Daniel 1:1-21
1 Ba taun ti ketiga raja Judah ke benama Jehoyakim merintah, raja Babilon ke benama Nebukadnesar datai ngagai Jerusalem lalu ngepung kuta nya.
2 Jehovah nyerahka Jehoyakim, iya nya raja Judah, enggau sekeda pekekas Rumah* Petara ti bendar ngagai Raja Nebukadnesar. Raja Nebukadnesar mai semua pekekas nya ngagai kuil petara iya ba Shinar,* lalu nyimpan nya ba endur alai nyimpan reta petara iya.
3 Udah nya, raja ngasuh Aspenas, iya nya tuai pegawai istana iya, mai sekeda orang Israel ngagai iya. Sida tu nyengkaum orang ke datai ari ruang bilik diraja enggau peturun orang ke tinggi pangkat.
4 Sida mesti orang ke biak, nadai penimpang, sereta manah gamal. Sida mesti orang ke pintar, bisi penemu, ulih meretika utai enggau dalam, sereta tau dikearapka gawa ba istana. Aspenas patut ngajar sida bansa jaku enggau tulisan orang Kaldea.
5 Raja mega netapka sida patut diberi pemakai ti nyamai enggau wain, sama baka ke disedia ngagai iya. Pemakai enggau wain nya patut diberi ngagai sida ninting hari. Sida deka dilatih* pengelama tiga taun. Udah nya, baru sida ulih berengkah gawa ke raja.
6 Sekeda ari sida datai ari raban bansa Judah, iya nya Daniel,* Hananiah,* Misael,* enggau Asariah.*
7 Tuai pegawai istana meri sida nama* baru. Daniel diberi iya nama Beltesasar, Hananiah diberi nama Sadrak, Misael diberi nama Mesak, lalu Asariah diberi nama Abednego.
8 Tang, Daniel udah mutuska dalam ati diri enggai ngamahka diri makai pemakai enggau wain raja. Nya alai, iya minta pemendar ari tuai pegawai istana ngambika iya enda diberi pemakai enggau wain nya.
9 Petara ti bendar ngasuh tuai pegawai istana ngayanka pemanah ati sereta pengasih ngagai Daniel.
10 Tang, tuai pegawai istana madah ngagai Daniel: “Aku takutka raja. Iya meh ke udah nentuka utai ke diempa sereta diirup kita. Baka ni enti iya meda kita enda regas, enti dibandingka enggau bala nembiak ke bukai ke serambau enggau kita? Raja tentu ngumbai nya salah aku.”
11 Tuai pegawai istana udah ngelantik orang ngambika ngemataka Daniel, Hananiah, Misael, enggau Asariah. Nya alai, Daniel pan madah ngagai orang nya:
12 “Uji meh kami pengelama 10 hari. Beri kami sayur enggau ai irup aja.
13 Udah nya, bandingka meh kami enggau bala nembiak ke bukai ke makai pemakai raja. Pengudah nuan meda kami, nuan ulih mutuska nama deka digaga ngagai kami.”
14 Iya pan setuju lalu nguji sida pengelama 10 hari.
15 Pengudah 10 hari, sida berupai manah agi sereta regas* agi ari semua bala nembiak bukai ke makai pemakai raja.
16 Kenyau ari maya nya, orang nya meri sida sayur aja, ukai pemakai enggau wain raja.
17 Petara ti bendar meri empat iku nembiak nya penemu, pengelandik meretika semua jenis tulisan, enggau penemu-dalam. Petara mega meri Daniel pengelandik meretika semua macham mimpi enggau utai ke dipandangka Petara dalam runding.
18 Timpuh ke udah ditentuka raja pan udah abis. Nyadi, tuai pegawai istana mai sida datai betemu enggau Nebukadnesar.
19 Lebuh raja bejaku enggau sida, iya beratika nadai nembiak bukai ke baka Daniel, Hananiah, Misael, enggau Asariah. Nya alai, sida empat mengkang ba dia gawa ke raja.
20 Tiap kali raja nanya sida pasal semua pekara ke begunaka penemu-dalam sereta ke patut dimeretika enggau silik, raja beratika sida 10 kali manah agi ari bala imam ke nemu sihir* enggau bala orang ke nemu nilit nasit ke bisi ba perintah iya.
21 Daniel mengkang ba dia nyentukka taun ti keterubah Raja Sairus merintah.
Nota Kaki
^ Tauka “Rumah Sembiang.”
^ Iya nya, Babilonia.
^ Tauka engka, “diintu.”
^ Reti nya “Petara Nya Hakim Aku.”
^ Reti nya “Jehovah Nunjukka Diri Lantang Ati.”
^ Engka mai reti “Sapa ke Baka Petara?”
^ Reti nya “Jehovah Udah Nulung.”
^ Iya nya, nama orang Babilon.
^ Tauka “berisi.”
^ Peda Penerang Leka Jaku, “Ilmu sihir.”
