Adat Lewi 26:1-46
26 “‘Anang ngaga petara bukai, laban sida nadai guna. Anang ngaga patung, tiang batu keramat, tauka batu ke diukir ngambika disembah ba menua kita, laban Aku tu Jehovah, Petara kita.
2 Kita patut ngintu Hari Sabat. Kita patut bebasaka endur Aku ti kudus. Aku tu Jehovah.
3 “‘Enti kita ngasika adat enggau semua pesan Aku, lalu idup sejalai enggau semua nya,
4 Aku deka ngasuh hari ujan ba maya ti patut. Tanah deka mansutka asil, lalu pun kayu ba ladang deka bebuah.
5 Utai ti ditanam kita deka mansutka mayuh asil, datai ke kita agi ngindik gandum lebuh maya musin ngumpul buah anggur datai, lalu kita agi ngumpul buah anggur lebuh maya musin nanam benih datai. Kita deka makai sampai kita puas, lalu kita deka idup enggau likun ba menua kita.
6 Aku deka ngasuh menua kita likun, lalu nadai utai ke ulih ngasuh kita takut lebuh kita tinduk. Aku deka muru jelu liar ti mangah ari menua kita, lalu nadai orang deka nyerang menua kita.
7 Kita deka begagaika munsuh kita lalu ngalahka sida ngena pedang.
8 Lima iku ari kita deka begagaika seratus iku, lalu seratus iku ari kita deka begagaika sepuluh ribu iku. Lalu kita deka ngalahka munsuh kita ngena pedang.
9 “‘Aku deka merekatka kita. Aku deka ngasuh kita beranak betelesak lalu nyadi majak mayuh. Aku deka ngamatka sempekat ke udah digaga Aku enggau kita.
10 Utai ke diketau kita amat mayuh, nyentukka kita ulih makai iya sampai taun siti. Ketegal nya, kita patut muai asil ketau ke lama ngambika kita ulih nyimpan asil ketau ke baru.
11 Aku deka ngengkahka langkau sembiang Aku ba tengah-tengah kita, lalu Aku deka nerima kita.
12 Aku deka meruan enggau kita. Aku deka nyadi Petara kita, lalu kita deka nyadi nembiak Aku.
13 Aku tu Jehovah, Petara kita, ke mai kita pansut ari menua Ejip, ngambika kita badu agi nyadi ulun. Aku udah ngelepaska kita ari tangkun ke nekan pengidup kita, ngambika kita ulih bejalai baka orang ke bibas.
14 “‘Tang enti kita enggai mendingka Aku, enggai nitihka pesan Aku,
15 nulak atur ke udah digaga Aku, enggai nitihka pemutus ukum ari Aku lalu ngujungka kita enggai ngasika semua pesan Aku, sereta ngelanggar sempekat ke udah digaga Aku enggau kita,
16 Aku deka ngukum kita. Aku deka ngasuh kita pedis ketegal penyakit tibi* enggau demam panas. Mata kita deka nyadi enda lansik, lalu kita deka lenyau pengering. Kita deka nanam benih, tang nya lebu ngapa, laban munsuh deka makai asil utai ke ditanam kita.
17 Aku enggai nerima kita, lalu kita deka alah laban munsuh kita. Kita deka ditekan orang ke begedika kita. Kita deka ngerarika diri taja pan orang nadai begagaika kita.
18 “‘Enti semua utai nya enda ga ngasuh kita mendingka Aku, Aku deka nambahka ukum kita tujuh kali lipat ketegal dosa kita.
19 Aku deka ngasuh kita badu agi degil enggau sumbung. Aku deka ngasuh langit kita nyadi baka besi,* lalu tanah kita nyadi baka temaga.*
20 Semua pengawa kita lebu ngapa, laban tanah kita enda mansutka asil lalu pun kayu kita enda bebuah.
21 “‘Tang enti kita majak ngelaban Aku lalu enggai mendingka Aku, Aku deka ngukum kita tujuh kali lipat, nitihka pemalat dosa kita.
22 Aku deka nganjung jelu ti liar ngagai bala kita. Jelu nya deka munuh bala anak kita enggau jelu tupi kita, nyentukka semina mimit aja ari bala kita ke agi idup, lalu semua jalai ba menua kita deka nyadi sunyi.
23 “‘Enti semua utai nya enda ga ngasuh kita nerima jaku ajar ari Aku, lalu kita agi ngelaban Aku,
24 Aku mega deka ngelaban kita, lalu Aku Empu deka ngukum kita tujuh kali balat agi ketegal dosa kita.
25 Aku deka ngasuh bala munsuh nyerang kita ketegal kita enda ngamatka sempekat ke udah digaga Aku enggau kita. Nya meh chara ke deka dikena Aku ngukum kita. Lebuh kita ngerarika diri ngagai kuta-kuta kita, Aku deka ngasuh penyakit ninggang kita. Kita deka dialahka munsuh.
