Adat Lewi 27:1-34
27 Ku Jehovah nampung jaku Iya enggau Moses baru:
2 “Padah ngagai orang Israel: ‘Enti siku ari kita ngaga semaya ti istimewa deka meri siku orang ngagai Aku, Jehovah, iya patut mayar penyampau rega ke udah ditetapka.
3 Enti orang nya lelaki ke beumur 20 ngagai 60 taun, rega iya 50 shekel* pirak, nitihka timbang berat ke biasa dikena ba endur ti kudus.
4 Enti orang nya indu, rega iya 30 shekel pirak.
5 Enti orang nya lelaki ke beumur 5 ngagai 20 taun, rega iya 20 shekel pirak. Lalu iya ke indu 10 shekel pirak.
6 Enti iya anak mit lelaki ke beumur sebulan ngagai lima taun, rega iya lima shekel pirak. Lalu iya ke indu tiga shekel pirak.
7 “‘Enti orang nya lelaki ke beumur 60 taun ke atas, rega iya 15 shekel pirak. Lalu iya ke indu 10 shekel pirak.
8 Tang enti orang ke ngaga semaya nya kelalu miskin, lalu iya enda ulih mayar rega ke udah ditetapka, iya patut betemu enggau imam. Imam deka nentuka rega orang ke deka diserahka, nitihka penyampau rega ke ulih dibayar orang ke ngaga semaya nya.
9 “‘Enti siku ari kita besemaya deka nyerahka jelu ti tuchi ngagai Aku, Jehovah, jelu nya deka nyadi enggi Aku, Jehovah.
10 Iya enda tau nganti tauka nukar jelu nya enggau jelu ke manah agi tauka enggau jelu ke bisi penimpang. Tang enti iya agi ka nganti jelu nya enggau jelu ke bukai, kedua-dua jelu nya deka nyadi enggi Aku.
11 Tang enti iya besemaya deka nyerahka jelu ti enda tuchi, lalu jelu nya enda sesuai nyadika pemeri ngagai Aku, Jehovah, iya patut mai jelu nya ngagai imam.
12 Imam deka netapka rega jelu nya nitihka pemanah gaya jelu nya. Rega ke ditetapka imam enda tau diubah.
13 Tang enti iya deka meli jelu nya pulai baru, iya patut mayar rega ke udah ditetapka, tambah enggau 20 peratus ari rega jelu nya.
14 “‘Enti siku ari kita besemaya deka nyerahka rumah iya nyadika pemeri ti kudus ngagai Aku, Jehovah, imam deka nentuka rega rumah nya nitihka gaya rumah nya. Nya rega ke udah ditetapka imam, nya meh rega rumah nya.
15 Tang enti iya deka meli rumah nya pulai baru, iya patut mayar rega ke udah ditetapka, tambah enggau 20 peratus ari rega rumah nya. Udah nya, rumah nya deka diempu iya baru.
16 “‘Enti siku ari kita besemaya deka nyerahka ladang iya nyadika pemeri ti kudus ngagai Aku, Jehovah, rega ladang nya deka nitihka penyampau benih ke ulih ditanam ba ladang nya. Rega satu homer* benih barli nya 50 shekel pirak.
17 Enti iya nyerahka ladang iya ba Taun Pengelepas, rega ladang ke udah ditetapka enda tau diubah.
18 Enti iya nyerahka ladang iya pengudah Taun Pengelepas, imam deka netapka rega ladang nya murah agi, nitihka penyampau taun ke agi tinggal sebedau Taun Pengelepas ke deka datai.
19 Tang enti iya deka meli ladang nya pulai baru, iya patut mayar rega ke udah ditetapka, tambah enggau 20 peratus ari rega ladang nya. Udah nya, ladang nya deka diempu iya baru.
20 Tang enti iya enda meli ladang nya pulai baru, lalu ladang nya dijual ngagai orang bukai, iya enda tau meli ladang nya baru.
21 Ba Taun Pengelepas, ladang nya deka nyadi enggi Aku, Jehovah. Ladang nya deka nyadi utai ti kudus, lalu deka diempu bala imam.
22 “‘Enti siku ari kita deka nyerahka ladang ke dibeli iya ngagai Aku, Jehovah, lalu nya ukai ladang pesaka iya,
23 imam deka nentuka rega ladang nya nitihka penyampau taun ke agi tinggal sebedau Taun Pengelepas ke deka datai. Orang nya deka mayar rega nya ba hari ti sama. Duit nya deka nyadi enggi Aku, Jehovah.
24 Ba Taun Pengelepas, ladang nya deka dipulaika baru ngagai orang ke asal ke bempu ladang nya, iya nya orang ke udah nyual ladang nya.
25 “‘Semua rega patut nitihka timbang berat ke biasa dikena ba endur ti kudus, iya nya shekel. Satu shekel sama enggau 20 gera.*
26 “‘Anak tuai jelu endang enggi Aku, Jehovah. Nya alai, nadai siku pan ari kita tau nyerahka jelu nya nyadika pemeri ngagai Aku. Enda ngira nya anak sapi tauka anak bedus, anak tuai jelu endang enggi Aku, Jehovah.
27 Taja pia, anak jelu ti enda tuchi ke dulu ada, tau ditebus nitihka rega ke udah ditetapka, tambah enggau 20 peratus ari rega jelu nya. Tang enti jelu nya enda ditebus, imam deka nyual jelu nya ngagai orang bukai nitihka rega ke udah ditetapka.
28 “‘Enti siku ari kita nyerahka orang, jelu, tauka ladang ke diempu iya ngagai Aku, Jehovah, ngambika dikena ba pengawa ti kudus, iya enda tau nyual tauka meli pulai baru utai nya. Semua utai nya utai ti pemadu kudus. Utai nya enggi Aku, Jehovah.
29 Orang ke patut diukum bunuh enda tau ditebus. Iya patut dibunuh.
30 “‘Tiap 10 peratus ari asil utai ke ditanam, enda ngira nya asil ladang tauka buah, endang enggi Aku, Jehovah. Semua utai nya kudus ba Aku, Jehovah.
31 Enti orang nya deka meli pulai baru 10 peratus nya, iya patut mayar rega ke udah ditetapka, tambah enggau 20 peratus ari rega nya.
32 Kita patut nyerahka 10 peratus ari jelu tupi kita ngagai Aku. Lebuh jelu kita mansa baruh tungkat pengibun bedus, tiap iku jelu ti ke-10 deka nyadi enggi Aku, Jehovah.
33 Pengibun bedus nya enda tau meresa sekalika jelu nya manah gaya tauka bisi penimpang, tauka nukar jelu nya enggau jelu ke bukai. Tang enti iya agi ka nukar jelu nya enggau jelu ke bukai, kedua-dua jelu nya deka nyadi enggi Aku. Jelu nya enda tau dibeli pulai baru.’”
34 Nya meh pesan ke diberi Jehovah ngagai orang Israel nengah Moses ba Gunung Sinai.
