Adat Lewi 4:1-35
-
Pemeri kena ngulihka pengampun dosa (1-35)
4 Ku Jehovah bejaku enggau Moses:
2 “Padah ngagai orang Israel: ‘Enti bisi siku ari kita enda sengaja ngereja utai ke ditagang Aku, Jehovah, lalu bedosa, tu utai ke patut dikereja iya:
3 “‘Enti imam besai* bedosa lalu ngujungka semua orang Israel bepenyalah, iya patut nyerahka siku sapi ti lelaki ke biak ngagai Aku, Jehovah. Sapi nya deka nyadi pemeri kena ngulihka pengampun dosa. Sapi nya enda tau bisi penimpang.
4 Iya patut mai sapi nya ngagai depan Aku, Jehovah, iya nya ba depan pintu penama langkau gempuru. Iya patut ngengkahka jari iya ba atas pala sapi nya, lalu nyayat sapi nya ba depan Aku, Jehovah.
5 Udah nya, imam besai patut ngambi sekeda ari darah sapi nya tama ngagai langkau gempuru.
6 Imam nya deka nyepuhka tunjuk jari iya ngagai darah nya, lalu mechikka darah nya tujuh kali ba depan Aku, Jehovah, iya nya ba depan kain tirai ba endur ti kudus.
7 Imam mega patut ngunsutka mimit darah ba semua tanduk alta ke dikena nunu menyan ke bebau rengut. Alta nya ba depan Aku, Jehovah, iya nya dalam langkau gempuru. Udah nya, iya patut nuangka laluh darah sapi nya ba baruh alta pemeri tunu. Alta nya ba depan pintu penama langkau gempuru.
8 “‘Imam deka ngambi semua lemak ba sapi ti lelaki nya, nyengkaum lemak ke malut sereta ngelingi gelung perut sapi nya,
9 kedua-dua buah pinggang sereta lemak ba buah pinggang nya, enggau lemak ba ati sapi nya.
10 Imam deka ngambi semua utai nya, baka ke digaga lebuh nyerahka sapi ti lelaki nyadika pemeri bebaik. Udah nya, imam deka nunu semua nya ba alta pemeri tunu nyentukka asap niki ke atas.
11 “‘Tang kulit, pala, betis, gelung perut, semua isi, enggau tai sapi nya
12 patut dibai pansut ari kem. Imam patut nunu semua nya ba atas kayu api ba endur ke udah disediaka* alai muai amau.* Utai nya patut ditunu ba endur alai muai amau.
13 “‘Enti semua orang Israel enda sengaja ngereja dosa lalu udah ditemu salah, tang sida enda sedar sida udah ngereja utai ke ditagang Aku, Jehovah,
14 lalu udah nya dosa nya ditemu, sida patut nyerahka siku sapi ti lelaki ke biak nyadika pemeri kena ngulihka pengampun dosa. Sida patut mai pemeri nya ngagai depan langkau gempuru.
15 Bala tuai orang Israel deka ngengkahka jari sida ba atas pala sapi nya ba depan Aku, Jehovah. Udah nya, sapi nya deka disayat ba depan Aku, Jehovah.
16 “‘Imam besai patut ngambi sekeda ari darah sapi nya tama ngagai langkau gempuru.
17 Imam nya deka nyepuhka tunjuk jari iya ngagai darah nya lalu mechikka darah nya tujuh kali ba depan Aku, Jehovah, iya nya ba depan kain tirai ba endur ti kudus.
18 Imam mega patut ngunsutka mimit darah ba semua tanduk alta ba depan Aku, Jehovah, iya nya dalam langkau gempuru. Udah nya, iya patut nuangka laluh darah sapi nya ba baruh alta pemeri tunu. Alta nya ba depan pintu penama langkau gempuru.
19 Iya patut ngambi semua lemak sapi nya, lalu nunu lemak nya ba alta nyentukka asap niki ke atas.
20 Chara iya nyerahka sapi nya, sama baka chara iya nyerahka sapi lebuh iya bedosa. Nya meh utai ke deka dikereja imam besai, lalu pemeri ke diserahka iya deka muai dosa semua orang Israel, lalu sida deka diampun.
