Adat Lewi 22:1-33
22 Ku Jehovah bejaku ngagai Moses:
2 “Padah ngagai Aron enggau bala anak lelaki iya ngambika bebasaka utai ti kudus, ke diserahka orang Israel ngagai Aku. Sida mesti bebasaka nama Aku ti kudus, laban Aku tu Jehovah.
3 Padah ngagai sida: ‘Barang sapa ari bala kita ke enda tuchi, lalu datai semak ngagai utai ti kudus ke diserahka orang Israel ngagai Aku, Jehovah, orang nya mesti dibunuh. Aku tu Jehovah. Atur tu patut seruran dititihka kita enggau bala peturun kita.
4 Nadai siku pan bala peturun Aron tau makai utai ti kudus seagi-agi iya bedau nyadi tuchi. Pia mega enggau sida ke bisi penyakit kulit ti balat,* sida ke mansutka utai ti belendir ari utai* sida, sida ke negu orang bukai ke enda tuchi ketegal orang nya udah negu orang ke udah mati, sida ke mansutka ai mani,
5 sida ke negu utai idup ti mit* ke haram, tauka sida ke negu orang ke ngasuh sida enda tuchi.
6 Barang sapa ke negu siti ari nya deka nyadi enda tuchi nyentukka mata panas padam. Iya enda tau makai utai ti kudus, tang iya patut mandi.
7 Pengudah mata panas padam, nya baru sida nyadi tuchi. Udah nya, sida tau makai utai ti kudus, laban nya endang pemakai sida.
8 Sida mega enda tau makai jelu ke ditemu mati tauka jelu ke mati ketegal dibunuh jelu liar. Enti sida makai nya, sida deka nyadi enda tuchi. Aku tu Jehovah.
9 “‘Sida patut ngasika pesan Aku. Sida enda tau ngasuh utai ti kudus nyadi enda tuchi, ngambika sida enda bedosa lalu mati. Aku tu Jehovah, ke nguduska sida.
10 “‘Barang sapa ke ukai ari ruang bilik imam, enda tau makai utai ti kudus. Temuai bansa bukai ke datai lalu diau enggau imam, tauka pekereja ke digaji imam mega, enda tau makai utai ti kudus.
11 Tang ulun ke udah dibeli imam ngena duit imam nya empu, tauka ulun ke ada dalam rumah imam, tau makai utai ti kudus.
12 Enti anak indu imam jadi enggau orang ke ukai imam,* anak indu iya enda tau makai pemeri ti kudus ke udah diserahka.
13 Tang enti anak indu imam nya udah nyadi balu tauka udah sarak, lalu iya nadai anak, sereta udah pulai baru diau ba rumah apai iya baka lebuh maya iya agi biak suba, iya tau makai pemakai apai iya. Tang barang sapa ke ukai ari ruang bilik imam, enda tau makai utai ti kudus.
14 “‘Enti siku ari bala kita enda sengaja makai utai ti kudus, iya patut nambah 20 peratus ari rega utai nya, lalu meri nya ngagai imam.
15 Bala imam enda tau ngasuh utai ti kudus ke diserahka orang Israel ngagai Aku, Jehovah, nyadi enda tuchi.
16 Sida mega enda tau ngasuh orang Israel bedosa lalu diukum ketegal makai utai ti kudus. Aku tu Jehovah, ke nguduska sida.’”
17 Ku Jehovah bejaku baru ngagai Moses:
18 “Padah ngagai Aron enggau bala anak lelaki iya, sereta semua orang Israel: ‘Lebuh kita tauka orang bansa bukai ke diau enggau kita nyerahka pemeri tunu ngagai Aku, Jehovah, ketegal udah besemaya ngagai Aku, tauka ketegal deka meri pemeri enggau sukarela,
19 kita patut nyerahka sapi ti lelaki, tauka bedus ti lelaki ke biak, tauka kambin. Semua jelu nya enda tau bisi penimpang, ngambika kita diterima Aku.
20 Anang nyerahka jelu ke bisi penimpang ngagai Aku, laban Aku enggai nerima pemeri ke baka nya.
21 “‘Enti siku ari bala kita deka nyerahka pemeri bebaik ngagai Aku, Jehovah, ketegal udah besemaya ngagai Aku tauka ketegal deka meri pemeri enggau sukarela, iya patut nyerahka sapi, bedus, tauka kambin ke nadai penimpang, ngambika orang nya diterima Aku.
22 Anang nyerahka jelu ke buta, ke patah tulang, ke bisi telih, kutil, kuris, tauka kurap. Anang nyerahka jelu ke baka nya ngagai Aku, Jehovah. Kita enda tau nyerahka jelu nya ba alta nyadika pemeri ngagai Aku, Jehovah.
23 Kita tau nyerahka sapi tauka bedus ke bisi kaki ke enda sama panjai nyadika pemeri sukarela. Tang jelu nya enda tau diserahka nyadi pemeri kena ngamatka semaya.
24 Anang nyerahka ngagai Aku, Jehovah, jelu ke telu* iya udah rusak, tauka telu iya bisi telih, tingkil, tauka udah dibuai. Anang sekali-kali nyerahka jelu nya nyadika pemeri ba menua kita.
25 Kita enda tau ngambi jelu ke bisi penimpang ke baka nya ari orang bansa bukai nyadika pemeri ngagai Aku, laban jelu ke baka nya bisi bakal sereta bisi penimpang. Aku enggai nerima jelu ke baka nya ari kita.’”
26 Ku Jehovah bejaku baru ngagai Moses:
27 “Lebuh anak sapi, tauka anak bedus, tauka anak kambin ada, iya patut ditejuka begulai enggau indai iya pengelama tujuh hari. Tang belabuh ari hari kelapan, anak jelu nya tau diserahka nyadika pemeri ke ditunu ngagai Aku, Jehovah.
28 Tang kita enda tau munuh indai sapi tauka indai bedus enggau anak sida ba hari ti sama.
29 “Enti kita deka nyerahka pemeri ketegal deka meri terima kasih ngagai Aku, Jehovah, kita patut nyerahka nya enggau chara ti betul ngambika diterima Aku.
30 Pemeri nya patut diempa ba hari ti sama. Anang ninggalka laluh sampai pagi hari siti. Aku tu Jehovah.
31 “Kita patut ngasika pesan Aku. Aku tu Jehovah.
32 Kita mesti bebasaka nama Aku ti kudus, ngambika orang Israel nemu Aku tu kudus. Aku tu Jehovah ke ngasuh kita kudus.
33 Aku ke mai kita pansut ari menua Ejip kena nunjukka Aku tu Petara kita. Aku tu Jehovah.”
Nota Kaki
^ Tauka “sakit lan; kusta.”
^ Tauka “ari perengka seks.”
^ Tu merujuk ngagai utai idup ti mit ke diau beraban.
^ Tauka “orang luar.”
^ Tauka “telu pelir.”
