Adat Lewi 6:1-30
6 Ku Jehovah bejaku ngagai Moses:
2 “Tu utai ke patut digaga siku ari bala kita ke bedosa lalu enda setia ngagai Aku, Jehovah, laban iya nipu orang bukai ke ngasuh iya nyaga barang sida, tauka ngenchuri barang sida, tauka enda jujur enggau sida,
3 tauka iya tetemuka barang ke lenyau tang iya bula pasal nya, lalu iya besumpah pelesu madahka diri nadai ngereja utai ke disebut tadi:
4 Enti iya udah ngereja utai ke disebut tadi lalu ditemu salah, iya patut mulaika barang ke dichuri iya, barang ke dirampas iya, barang ke diambi iya enggau enda jujur, barang ke diasuh jaga iya, barang ke lenyau ti ditemu iya,
5 tauka sebarang utai ke diulih iya ngena sumpah pelesu. Iya patut mayar ganti rugi enggau rega ti penuh, tambah 20 peratus ari rega nya. Iya patut mayar ganti rugi nya ngagai orang ke bempu barang nya ba hari iya ditemu salah.
6 Iya mega patut mai siku bedus ti lelaki ke nadai penimpang ngagai imam nyadika pemeri ganti rugi ngagai Aku, Jehovah. Rega bedus ke diserahka nya patut sama enggau rega ti udah ditetapka imam.
7 Udah nya, imam deka nyerahka pemeri nya ngagai Aku, Jehovah, kena minta pengampun dosa ke orang nya. Enggau nya, dosa orang nya deka diampun.”
8 Ku Jehovah agi:
9 “Padah ngagai Aron enggau bala anak lelaki iya: ‘Tu adat pasal pemeri tunu: Pemeri tunu patut ditejuka ba atas api ba alta ari malam sampai pagi. Api ba alta nya enda tau padam.
10 Imam patut ngena baju jubah rasmi enggau seluar pandak* ke digaga ari kain linin. Udah nya, imam deka mindahka amau* ari pemeri tunu nya ngagai tisi alta.
11 Udah nya, iya patut nukar gari iya lalu mai amau nya pansut ari kem, ngagai endur ke udah disediaka* alai muai amau.
12 Api ba atas alta nya patut seruran idup. Api nya enda tau padam. Tiap pagi, imam ngengkahka kayu api ba alta nya lalu nusun pemeri tunu ba atas api nya. Imam deka nunu semua lemak ari pemeri bebaik nya nyentukka asap niki ke atas.
13 Api ba atas alta nya patut seruran idup. Api nya enda tau padam.
14 “‘Tu adat pasal pemeri bijirin: Bala anak lelaki Aron patut nyerahka pemeri nya ngagai Aku, Jehovah, ba depan alta.
15 Siku ari sida deka ngambi segenggam tepung ti alus ari pemeri bijirin nya, ke udah dituang minyak sereta ditaburka enggau menyan putih. Iya deka nunu semua pemeri nya ba atas alta nyentukka asap niki ke atas. Iya ngereja nya kena nandaka* semua pemeri nya udah diserahka ngagai Aku. Bau ari pemeri nya deka ngelantangka ati Aku, Jehovah.
16 Aron enggau bala anak lelaki iya deka makai laluh ari pemeri nya. Sida deka ngena tepung nya ngaga roti ti enda beragi, lalu makai roti nya ba endur ti kudus, iya nya ba laman langkau gempuru.
17 Roti nya enda tau dichampur enggau ragi. Ari pemeri ke diserahka ngagai Aku, nya begian ke diberi Aku ngagai sida. Pemeri bijirin nya pemeri ti pemadu kudus, sama baka pemeri kena ngulihka pengampun dosa enggau pemeri ganti rugi.
18 Tiap iku anak lelaki ari peturun Aron deka makai begian nya, ke diambi ari pemeri ke ditunu ke Aku, Jehovah. Begian nya deka seruran diempu sida ari generasi ke generasi.* Semua utai ke dikena nyerahka pemeri nya deka dikumbai kudus.’”
19 Ku Jehovah agi:
20 “Ba hari Aron ditata nyadi imam besai, iya enggau bala anak lelaki iya patut nyerahka pemeri bijirin ngagai Aku, Jehovah. Sida patut seruran nyerahka satu kilogram* tepung ti alus nyadika pemeri bijirin. Setengah ari pemeri nya deka diserahka maya pagi hari, lalu setengah da agi deka diserahka maya lemai hari.
21 Tepung nya dichampur enggau minyak lalu dipanggang ba atas kali ti rata. Pengudah roti nya bechampur enggau minyak, roti nya patut dipechah-pechah lalu diserahka nyadi pemeri bijirin ngagai Aku. Bau ari pemeri nya deka ngelantangka ati Aku, Jehovah.
22 Nya meh utai ke patut digaga tiap iku peturun Aron ke ditata nyadi imam besai. Tu atur ti patut seruran dititihka sida: Semua pemeri bijirin patut ditunu ke Aku, Jehovah, ba alta nyentukka asap niki ke atas.
23 Tiap iti pemeri bijirin ke diserahka bala imam mesti ditunu abis. Pemeri nya enda tau diempa.”
24 Ku Jehovah agi:
25 “Padah ngagai Aron enggau bala anak lelaki iya: ‘Tu adat pasal pemeri kena ngulihka pengampun dosa: Jelu ke diserahka nyadi pemeri kena ngulihka pengampun dosa patut disayat ba depan Aku, Jehovah, sama ba endur alai jelu ke pemeri tunu disayat. Pemeri nya utai ti pemadu kudus.
26 Imam ke nyerahka pemeri nya patut makai pemeri nya ba endur ti kudus, iya nya ba laman langkau gempuru.
27 “‘Semua utai ke negu pemeri nya deka dikumbai kudus. Enti gari bisi kena pechik darah jelu nya, gari nya mesti dibasu ba siti endur ti kudus.
28 Periuk tanah ti udah dikena ngerebus dagin nya mesti dipechahka. Enti dagin nya direbus ngena periuk temaga, periuk nya mesti diberus lalu dibasu enggau ai.
29 “‘Semua lelaki ke gawa nyadi imam deka makai pemeri nya. Pemeri nya utai ti pemadu kudus.
30 Tang pemeri nya enda tau diempa enti sekeda ari darah iya dibai ngagai langkau gempuru, lalu dikena ngulihka pengampun dosa ba endur ti kudus. Pemeri nya patut ditunu.
Nota Kaki
^ Tauka “tanchut dalam.”
^ Iya nya, amau ke bechampur enggau lemak jelu korban ke ditunu.
^ Jaku Asal, “endur ke beresi.”
^ Tauka “kena ngingat.”
^ Tauka “ari rebak ke rebak.”
^ Jaku Asal, “satu persepuluh efah.” Peda Rujukan B14.
