Adat Lewi 7:1-38
7 “‘Tu adat pasal pemeri ganti rugi: Pemeri tu utai ti pemadu kudus.
2 Jelu ke diserahka nyadi pemeri ganti rugi deka disayat ba endur alai nyayat jelu ke pemeri tunu. Udah nya, darah jelu nya deka dipechikka ba empat iti tisi alta.
3 Semua lemak jelu nya patut diserahka, nyengkaum lemak ba iku, lemak ke malut gelung perut,
4 kedua-dua buah pinggang enggau lemak ba buah pinggang nya, sereta lemak ba ati jelu nya.
5 Imam patut nunu semua nya ba alta nyadika pemeri ngagai Aku, Jehovah, nyentukka asap niki ke atas. Nya meh pemeri ganti rugi.
6 Semua lelaki ke gawa nyadi imam deka makai pemeri nya ba endur ti kudus. Pemeri nya utai ti pemadu kudus.
7 Adat pasal pemeri kena ngulihka pengampun dosa enggau adat pasal pemeri ganti rugi nya sama, iya nya imam ke nyerahka pemeri nya kena ngulihka pengampun dosa deka ngempu dagin nya.
8 “‘Lebuh imam nyerahka pemeri tunu ke sesiku orang, kulit jelu ari pemeri tunu nya deka diempu imam.
9 “‘Semua pemeri bijirin ke dipanggang ba oven, tauka ba kali ti rata, tauka dipanduk ba periuk, deka diempu imam ke nyerahka pemeri nya.
10 Tang semua pemeri bijirin ke dichampur enggau minyak tauka pemeri bijirin ke enda dichampur enggau minyak, deka diempu bala anak lelaki Aron. Semua sida deka nerima penyampau ti sama.
11 “‘Tu adat pasal pemeri bebaik ke diserahka ngagai Aku, Jehovah:
12 Enti siku ari bala kita nyerahka pemeri bebaik ketegal deka meri terima kasih ngagai Aku, pemeri nya patut diserahka seretai enggau roti ti segala ke baka gelang ti dichampur enggau minyak sereta roti nipis ti disapu enggau minyak. Roti nya enda tau dichampur enggau ragi. Iya mega patut nyerahka roti ti segala ke baka gelang ke digaga ari tepung ti alus sereta dichampur enggau minyak.
13 Nambahka nya, iya mega patut nyerahka roti ti segala ke baka gelang ti dichampur enggau ragi seretai enggau pemeri bebaik kena meri terima kasih ngagai Aku.
14 Siti ari tiap jenis roti nya deka diserahka ngagai Aku, Jehovah, nyadika begian ti kudus. Roti nya deka diempu imam ke mechikka darah jelu ke diserahka nyadi pemeri bebaik.
15 Dagin jelu ke diserahka nyadi pemeri bebaik kena meri terima kasih ngagai Aku patut diempa ba hari jelu nya diserahka. Dagin jelu nya enda tau digalau nyentukka pagi hari siti.
16 “‘Enti siku ari bala kita deka nyerahka pemeri bebaik ketegal iya udah besemaya ngagai Aku, tauka ketegal iya deka meri pemeri enggau sukarela, pemeri nya patut diempa ba hari iya nyerahka pemeri nya. Laluh ari pemeri nya tau mega diempa ba hari siti.
17 Tang enti laluh dagin nya agi bisi nyentukka hari ketiga, dagin nya mesti ditunu abis.
18 Tang enti bisi sapa-sapa makai pemeri nya ba hari ti ketiga, orang ke nyerahka pemeri nya enda diterima Aku. Pemeri iya dikinsil laban Aku ngumbai pemeri iya enda tuchi agi. Orang ke makai pemeri nya deka betanggungjawapka pengawa iya empu.
19 Anang makai dagin ke udah negu utai ke enda tuchi. Dagin nya mesti ditunu abis. Tang, semua orang ke tuchi tau makai dagin ke tuchi.
20 “‘Enti bisi siku ari bala kita ke enda tuchi makai dagin ari pemeri bebaik ke diserahka ngagai Aku, Jehovah, iya mesti diukum bunuh.
21 Enti siku ari bala kita negu utai ke enda tuchi, enda ngira nya datai ari mensia, jelu, tauka utai bukai ke ngasuh iya enda tuchi, lalu makai dagin ari pemeri bebaik ke diserahka ngagai Aku, Jehovah, iya mesti diukum bunuh.’”
22 Ku Jehovah bejaku baru enggau Moses:
23 “Padah ngagai orang Israel: ‘Kita enda tau makai lemak ari sapi, bedus, tauka kambin.
24 Lemak ari jelu ke ditemu mati tauka jelu ke mati ketegal dibunuh jelu bukai enda tau diempa. Tang lemak nya tau dikena ngereja utai bukai.
25 Barang sapa ke makai lemak ari jelu ke diserahka nyadi pemeri ke ditunu ngagai Aku, Jehovah, iya mesti diukum bunuh.
26 “‘Enda ngira dini alai kita diau, kita enda tau makai darah, sekalika nya darah burung tauka darah jelu bukai.
27 Barang sapa ke makai darah, iya mesti diukum bunuh.’”
28 Ku Jehovah agi:
29 “Padah ngagai orang Israel: ‘Barang sapa ke nyerahka pemeri bebaik ngagai Aku, Jehovah, patut meri sebegian ari pemeri nya ngagai Aku, Jehovah.
30 Orang nya empu patut nyerahka lemak enggau dada jelu nya nyadika pemeri ke ditunu ngagai Aku, Jehovah. Udah nya, iya patut ngayunka dada jelu nya ke depan enggau ke belakang nyadika pemeri* ngagai Aku, Jehovah.
31 Imam deka nunu lemak jelu nya ba alta nyentukka asap niki ke atas. Tang dada jelu nya deka diempu Aron enggau bala anak lelaki iya.
32 “‘Ari pemeri bebaik nya, beri kaki kanan jelu nya ngagai imam nyadika begian ti kudus.
33 Kaki kanan jelu nya deka diempu anak lelaki Aron ke nyerahka darah enggau lemak pemeri bebaik nya.
34 Ari pemeri bebaik ke diserahka orang Israel, Aku udah meri kaki kanan jelu nya, iya nya begian ti kudus, ngagai Aron enggau bala anak lelaki iya ke nyadi imam. Aku mega meri dada jelu ke diayun nya ngagai sida. Adat tu patut seruran dititihka orang Israel.
35 “‘Nya meh ungkup ke diberi ngagai Aron enggau bala anak lelaki iya, kenyau ari sida dipilih nyadi imam ke Aku, Jehovah. Ungkup nya diambi ari pemeri ke ditunu ti diserahka ngagai Aku, Jehovah.
36 Ba hari Aku, Jehovah, milih sida nyadi imam, Iya ngasuh orang Israel meri ungkup nya ngagai bala imam. Adat tu patut seruran dititihka orang Israel enggau bala peturun sida.’”
37 Nya meh adat bekaul enggau pemeri tunu, pemeri bijirin, pemeri kena ngulihka pengampun dosa, pemeri ganti rugi, pemeri kena ngelantik imam, enggau pemeri bebaik.
38 Jehovah meri semua adat tu ngagai Moses ba Gunung Sinai, iya nya ba hari orang Israel diasuh nyerahka pemeri ngagai Jehovah ba menua puang Sinai.
Nota Kaki
^ Jaku Asal, “pemeri ke diayun.”