21 Iya patut mai laluh tubuh sapi nya pansut ari kem lalu nunu sapi nya, sama baka chara iya ke nunu sapi ti lelaki keterubah. Nya meh pemeri kena ngulihka pengampun dosa ke semua orang Israel.
22 “‘Enti siku ari tuai orang Israel enda sengaja ngereja dosa lalu udah ditemu salah ngereja utai ke ditagang Aku, Jehovah,
23 tauka enti iya sedar iya udah ngelanggar pesan Aku, iya patut nyerahka siku kambin ti lelaki ke biak nyadika pemeri. Kambin nya enda tau bisi penimpang.
24 Iya deka ngengkahka jari iya ba atas pala kambin nya. Udah nya, kambin nya deka disayat ba endur alai nyayat jelu ke pemeri tunu, ba depan Aku, Jehovah. Nya meh pemeri kena ngulihka pengampun dosa.
25 Imam deka nyepuhka tunjuk jari iya ngagai darah kambin nya lalu ngunsutka darah nya ba semua tanduk alta pemeri tunu. Udah nya, iya patut nuangka laluh darah kambin nya ba baruh alta pemeri tunu.
26 Semua lemak kambin nya deka ditunu ba alta, sama baka chara lemak ke ditunu lebuh meri pemeri bebaik. Pemeri nya deka ditunu nyentukka asap niki ke atas. Nya meh utai ke deka dikereja imam ngambika dosa orang nya diampun.
27 “‘Enti siku ari bala kita enda sengaja ngereja dosa lalu udah ditemu salah ngereja utai ke ditagang Aku, Jehovah,
28 tauka enti iya sedar iya udah ngereja penyalah, iya patut nyerahka siku kambin ti indu ke biak nyadika pemeri. Kambin nya enda tau bisi penimpang.
29 Iya deka ngengkahka jari iya ba atas pala kambin nya. Udah nya, kambin nya deka disayat ba endur alai nyayat jelu ke pemeri tunu.
30 Imam deka nyepuhka tunjuk jari iya ngagai darah kambin nya lalu ngunsutka darah nya ba semua tanduk alta pemeri tunu. Udah nya, iya patut nuangka laluh darah kambin nya ba baruh alta nya.
31 Imam deka ngambi semua lemak kambin nya, sama baka chara iya ngambi lemak jelu ke diserah nyadika pemeri bebaik. Udah nya, lemak nya deka ditunu ba alta nyentukka asap niki ke atas. Bau ari pemeri nya deka ngelantangka ati Aku, Jehovah. Nya meh utai ke deka dikereja imam ngambika dosa orang nya diampun.
32 “‘Enti iya nyerahka siku bedus nyadika pemeri kena ngulihka pengampun dosa, iya patut nyerahka bedus ti indu ke biak ti nadai penimpang.
33 Iya deka ngengkahka jari iya ba atas pala bedus nya. Udah nya, bedus nya deka disayat ba endur alai nyayat jelu ke pemeri tunu.
34 Imam deka nyepuhka tunjuk jari iya ngagai darah bedus nya lalu ngunsutka darah nya ba semua tanduk alta pemeri tunu. Udah nya, iya deka nuang laluh darah bedus nya ba baruh alta nya.
35 Imam deka ngambi semua lemak bedus nya, sama baka chara iya ngambi lemak bedus ti lelaki ke biak ke diserah nyadika pemeri bebaik. Udah nya, lemak nya deka ditunu ba alta nyentukka asap niki ke atas. Lemak nya deka ditunu begulai enggau pemeri bukai ke ditunu ngagai Aku, Jehovah. Nya meh utai ke deka dikereja imam ngambika dosa orang nya diampun.
Nota Kaki
^ Jaku Asal, “imam ke ditata.”
^ Jaku Asal, “endur ke beresi.”
^ Iya nya, amau ke bechampur enggau lemak jelu korban ke ditunu.
