Daniel 4:1-37
4 “Aku, Raja Nebukadnesar, bejaku ngagai orang ke datai ari semua menua, bansa, enggau jaku ba serata dunya: Tabi basa ke semua kita!
2 Aku deka madah pasal tanda enggau pengawa ti ngalitka ati ke udah digaga Petara ti Pemadu Tinggi ngagai aku.
3 Tanda enggau pengawa ti ngalitka ati ke udah digaga Iya amat luar biasa. Perintah Iya meruan belama iya, lalu Iya merintah ari generasi ke generasi.*
4 “Aku, Nebukadnesar, idup lantang sereta mujur ba istana aku.
5 Tang, aku bisi mimpi ke ngasuh ati aku rawan. Lebuh aku gali, utai ke dipeda aku dalam mimpi nya ngenakutka aku.
6 Nya alai, aku madahka pesan ngasuh ngangauka semua sida ke bepenemu-dalam ba Babilon, ngambika sida ulih madahka reti mimpi nya ngagai aku.
7 “Maya nya, bala imam ke nemu sihir,* bala orang ke nemu nilit nasit, orang Kaldea,* enggau bala orang ke nemu nujum nengah bintang datai betemu enggau aku. Lebuh aku madahka mimpi nya ngagai sida, sida enda ulih nerangka reti mimpi nya ngagai aku.
8 Pengujung iya, Daniel pan datai betemu enggau aku. Iya diberi nama Beltesasar, nitihka nama petara aku. Iya penuh laban kuasa bala petara ti kudus. Aku lalu madahka mimpi nya ngagai iya munyi tu:
9 “‘O Beltesasar, ketuai atas bala imam ke nemu sihir, aku nemu kuasa bala petara ti kudus bisi ba nuan, lalu nadai resia ke enda ditemu nuan. Nyadi, padahka reti mimpi nya ngagai aku.
10 “‘Lebuh aku tinduk, dalam mimpi aku nya, aku meda sepun kayu ti amat tinggi ba tengah-tengah dunya.
11 Pun kayu nya majak besai sereta tegap, lalu mansang tinggi-setinggi nyentukka langit. Semua orang ba serata dunya ulih meda pun kayu nya.
12 Daun iya manah, buah iya lebat, lalu bisi chukup pemakai ke semua mensia enggau jelu. Jelu ke ba padang belindung ba baruh pun kayu nya, lalu burung diau ba dan iya. Semua utai ti idup ulih makai buah ari pun kayu nya.
13 “‘Ba mimpi aku nya, aku bisi meda siku penyaga ti kudus nurun ari serega.
14 Ku penyaga nya bejaku enggau inggar: “Tebang pun kayu nya, tetak dan iya, gugurka daun iya, lalu taburka buah iya! Awakka jelu ke ba baruh pun kayu nya sereta burung ke ba dan iya rari.
15 Tang, tejuka tuga pun kayu nya enggau urat iya ba tanah. Pasangka gelang besi enggau gelang temaga ba tuga nya, lalu tejuka iya ba padang rumput. Awakka tuga nya basah laban ambun ari langit. Awakka tuga nya begulai enggau utai tumbuh sereta enggau bala jelu.
16 Awakka ati iya berubah, ari ati mensia nyadi baka ati jelu. Awakka iya baka nya pengelama tujuh timpuh.
17 Nya meh pesan ari bala penyaga sereta pemutus ari bala melikat ti kudus, ngambika semua orang nemu Petara ti Pemadu Tinggi meh Pemerintah ke bekuasa atas perintah mensia. Iya ulih meri kuasa merintah ngagai sapa-sapa ke dikedekaka Iya, indah ngagai orang ke paling enda penting.”
18 “‘Nya meh mimpi aku. Nyadi Beltesasar, diatu padahka reti mimpi nya ngagai aku, laban nadai siku pan orang ke bepenemu-dalam ba perintah aku ulih madahka reti mimpi nya ngagai aku. Tang nuan ulih ngereja nya, laban kuasa bala petara ti kudus bisi ba nuan.”
19 “Pengudah ninga nya, Daniel ke mega dikumbai Beltesasar, lalu diau diri enda lama. Iya berasai takut.
Ku raja madah: ‘Beltesasar, anang takut ketegal mimpi nya sereta reti iya.’
Ku Beltesasar nyaut: ‘Tuan raja, arapka mimpi nya enggau reti iya ditujuka ngagai orang ke begedika nuan, sereta ngagai bala munsuh nuan.
20 “‘Pun kayu ke dipeda nuan nya mansang besai-sebesai sereta tegap. Pun kayu nya tinggi nyentukka langit, lalu ulih dipeda orang ba serata dunya.
21 Pun kayu nya bisi daun ti manah, bebuah lebat, sereta bisi chukup pemakai ke semua mensia enggau jelu. Bala jelu ke ba padang diau ba baruh iya, lalu bala burung ke ba langit diau ba dan iya.
