Adat Lewi 9:1-24
-
Aron nyerahka pemeri (1-24)
9 Ba hari kelapan, Moses ngangauka Aron enggau bala anak lelaki iya, sereta bala tuai orang Israel.
2 Ku iya bejaku enggau Aron: “Bai siku anak sapi nyadika pemeri kena ngulihka pengampun dosa enggau siku bedus ti lelaki nyadika pemeri tunu, lalu serahka jelu nya ngagai Jehovah. Jelu nya enda tau bisi penimpang.
3 Padah ngagai orang Israel: ‘Bai siku kambin ti lelaki nyadika pemeri kena ngulihka pengampun dosa. Bai mega siku anak sapi enggau siku bedus lelaki ti biak nyadika pemeri tunu. Tiap iku jelu nya patut beumur setaun, lalu enda tau bisi penimpang.
4 Kita mega patut mai siku sapi ti lelaki enggau siku bedus ti lelaki nyadika pemeri bebaik sereta mai pemeri bijirin ke udah dichampur enggau minyak. Serahka semua nya ngagai Jehovah laban Jehovah deka ngayanka Diri ngagai kita seharitu.’”
5 Nya alai, sida mai semua utai ke dipinta Moses ngagai depan langkau gempuru. Udah nya, semua orang Israel mansang lalu bediri ba depan Jehovah.
6 Ku Moses bejaku: “Tu utai ke diasuh Jehovah kereja kita, ngambika Jehovah ulih mandangka mulia Iya ngagai kita.”
7 Udah nya, Moses bejaku enggau Aron: “Alai nuan mansang ngagai alta, lalu serahka pemeri kena ngulihka pengampun dosa enggau pemeri tunu. Kereja nya lalu pinta pengampun dosa ke nuan enggau ruang bilik* nuan. Serahka mega pemeri ke dibai orang Israel, lalu pinta pengampun dosa ke sida, baka ke udah diasuh Jehovah.”
8 Aron pan mansang ngagai alta, lalu nyayat anak sapi nyadika pemeri kena ngulihka pengampun dosa ke iya empu.
9 Udah nya, bala anak lelaki iya mai darah sapi nya ngagai iya. Aron nyepuhka tunjuk jari iya ngagai darah nya lalu ngunsutka darah nya ba semua tanduk alta. Laluh ari darah nya dituangka iya ba baruh alta.
10 Ari pemeri nya, iya ngambi lemak, buah pinggang, enggau lemak ba ati sapi nya, lalu nunu semua nya ba alta nyentukka asap niki ke atas. Iya ngereja nya nitihka utai ke dipadah Jehovah ngagai Moses.
11 Tang, iya nunu abis isi enggau kulit sapi nya ba luar kem.
12 Udah nya, Aron nyayat bedus ti lelaki nyadika pemeri tunu. Bala anak lelaki iya meri darah jelu nya ngagai iya lalu iya mechikka darah nya ba empat iti tisi alta.
13 Sida mega meri pala enggau begian bukai jelu nya ngagai iya lalu iya nunu semua nya ba alta nyentukka asap niki ke atas.
14 Udah nya, iya masu gelung perut enggau betis jelu nya lalu nunu semua nya begulai enggau pemeri tunu. Iya nunu semua nya ba alta nyentukka asap niki ke atas.
15 Udah nya, iya nyerahka pemeri ke dibai orang Israel. Iya ngambi kambin lalu nyayat jelu nya. Iya nyerahka jelu nya nyadika pemeri kena ngulihka pengampun dosa ke orang Israel. Chara iya nyerahka jelu nya sama baka chara iya nyerahka pemeri kena ngulihka pengampun dosa ti keterubah.
16 Iya mega nyerahka pemeri tunu nitihka atur ti udah ditetapka.
17 Kelimpah ari nyerahka pemeri tunu ke diberi maya pagi hari, Aron mega nyerahka pemeri bijirin. Iya ngambi segenggam ari pemeri nya lalu nunu nya ba alta nyentukka asap niki ke atas.
18 Udah nya, Aron nyayat sapi ti lelaki enggau bedus ti lelaki nyadika pemeri bebaik ke orang Israel. Bala anak lelaki iya meri darah jelu nya ngagai iya lalu iya mechikka darah nya ba empat iti tisi alta.
19 Lemak sapi nya, lemak ba iku bedus nya, semua lemak ke malut gelung perut, buah pinggang, enggau lemak ba ati jelu nya,
20 diengkahka sida ba atas dada kedua-dua jelu nya. Udah nya, Aron ngambi lemak nya lalu nunu lemak nya ba alta nyentukka asap niki ke atas.
21 Tang dada enggau kaki kanan jelu nya diayunka Aron ke depan enggau ke belakang nyadika pemeri* ngagai Jehovah, baka ke dipadah Moses.
22 Udah nya, Aron ngangkatka kedua-dua jari iya ngagai orang Israel lalu merekatka sida. Iya nurun ari alta nya pengudah iya nyerahka pemeri kena ngulihka pengampun dosa, pemeri tunu, enggau pemeri bebaik.
23 Udah nya, Moses enggau Aron tama ngagai langkau gempuru. Pengudah seduai iya pansut ari langkau nya, seduai iya merekatka orang Israel.
Maya nya, Jehovah mandangka mulia Iya ngagai orang Israel.
24 Jehovah ngenataika api lalu api nya nunu pemeri tunu enggau semua lemak ba alta. Lebuh orang Israel meda nya, sida manjung gaga ati lalu besugang.
