Adat Lewi 5:1-19
5 “‘Enti siku ari bala kita udah meda tauka nemu pasal penyalah ke digaga orang bukai, iya dikumbai saksi. Enti iya ninga jaku gerah* ke minta saksi datai madahka penyalah orang nya, lalu iya enggai madahka utai nya, iya udah bedosa lalu betanggungjawapka pengawa iya.
2 “‘Tauka enti siku ari bala kita negu utai ti enda tuchi, baka bangkai jelu ti haram, enda ngira jelu nya jelu ti liar, jelu tupi, tauka utai idup ti mit,* iya deka nyadi enda tuchi lalu bepenyalah, taja pan iya enda sedarka pengawa iya.
3 Tauka enti iya enda sengaja negu utai ti ngasuh iya enda tuchi, enda ngira nya datai ari mensia tauka utai bukai ke ngasuh iya enda tuchi, lalu udah nya iya sedarka utai nya, iya udah ngereja penyalah.
4 “‘Tauka enti iya beguai-guai ngaga sumpah deka ngereja sesiti utai, enda ngira utai nya manah tauka jai, lalu iya sedar iya enda ulih ngereja utai ke disebut iya, iya udah ngereja penyalah.
5 “‘Enti siku ari bala kita udah ngereja siti ari utai ti salah ke disebut tadi, iya patut ngaku dosa diri.
6 Iya patut nyerahka pemeri ganti rugi ngagai Aku, Jehovah, iya nya siku bedus ti indu ke biak tauka siku kambin ti indu ke biak, nyadika pemeri kena ngulihka pengampun dosa. Udah nya, imam deka nyerahka pemeri nya kena minta pengampun dosa ke orang nya.
7 “‘Tang enti iya enda mampu deka nyerahka siku bedus, iya patut nyerah ngagai Aku, Jehovah, dua iku burung kukur tauka dua iku burung achang ti biak nyadika pemeri ganti rugi. Siku burung nyadika pemeri kena ngulihka pengampun dosa, lalu siku da agi nyadika pemeri tunu.
8 Iya deka mai dua iku burung nya ngagai imam. Imam deka nyerahka siku ari burung nya nyadika pemeri kena ngulihka pengampun dosa. Imam deka ngetil rekung burung nya, tang pala burung nya enda tau putus ari tubuh iya.
9 Udah nya, iya deka mechikka sekeda ari darah burung nya ba tisi alta. Tang laluh darah burung nya deka ditejuka neritik ba baruh alta. Nya meh pemeri kena ngulihka pengampun dosa.
10 Burung ke siku da agi deka diserah nyadika pemeri tunu. Imam deka nyediaka pemeri nya baka selama, baka ke suah digaga iya lebuh nyerahka pemeri tunu. Udah nya, imam deka nyerahka pemeri nya kena minta pengampun dosa ke orang nya. Lalu Aku deka ngampunka orang nya.
11 “‘Enti iya enda mampu nyerahka dua iku burung kukur tauka dua iku burung achang ti biak, iya patut nyerahka satu kilogram* tepung ti pemadu alus nyadika pemeri kena ngulihka pengampun dosa. Tepung nya enda tau dichampur enggau minyak tauka menyan putih, laban nya pemeri kena ngulihka pengampun dosa.
12 Iya deka mai pemeri nya ngagai imam. Imam deka ngambi segenggam tepung ti alus nya lalu nunu nya ba alta nyentukka asap niki ke atas. Tepung nya deka ditunu begulai enggau pemeri bukai ke ditunu ngagai Aku, Jehovah. Iya ngereja nya kena nandaka* semua pemeri nya udah diserahka ngagai Aku. Nya meh pemeri kena ngulihka pengampun dosa.
13 Udah nya, imam deka nyerahka pemeri nya kena minta pengampun dosa ke orang nya, laban iya udah ngereja siti ari dosa ke udah disebut tadi. Lalu Aku deka ngampunka orang nya. Laluh ari pemeri nya deka diempu imam, sama baka pemeri bijirin.’”
14 Ku Jehovah madah ngagai Moses baru:
15 “Enti siku ari bala kita enda setia laban iya enda sengaja ngelanggar adat bekaul enggau utai ti kudus ke enggi Aku, Jehovah, iya patut nyerahka siku bedus ti lelaki ke nadai penimpang ngagai Aku, Jehovah, nyadika pemeri ganti rugi. Imam deka nentuka berapa shekel* rega bedus nya nitihka sukatan pemerat shekel ba endur ti kudus.
16 Ketegal iya udah bedosa ngereja penyalah bekaul enggau utai ti kudus, iya patut mayar ganti rugi. Iya mega patut nambah 20 peratus ari rega utai nya, lalu meri semua nya ngagai imam. Udah nya, imam deka nyerahka bedus ti lelaki nyadika pemeri ganti rugi kena minta pengampun dosa ke orang nya. Lalu Aku deka ngampunka orang nya.
17 “Enti siku ari bala kita bedosa ngereja utai ke ditagang Aku, Jehovah, iya tetap dikumbai ngereja penyalah taja pan iya enda sedarka pengawa iya. Iya patut betanggungjawapka pengawa iya.
18 Iya patut mai siku bedus ti lelaki ke nadai penimpang ngagai imam nyadika pemeri ganti rugi. Rega bedus nya patut sama enggau rega ke udah ditetapka imam. Udah nya, imam deka nyerahka pemeri nya kena minta pengampun dosa ke orang nya. Enggau nya, Aku deka ngampunka dosa iya ke dikereja enggau enda sedar sereta enda sengaja.
19 Nya meh pemeri ganti rugi. Orang nya udah ngereja penyalah laban iya udah bedosa ngagai Aku, Jehovah.”
Nota Kaki
^ Jaku Asal, “sumpah ke disebut ba mua orang mayuh.” Jaku sumpah tu engka disebut maya jaku gerah nya digaga. Jaku sumpah tu ditujuka ngagai sida ke udah ngereja dosa tauka ngagai sida ke nyadi saksi tang enggai datai nerangka utai nya.
^ Tu merujuk ngagai utai idup ti mit ke diau beraban.
^ Jaku Asal, “satu persepuluh efah.” Peda Rujukan B14.
^ Tauka “kena ngingat.”
^ Peda Rujukan B14.
