Adat Lewi 3:1-17
3 “‘Enti siku ari bala kita deka nyerahka sapi ti lelaki tauka indu nyadika pemeri bebaik ngagai Aku, Jehovah, sapi nya enda tau bisi penimpang.
2 Iya patut ngengkahka jari iya ba atas pala sapi nya. Sapi nya patut disayat ba depan pintu penama langkau gempuru. Udah nya, bala anak lelaki Aron, ke nyadi imam, deka mechikka darah sapi nya ba empat iti tisi alta.
3 Tu sekeda begian ari pemeri bebaik ke patut ditunu lalu diserahka ngagai Aku, Jehovah: Semua lemak ti malut enggau ngelingi gelung perut,
4 kedua-dua buah pinggang enggau lemak ba buah pinggang nya, sereta lemak ba ati sapi nya.
5 Bala anak lelaki Aron deka nunu semua utai nya seretai enggau pemeri tunu, ke benung ditunu ba atas kayu ba alta, nyentukka asap niki ke atas. Bau ari pemeri ke ditunu nya deka ngelantangka ati Aku, Jehovah.
6 “‘Enti iya nyerahka bedus tauka kambin ti lelaki tauka indu nyadika pemeri bebaik ngagai Aku, Jehovah, jelu nya enda tau bisi penimpang.
7 Enti pemeri nya bedus ti lelaki ke biak, iya patut nyerahka nya ba depan Aku, Jehovah.
8 Iya patut ngengkahka jari iya ba atas pala bedus nya. Bedus nya patut disayat ba depan langkau gempuru. Udah nya, bala anak lelaki Aron deka mechikka darah bedus nya ba empat iti tisi alta.
9 Lemak ari pemeri bebaik nya patut ditunu lalu diserahka ngagai Aku, Jehovah. Tu begian ke patut diserahka: Semua lemak ba iku ke semak enggau tulang belakang bedus nya, semua lemak ti malut enggau ngelingi gelung perut,
10 kedua-dua buah pinggang enggau lemak ba buah pinggang nya, sereta lemak ba ati bedus nya.
11 Imam patut nunu semua nya ba alta nyentukka asap niki ke atas. Nya meh pemakai,* iya nya pemeri ke ditunu ngagai Aku, Jehovah.
12 “‘Enti pemeri iya nya kambin, iya patut nyerahka nya ba depan Aku, Jehovah.
13 Iya patut ngengkahka jari iya ba atas pala kambin nya. Kambin nya patut disayat ba depan langkau gempuru. Udah nya, bala anak lelaki Aron deka mechikka darah kambin nya ba empat iti tisi alta.
14 Tu sekeda begian ari pemeri bebaik ke patut ditunu lalu diserahka ngagai Aku, Jehovah: Semua lemak ti malut enggau ngelingi gelung perut,
15 kedua-dua buah pinggang enggau lemak ba buah pinggang nya, sereta lemak ba ati kambin nya.
16 Imam patut nunu semua nya ba alta nyentukka asap niki ke atas. Nya meh pemakai,* iya nya pemeri ke ditunu kena ngasilka bau ti ngelantangka ati Aku. Semua lemak enggi Aku, Jehovah.
17 “‘Tu meh adat ke patut seruran dititihka kita enggau bala peturun kita, enda ngira dini alai kita diau: Kita enda tau sekali-kali makai lemak tauka darah.’”
Nota Kaki
^ Jaku Asal, “roti.” Reti nya, ari pemeri bebaik nya, begian tu enggi Jehovah.
^ Jaku Asal, “roti.” Reti nya, ari pemeri bebaik nya, begian tu enggi Jehovah.
