Adat Lewi 8:1-36
-
Pengawa ngelantik peturun Aron nyadi imam (1-36)
8 Ku Jehovah bejaku baru enggau Moses:
2 “Bai Aron enggau bala anak lelaki iya, gari rasmi sida, minyak ti kudus,* sapi ti lelaki ke diserahka nyadi pemeri kena ngulihka pengampun dosa, dua iku bedus ti lelaki, enggau bakul ke bisi roti ti enda beragi,
3 lalu asuh semua orang Israel begumpul ba pintu penama langkau gempuru.”
4 Moses ngereja utai ke diasuh Jehovah. Semua orang Israel lalu begumpul ba depan pintu penama langkau gempuru.
5 Ku Moses bejaku enggau orang Israel: “Tu utai ke diasuh Jehovah kereja kitai.”
6 Moses lalu mai Aron enggau bala anak lelaki iya datai semak. Udah nya, iya masu sida enggau ai.*
7 Pengudah nya, Moses ngerasukka semua utai tu ba Aron: Baju jubah, tali pinggang jubah, baju jubah ke enda belengan, enggau epod. Udah nya, Moses nanchang rat tali pinggang epod ke ditenun ba Aron.
8 Moses mega ngerasukka penutup dada ba Aron. Iya nyimpan Urim enggau Tumim* ba penutup dada nya.
9 Udah nya, Moses ngengkahka serban ba pala Aron. Ba depan serban nya, Moses ngelekatka keping emas ti bekilat, iya nya tanda kudus ti nunjukka Aron diserahka ngagai Petara. Moses ngereja semua nya baka ke diasuh Jehovah.
10 Udah nya, Moses ngambi minyak ti kudus lalu ngunsut minyak nya ba Langkau Sembiang sereta ba semua utai ke dalam langkau nya. Iya ngereja nya ngambika semua utai nya nyadi tuchi.
11 Udah nya, iya ngambi sekeda ari minyak nya lalu mechikka minyak nya tujuh kali ba alta, ba semua pekekas alta, sereta ba bisin enggau kaki iya ngambika semua utai nya nyadi tuchi.
12 Kepenudi iya, Moses nuang sekeda ari minyak ti kudus ba pala Aron. Iya ngereja nya kena ngelantik Aron lalu nyerahka iya ngereja pengawa ti tuchi.
13 Moses mai bala anak lelaki Aron datai semak, lalu ngerasukka semua utai tu ba sida: Baju jubah, tali pinggang jubah, enggau penutup pala. Moses ngereja semua nya baka ke diasuh Jehovah.
14 Udah nya, Moses mai sapi ti lelaki nyadika pemeri kena ngulihka pengampun dosa. Aron enggau bala anak lelaki iya lalu ngengkahka jari sida ba atas pala sapi nya.
15 Moses lalu nyayat sapi nya. Udah nya, iya nyepuhka tunjuk jari iya ngagai darah sapi nya lalu ngunsutka darah nya ba tanduk ke ba empat iti tisi alta ngambika alta nya nyadi tuchi. Laluh darah sapi nya dituang ngagai baruh alta. Enggau nya, alta nya nyadi tuchi, lalu tau dikena nunu pemeri kena minta pengampun dosa.
16 Udah nya, iya ngambi semua lemak ba gelung perut sapi nya, lemak ba ati sapi nya, kedua-dua buah pinggang enggau lemak ba buah pinggang nya, lalu nunu semua utai nya ba alta nyentukka asap niki ke atas.
17 Udah nya, bangkai sapi nya, nyengkaum kulit, isi, enggau tai iya ditunu ba luar kem. Moses ngereja semua nya baka ke diasuh Jehovah.
18 Moses lalu mai siku bedus ti lelaki nyadika pemeri tunu. Aron enggau bala anak lelaki iya ngengkahka jari sida ba pala bedus nya.
19 Moses nyayat bedus nya, lalu mechikka darah jelu nya ba empat iti tisi alta.
20 Iya netak bedus nya nyadi beberapa iti begian. Udah nya, iya nunu pala, begian ke udah ditetak, enggau lemak* jelu nya nyentukka asap niki ke atas.
21 Gelung perut enggau betis bedus nya patut dibasu ngena ai. Udah nya, Moses deka nunu semua begian nya ba alta nyentukka asap niki ke atas. Nya meh pemeri tunu ke diserahka ngagai Jehovah. Bau ari pemeri nya deka ngelantangka ati Iya. Moses ngereja semua nya baka ke diasuh Jehovah.
