anak iya ba bala orang ke sebansa enggau iya. Aku tu Jehovah, ke udah nguduska iya.’”
16 Ku Jehovah agi:
17 “Padah ngagai Aron: ‘Nadai siku pan ari peturun nuan ke bisi penimpang ba tubuh, tau nyerahka roti nyadika pemeri ngagai Aku. Atur tu patut seruran dititihka bala peturun nuan.
18 Orang ke bisi penimpang ba tubuh ke baka tu enda tau nyerahka pemeri: Orang ke buta, orang ke pinchat, orang ke bisi tachat ba mua, orang ke bisi lengan tauka kaki ke enda sama panjai,
19 orang ke patah kaki tauka lengan,
20 orang ke bungkuk, orang ke kerdil,* orang ke sakit mata, orang ke sakit kulit tauka kurap, tauka orang ke bisi penanggul ba perengka seks.
21 Nadai siku pan bala peturun Aron ke nyadi imam, ke bisi penimpang ba tubuh, tau nyerahka pemeri ke ditunu ngagai Aku, Jehovah. Ketegal iya bisi penimpang ba tubuh, iya enda tau datai semak ngagai Aku, lalu nyerahka roti nyadika pemeri.
22 Taja pia, iya tau makai roti ke diserahka ngagai Aku, enda ngira nya ari utai ti pemadu kudus tauka kudus.
23 Tang iya enda tau datai semak ngagai tirai* tauka alta, laban iya bisi penimpang ba tubuh. Iya enda tau ngasuh endur ti kudus nyadi enda tuchi. Aku tu Jehovah, ke udah ngasuh sida* nyadi kudus.’”
24 Moses lalu madahka semua pesan tu ngagai Aron, bala anak lelaki Aron, enggau semua orang Israel.
Nota Kaki
^ Engka merujuk ngagai pengawa ke biasa digaga orang kapir. Tang ukai reti nya lelaki orang Israel langsung enda tau nguntin ragum sida.
^ Merujuk ngagai pengawa ke biasa digaga orang kapir lebuh sida ngulit.
^ Jaku Asal, “bala menyadi lelaki iya.”
^ Engka merujuk ngagai orang ke amat pandak tauka orang ke balat kurus ketegal penyakit.
^ Iya nya, tirai ba entara Endur ti Kudus enggau Endur ti Pemadu Kudus.
^ Engka merujuk ngagai bala imam.