26 Aku deka ngasuh bekalan pemakai kita nyadi mimit, nyentukka 10 iku indu semina begunaka siti aja oven kena manggang roti. Roti nya deka ditimbang, lalu kita deka nerima roti nya mimit aja. Kita deka makai roti nya, tang kita enda kenyang.
27 “‘Enti semua utai nya enda ga ngasuh kita mendingka Aku, lalu kita agi ngelaban Aku,
28 Aku deka balat agi ngelaban kita. Aku deka nambahka ukum kita tujuh kali lipat ketegal dosa kita,
29 nyentukka kita makai bangkai anak lelaki enggau anak indu kita empu.
30 Aku deka nganchurka endur alai kita nyembah petara pelesu.* Aku deka ngeruntuhka alta endur alai kita nunu menyan, lalu nugungka bangkai kita ba atas patung-patung ti dipegedika Aku ke udah dianchurka Aku nya. Aku deka ninggalka kita, laban Aku kejika kita.
31 Aku deka nganchurka kuta-kuta enggau endur kita ti kudus. Bau ari pemeri ke diserahka kita enda agi ngelantangka ati Aku.
32 Aku deka ngasuh menua kita nyadi puang, lalu bala munsuh kita ke diau ba dia deka tekenyit meda nya.
33 Aku deka ngachirka kita ba entara bansa-bansa bukai. Aku deka ngasuh munsuh nyerang kita. Menua kita deka nyadi puang, lalu kuta-kuta kita deka anchur.
34 “‘Lebuh kita ditabanka ngagai menua munsuh, tanah kita deka ditejuka enda diintu. Tanah nya deka berehat. Lebuh tanah kita ditejuka enda diintu, nya meh maya kena mayar Taun Sabat ke enda diintu kita.
35 Seagi-agi kita diau ba menua munsuh, tanah ba menua kita deka berehat. Laban lebuh kita diau ba menua kita suba, kita enda nitihka atur Taun Sabat. Kita enda ngasuh tanah kita berehat.
36 “‘Aku deka ngasuh kita ke ditabanka ngagai menua munsuh berasai takut, nyentukka bunyi daun ke dipuputka angin pan tau ngasuh kita rari. Kita deka rari baka orang ke ngerarika diri ari perang. Lalu kita deka teterap, taja pan nadai orang begagaika kita.
37 Baka orang ke ngerarika diri ari perang, kita deka tesangkut lalu ninggang pangan diri, taja pan nadai orang begagaika kita. Kita enda ulih ngelaban munsuh kita.
38 Mayuh ari kita deka mati ba entara bansa-bansa bukai, lalu tanah ba menua munsuh kita deka nelan kita.
39 Kita ke agi idup deka merinsa ba menua munsuh ketegal penyalah kita empu enggau penyalah aki ini kita.
40 Nya baru kita deka ngaku penyalah kita empu enggau penyalah aki ini kita, ke udah ngelaban Aku lalu enda setia ngagai Aku,
41 ti ngujungka Aku enggai nerima kita lalu mai kita ngagai menua munsuh.
“‘Engka pengudah nya, kita badu agi degil lalu nyadi baruh ati. Enggau nya, kita udah mayar semua penyalah kita.
42 Aku deka ngamatka sempekat ke udah digaga Aku enggau Jakop, Isak, enggau Abraham. Aku tetap deka ingatka menua nya.
43 Lebuh menua nya ditinggalka kita, tanah ba menua nya deka ditejuka enda diintu ngambika mayar Taun Sabat ke enda diintu kita. Maya nya, kita deka mayar penyalah kita empu, laban kita udah nulak pemutus ukum ari Aku lalu enggai nitihka adat Aku.
44 Taja pia, lebuh kita agi ba menua munsuh, Aku agi ka nerima kita. Aku enggai sekali-kali ngelakka kita dipunaska ba menua munsuh, laban nya deka ngelanggar sempekat ke udah digaga Aku enggau kita. Aku tu Jehovah, Petara kita.
45 Ketegal kita, Aku deka mengkang ingatka sempekat ke udah digaga Aku enggau aki ini kita. Orang bansa bukai meda lebuh Aku mai aki ini kita pansut ari menua Ejip, kena nunjukka Aku tu Petara sida. Aku tu Jehovah.’”
46 Tu meh adat enggau pesan ke diberi Jehovah ngagai orang Israel nengah Moses ba Gunung Sinai.
Nota Kaki
^ Tauka “batuk rangkai.”
^ Iya nya, nadai ujan ari langit.
^ Iya nya, tanah deka nyadi rangkai ketegal nadai ujan.
^ Jaku Asal, “endur kita ti tinggi.”
