Daniel 10:1-21
10 Ba taun ti ketiga Raja Sairus ari Persia merintah, Daniel, ke mega dikumbai Beltesasar, nerima pesan ari Petara. Pesan nya pasal perang ti besai, lalu pesan nya tau dikearapka. Daniel meretika pesan nya enggau manah, lalu iya nemu utai ke dipeda iya.
2 Maya nya, aku, Daniel, balat amat tusah ati pengelama tiga minggu.
3 Pengelama tiga minggu nya, aku nadai makai pemakai ti nyamai. Aku nadai makai dagin tauka ngirup wain. Aku mega nadai ngunsutka minyak ba tubuh aku.
4 Ba hari ke-24 ba bulan ti keterubah, aku bisi ba tebing sungai ti besai, iya nya Sungai Tigris.*
5 Aku malik ke atas lalu tepedaka siku lelaki ngena gari linin. Iya mega ngena tali pinggang ke digaga ngena emas ari Upas.
6 Tubuh iya baka batu krisolit. Mua iya baka kilat. Mata iya baka sempun api ti mau, lalu lengan enggau kaki iya baka temaga ke udah digusuk. Lebuh iya bejaku, nyawa iya baka munyi bala mayuh.
7 Semina aku aja ke ulih meda utai ke dipandangka Petara nya. Orang ke enggau aku enda ulih meda nya. Taja pia, sida balat amat takut. Sida ngerarika diri lalu belalai.
8 Aku ditinggalka kediri aja. Lebuh aku meda utai ke dipandangka nya ti ngalitka ati, aku nadai agi pengering. Mua aku balat amat puchat, lalu tulang aku nyau lemi.
9 Udah nya, aku ninga nyawa iya bejaku. Tang lebuh iya bejaku, aku tetinduk lalu mua aku ningkap ke tanah.
10 Tang bisi jari negu aku lalu ngerak aku, ngambika aku dani. Aku pan angkat betunjang ngena jari enggau patung aku.
11 Udah nya, ku iya madah ngagai aku:
“O Daniel, nuan orang ti amat berega.* Bediri meh lalu dinga enggau manah utai ke deka dipadahka aku ngagai nuan, laban aku udah dianjung ngagai nuan.”
Pengudah iya nyebut nya, aku pan bediri getar-getar.
12 Udah nya, iya madah ngagai aku: “Anang takut, Daniel. Petara udah ningaka sampi nuan. Kenyau ari hari keterubah, nuan nunjukka diri keran deka meretika semua utai tu sereta ngemaruhka diri ba depan Petara nuan. Nya meh kebuah aku datai ngagai nuan.
13 Tang, tuai perintah Persia ngelaban aku pengelama 21 hari. Taja pia, siku tuai ti pemadu tinggi* ke benama Mikael* datai nulung aku, lalu aku mengkang ba tisi bala raja Persia.
14 Aku datai deka nulung nuan meretika utai ke deka nyadi ngagai bansa nuan ba timpuh ti penudi. Utai ke dipandangka tu deka nyadi jemah ila.”
15 Lebuh iya madahka jaku nya ngagai aku, aku nundukka pala aku ke tanah, lalu aku enda tepansutka jaku.
16 Udah nya, iya ke baka gamal mensia negu mulut aku. Aku muka mulut aku lalu madah ngagai iya ke bediri ba depan aku: “Tuan, aku nyau getar-getar ketegal utai ke dipandangka nya, lalu aku nadai pengering agi.
17 Baka ni aku ulih bejaku enggau nuan, tuan? Aku nadai agi pengering, lalu aku nyau enda ulih enseput.”
18 Iya ke baka gamal mensia nya negu aku baru, lalu ngeringka aku.
19 Udah nya, iya madah: “Nuan orang ti amat berega.* Anang takut. Anang irau. Nuan mesti berani sereta kering.” Lebuh iya bejaku enggau aku, aku berasai kering baru. Aku pan madah: “Bejaku meh tuan, laban nuan udah ngeringka aku.”
20 Udah nya, iya madah: “Aku deka pulai lalu belaban enggau tuai ari Persia. Pengudah aku mupuk, tuai ari Greece deka datai. Taja pia, nuan nemu nama kebuah aku datai ngagai nuan?
21 Aku deka madahka nuan utai ke bisi ditulis dalam bup pemendar. Semina Mikael aja, iya nya tuai kita, ke bebendar nyukung aku dalam semua utai tu.
Nota Kaki
^ Jaku Asal, “Hidekel.”
^ Tauka “amat dikesayau; amat dipebasa.”
^ Tauka “tuai ke bisi pangkat ti pemadu tinggi.”
^ Reti nya “Sapa ke Baka Petara?”
^ Tauka “amat dikesayau; amat dipebasa.”
