Daniel 3:1-30
-
Patung emas Raja Nebukadnesar (1-7)
-
Orang diasuh nyembah patung nya (4-6)
-
-
Tiga iku orang Hebrew dituduh enggai ngasi (8-18)
-
“Kami tetap enggai nyembah bala petara nuan” (18)
-
-
Ditikau ngagai serumbung api (19-23)
-
Diselamatka ari api ngena chara ti luar biasa (24-27)
-
Raja muji Petara orang Hebrew (28-30)
3 Raja Nebukadnesar ngaga siti patung emas ke ngeninggi kira-kira 27 meter,* lalu buka iya nyauka 3 meter.* Iya nirika patung nya ba dataran Dura ke ba wilayah Babilon.
2 Udah nya, Raja Nebukadnesar madahka pesan ke ngasuh ngempuruka bala pemerintah wilayah, bala penulung pemerintah wilayah, bala gabenor, bala penasihat,* bala pegawai kewangan, bala hakim, bala majistret, enggau semua pegawai perintah ke ngemataka wilayah. Sida mesti datai ngagai pengawa ngerasmika patung ke udah didirika Raja Nebukadnesar.
3 Nyadi, bala pemerintah wilayah, bala penulung pemerintah wilayah, bala gabenor, bala penasihat, bala pegawai kewangan, bala hakim, bala majistret, enggau semua pegawai perintah ke ngemataka wilayah pan datai ngagai pengawa ngerasmika patung ke udah didirika Raja Nebukadnesar. Sida begempuru lalu bediri ba depan patung nya.
4 Siku orang lalu madahka pesan raja enggau nyawa ti inggar munyi tu: “Kita ke datai ari semua menua, bansa, enggau jaku, tu pesan raja ngagai kita:
5 Lebuh kita ninga munyi terumpit,* kesuling, ziter,* belikan mit,* perengka musik ti betali, begpaip, enggau semua perengka musik ke bukai ditebah, kita mesti besugang lalu nyembah patung emas ke udah didirika Raja Nebukadnesar.
6 Enti bisi orang ke enggai besugang nyembah patung nya, orang nya deka terus ditikauka ngagai serumbung api ti mau.”
7 Nyadi, lebuh semua orang ke datai ari semua menua, bansa, enggau jaku ninga munyi terumpit, kesuling, ziter, belikan mit, perengka musik ke betali, enggau semua perengka musik ke bukai ditebah, sida besugang lalu nyembah patung emas ke udah didirika Raja Nebukadnesar.
8 Maya nya, bisi sekeda orang Kaldea mansang ke depan lalu nuduh* orang Judah.
9 Ku sida madah ngagai Raja Nebukadnesar: “O tuan raja, awakka nuan idup belama iya.
10 Tuan raja, nuan udah meri pesan ke ngasuh tiap iku orang besugang nyembah patung emas nya lebuh sida ninga munyi perengka musik ditebah.*
11 Enti bisi orang enggai besugang nyembah patung nya, orang nya patut ditikauka ngagai serumbung api ti mau.
12 Tang, bisi sekeda orang Judah, ke udah dilantik nuan nyadi pegawai perintah ke ngemataka wilayah Babilon, enda nitihka pesan nuan. Sida nya Sadrak, Mesak, enggau Abednego. Sida enda nyembah bala petara nuan. Sida enggai nyembah patung emas ke udah didirika nuan nya, tuan raja.”
13 Lebuh Raja Nebukadnesar ninga nya, iya balat amat ringat. Iya ngasuh orang mai Sadrak, Mesak, enggau Abednego ngagai iya. Nyadi, sida tiga pan dibai betemu enggau raja.
14 Ku Nebukadnesar nanya sida: “Sadrak, Mesak, enggau Abednego, kati nya amat kita enggai nyembah bala petara aku sereta enggai nyembah patung emas ke udah didirika aku?
15 Enti kita besugang lalu nyembah patung ke udah digaga aku lebuh kita ninga munyi perengka musik ditebah,* nadai utai deka nyadi ngagai kita. Tang enti kita enggai nyembah patung nya, kita deka terus ditikauka ngagai serumbung api ti mau. Petara ni ke ulih nyelamatka kita ari aku?”