22 Pun kayu nya ngambarka nuan, tuan raja, laban kuasa nuan majak besai sereta tegap. Mulia nuan majak betambah nyentukka langit, lalu kuasa nuan merintah datai ke ujung dunya.
23 “‘Tuan raja mega bisi meda siku penyaga ti kudus ke nurun ari serega. Ku iya madah: “Tebang pun kayu nya lalu anchurka iya. Tang, tejuka tuga enggau urat iya ba tanah. Pasangka gelang besi enggau gelang temaga ba tuga nya, lalu tejuka iya ba padang rumput. Awakka tuga nya basah laban ambun ari langit, lalu awakka iya begulai enggau bala jelu ke ba padang pengelama tujuh timpuh.”
24 Tu reti mimpi nuan, tuan raja. Tu utai ke deka nyadi ba nuan baka ke ditentuka Petara ti Pemadu Tinggi:
25 Nuan deka diburu ari bala mensia, lalu nuan deka diau enggau bala jelu ba padang. Pengelama tujuh timpuh, nuan deka makai rumput baka sapi, lalu nuan deka basah ketegal ambun ari langit. Pengudah timpuh nya, nya baru nuan nemu, Petara ti Pemadu Tinggi meh Pemerintah ke bekuasa atas perintah mensia, lalu Iya ulih meri kuasa merintah nya ngagai sapa-sapa ke dikedekaka Iya.
26 “‘Tang, sida madahka tuga pun kayu nya enggau urat iya ditejuka ba tanah. Reti iya, kuasa merintah deka dipulaika ngagai nuan baru, pengudah nuan nemu Pemerintah ti bendar bisi ba serega.
27 Nya alai, tuan raja, arapka nuan ningaka jaku lalau aku. Badu agi bedosa, lalu kereja utai ti betul. Anang agi ngereja utai ti jai, lalu ayanka pengasih ngagai orang ke miskin. Ni nemu, nuan deka lama agi idup lantang senang.’”
28 Semua utai nya nyadi magang ba Raja Nebukadnesar.
29 Dua belas bulan udah nya, lebuh iya benung bejalai ba perabung istana iya ba Babilon,
30 iya lalu madahka: “Peda kita kuta Babilon ti besai tu! Naka pemanah kuta tu, ke udah didirika aku ngena kuasa enggau pengering aku empu. Aku udah ngaga kuta tu nyadi endur alai aku merintah, sereta kena mandangka pemesai mulia aku.”
31 Sebedau raja abis bejaku, nyawa ari serega lalu madahka: “O Raja Nebukadnesar, pendingka tu: ‘Kuasa merintah udah diambi ari nuan.
32 Nuan deka diburu ari bala mensia. Pengelama tujuh timpuh, nuan deka diau begulai enggau bala jelu ba padang, lalu nuan deka makai rumput baka sapi, nyentukka nuan nemu Petara ti Pemadu Tinggi meh Pemerintah ke bekuasa atas perintah mensia, lalu Iya ulih meri kuasa merintah ngagai sapa-sapa ke dikedekaka Iya.’”
33 Tekala nya, utai ke disebut nya pan nyadi ba Nebukadnesar. Iya diburu ari bala mensia, lalu iya makai rumput baka sapi. Tubuh iya mega basah ketegal ambun ari langit, buk iya nyau panjai baka bulu menaul, lalu kukut iya baka kukut burung.
34 “Pengudah timpuh nya abis, aku, Nebukadnesar, malik ke langit lalu runding aku pulai baru ngagai aku. Aku meri puji ngagai Petara ti Pemadu Tinggi. Nuju Iya ke idup belama iya, aku meri puji sereta mulia, laban perintah Iya meruan belama iya, lalu Iya merintah ari generasi ke generasi.
35 Nadai utai ke idup ba dunya ulih dibandingka enggau Petara. Iya ngereja utai nitihka peneka Iya ngagai bala melikat ke ba serega, sereta ngagai utai ke idup ba dunya. Nadai sapa-sapa ulih nagang Iya tauka nanya Iya: ‘Nama kebuah nuan ngereja nya?’
36 “Maya nya, runding aku pulai baru ngagai aku. Penuduk aku ti tinggi ke nyadi raja, kuasa aku, sereta nama aku ti tebilang, diberi ngagai aku baru. Bala pegawai tinggi aku sereta bala orang ke tinggi pangkat keran deka minta penemu ari aku. Kuasa merintah udah dipulaika ngagai aku, lalu aku nerima mulia mayuh agi ari ke sebedau tu.
37 “Nya alai, aku, Nebukadnesar, deka muji, ngemesaika, sereta ngemuliaka Raja ke ba serega, laban semua utai ke dikereja Iya ngena magang sereta adil, lalu Iya ulih ngemaruhka orang ke sumbung.”
Nota Kaki
^ Tauka “ari rebak ke rebak.”
^ Peda Penerang Leka Jaku, “Ilmu sihir.”
^ Iya nya, seraban orang ke landik nilit nasit sereta landik nujum nengah bintang.