22 Udah nya, Moses mai bedus ti lelaki ti kedua nyadika pemeri kena ngelantik imam. Aron enggau bala anak lelaki iya ngengkahka jari sida ba pala bedus nya.
23 Moses nyayat bedus nya, lalu ngunsut sekeda ari darah bedus nya ba cuping pending kanan, ba tunjuk indu jari kanan, enggau ba tunjuk indu kaki kanan Aron.
24 Udah nya, Moses mai bala anak lelaki Aron ke depan, lalu ngunsut sekeda ari darah nya ba cuping pending kanan sida, ba tunjuk indu jari kanan, enggau ba tunjuk indu kaki kanan sida. Tang laluh darah bedus nya dipechikka Moses ba empat iti tisi alta.
25 Udah nya, iya ngambi lemak, lemak ba iku, semua lemak ba gelung perut, lemak ba ati bedus nya, kedua-dua buah pinggang enggau lemak ba buah pinggang nya, sereta kaki kanan bedus nya.
26 Ari bakul roti ti enda beragi, ke diengkah ba depan Jehovah, iya ngambi siti tuku roti ti enda beragi ke segala baka gelang, siti tuku roti ke dichampur enggau minyak ke segala baka gelang, enggau siti roti nipis. Udah nya, iya ngengkahka semua roti nya ba atas lemak enggau kaki kanan bedus nya.
27 Iya ngengkahka semua nya ba tapa jari Aron enggau ba tapa jari bala anak lelaki Aron, lalu sida ngayunka semua nya ke depan enggau ke belakang nyadika pemeri* ngagai Jehovah.
28 Udah nya, Moses ngambi semua utai nya ari sida, lalu nunu semua nya ba alta nyentukka asap niki ke atas. Semua utai nya ditunu begulai enggau pemeri tunu. Nya meh pemeri kena ngelantik imam. Pemeri nya ditunu lalu diserahka ngagai Jehovah. Bau ari pemeri nya deka ngelantangka ati Iya.
29 Moses mega ngambi begian dada bedus nya, lalu ngayunka begian nya ke depan enggau ke belakang nyadika pemeri ngagai Jehovah. Ari pemeri kena ngelantik imam, nya meh begian ke diempu Moses. Moses ngereja semua nya baka ke diasuh Jehovah.
30 Moses ngambi sekeda ari minyak ti kudus enggau sekeda ari darah bedus ke ba alta, lalu mechikka semua nya ba Aron enggau ba gari iya. Moses mega mechikka semua nya ba bala anak lelaki Aron enggau ba gari sida. Enggau nya, Aron, bala anak lelaki iya, sereta gari sida nyadi tuchi.
31 Ku Moses bejaku enggau Aron sereta bala anak lelaki Aron: “Rebus dagin bedus nya ba pintu penama langkau gempuru. Kita patut makai dagin nya ba dia seretai enggau roti ke bisi ba dalam bakul, ke dikena maya ngelantik imam. Baka ke diasuh Petara: ‘Aron enggau bala anak lelaki iya deka makai semua nya.’
32 Laluh ari dagin enggau roti nya patut ditunu abis.
33 Kita enda tau jauh ari pintu penama langkau gempuru pengelama tujuh hari, nyentukka pengawa ngelantik kita nyadi imam udah tembu. Tu ketegal pengawa ngelantik kita nyadi imam patut dipejalaika pengelama tujuh hari.
34 Pengawa ke digaga kitai seharitu endang sigi diasuh Jehovah. Tuju iya kena ngulihka pengampun dosa ke kita.
35 Kita mesti ba pintu penama langkau gempuru siang enggau malam pengelama tujuh hari, ngambika kita ulih bejalaika utai ke diasuh Jehovah. Enti enda, kita deka mati. Nya meh utai ke udah dipadah ngagai aku.”
36 Aron enggau bala anak lelaki iya ngereja semua utai ke dipadah Jehovah nengah Moses.
Nota Kaki
^ Peda nota kaki ba Pemansut 25:6.
^ Engka Moses ngasuh sida masu diri empu.
^ Peda Penerang Leka Jaku.
^ Tauka “lemak ke bisi ngelingi buah pinggang.”
^ Jaku Asal, “pemeri ke diayun.”