16 Ku Sadrak, Mesak, enggau Abednego nyaut raja: “O Raja Nebukadnesar, saut kami tetap sama.
17 Enti kami patut ditikauka ngagai serumbung api ti mau, Petara ke disembah kami ulih nyelamatka kami ari nya sereta nyelamatka kami ari nuan.
18 Tang enti Iya enda nyelamatka kami, kami agi deka nuan nemu tuan raja, kami tetap enggai nyembah bala petara nuan, tauka nyembah patung emas ke udah didirika nuan.”
19 Gamal* Nebukadnesar lalu berubah. Iya balat amat ringat ngagai Sadrak, Mesak, enggau Abednego. Iya lalu ngasuh orang ngangatka serumbung api tujuh kali angat agi ari selama.
20 Iya ngasuh sekeda soldadu iya ti kering nanchang Sadrak, Mesak, enggau Abednego, lalu nikauka sida tiga nya ngagai serumbung api ti mau.
21 Sida tiga pan ditanchang lalu ditikauka ngagai serumbung api ti mau. Maya nya, sida agi ngena gari ti lengkap. Sida ngena baju jubah, tupi, enggau gari ke bukai.
22 Ketegal raja udah ngaga atur ti kejam ngasuh orang nambahka pengangat serumbung api nya angat agi ari selama, orang ke mai Sadrak, Mesak, enggau Abednego mati laban api nya.
23 Tang Sadrak, Mesak, enggau Abednego ke agi mengkang ditanchang labuh ke dalam serumbung api ti mau.
24 Tiba-tiba Raja Nebukadnesar berasai takut. Iya terus angkat lalu madah ngagai pegawai tinggi iya munyi tu: “Ukai enda tiga iku aja ke ditanchang kitai lalu ditikauka kitai ngagai api?” Ku sida nyaut raja: “Au, sigi amat tuan raja.”
25 Ku raja madah: “Aku bisi meda empat iku lelaki bejalai ba tengah-tengah api nya. Sida enda ditanchang sereta enda diempa api, lalu lelaki keempat nya baka anak Petara.”
26 Raja Nebukadnesar pan mansang semak ngagai pintu serumbung api nya lalu madahka: “Nembiak Petara ti Pemadu Tinggi, Sadrak, Mesak, enggau Abednego, pansut kita!” Sadrak, Mesak, enggau Abednego pan pansut ari api nya.
27 Bala pemerintah wilayah, bala penulung pemerintah wilayah, bala gabenor, enggau bala pegawai tinggi raja ke begempuru ba dia bisi meda sida tiga nadai bakal laban api nya. Nadai selambar pan buk sida angus. Baju jubah sida mega nadai apa nama, lalu sida nadai bebau asap.
28 Ku Nebukadnesar madahka: “Puji meh Petara ke disembah Sadrak, Mesak, enggau Abednego ke udah nganjung melikat Iya lalu nyelamatka bala nembiak Iya. Sida arapka Iya lalu sanggup ngelaban atur aku. Sida sanggup mati* ngambika enda nyembah petara bukai, kelimpah ari Petara sida empu.
29 Nya alai, aku madahka atur tu, enti bisi orang ari sebarang menua, bansa, enggau jaku nyebut utai ti ngelaban Petara ke disembah Sadrak, Mesak, enggau Abednego, tubuh orang nya deka ditetak, lalu rumah iya deka digaga nyadi jamban awam,* laban nadai petara bukai ke ulih nyelamatka orang baka Petara sida.”
30 Udah nya, raja nikika pangkat Sadrak, Mesak, enggau Abednego ba wilayah Babilon.
Nota Kaki
^ Jaku Asal, “60 kiubit.” Peda Rujukan B14.
^ Jaku Asal, “6 kiubit.”
^ Tauka “penyanding penemu.”
^ Jaku Asal, “tanduk.”
^ Sebengkah perengka musik ke betali.
^ Tauka “harp.” Sebengkah perengka musik ke betali baka gitar, tang gamal iya enda sebaka enggau gitar.
^ Tauka “betenahka.”
^ Dalam Hebrew, nama perengka musik ba ayat 5 disebut baru ba ayat tu.
^ Dalam Hebrew, nama perengka musik ba ayat 5 disebut baru ba ayat tu.
^ Tauka “Ulah.”
^ Tauka “nyerahka tubuh sida.”
^ Tauka engka, “endur alai muai sampah; tugung tai.”
