Daniel 5:1-31
5 Raja Belsasar nyediaka pengerami makai besai ke 1,000 iku orang ke tinggi pangkat ba perintah iya, lalu iya ngirup wain ba depan sida.
2 Lebuh Belsasar udah mabuk, iya ngasuh orang ngambi pekekas emas enggau pirak ke udah dirampas apai* iya, Nebukadnesar, ari Rumah Sembiang ba Jerusalem. Iya ngasuh orang ngambi pekekas nya ngambika iya, bala orang ke tinggi pangkat nya, bala bini iya, enggau bala gundik iya ngirup ngena pekekas nya.
3 Nya alai, orang mai pekekas emas ke udah dirampas ari Rumah Sembiang ba Jerusalem. Semua sida pan ngirup ngena pekekas nya.
4 Sida ngirup wain lalu muji bala petara ke digaga ari emas, pirak, temaga, besi, kayu, enggau batu.
5 Tekala nya mega, siti jari mensia ayan. Jari nya nulis ba dinding istana ke semak enggau penuduk lampu. Raja ulih meda jari nya benung nulis utai.
6 Mua raja pan nyau puchat, lalu utai ke diperundingka iya ngasuh iya takut. Kaki iya nyadi lemi, lalu patung iya nyau getar-getar.
7 Enggau nyawa ti inggar, raja ngangauka bala orang ke nemu nilit nasit, orang Kaldea,* enggau bala orang ke nemu nujum nengah bintang. Ku raja madah ngagai orang ke bepenemu-dalam ba Babilon: “Barang sapa ke nemu macha utai ke ditulis nya lalu madahka reti iya ngagai aku, deka diberi baju jubah ke bewarna ungu, lalu tenggak emas deka dirasukka ba rekung iya, lalu iya deka nyadi pemerintah ti ketiga ba perintah tu.”
8 Udah nya, semua orang ke bepenemu-dalam pan datai kia. Tang, sida enda nemu macha utai ke ditulis nya, lalu enda ulih madahka reti iya ngagai raja.
9 Nya alai, Raja Belsasar balat amat takut, lalu mua iya puchat. Bala orang ke tinggi pangkat pan bingung laban utai nya.
10 Pengudah ninga jaku raja enggau bala orang ke tinggi pangkat, kuin pan tama ngagai endur sida makai besai. Ku kuin madahka: “O tuan raja, awakka nuan idup belama iya. Nama kebuah mua nuan puchat? Nuan enda ibuh takut.
11 Ba perintah nuan, bisi siku lelaki ke bisi kuasa bala petara ti kudus. Maya jeman apai nuan suba, lelaki nya meh ke bisi penemu enggau runding ti dalam, lalu penemu-dalam iya baka penemu-dalam bala petara. Apai nuan, Raja Nebukadnesar, ngelantik iya nyadi ketuai atas bala imam ke nemu sihir,* bala orang ke nemu nilit nasit, orang Kaldea,* enggau bala orang ke nemu nujum nengah bintang. Nya meh utai ke digaga apai nuan, tuan raja.
12 Nama lelaki nya Daniel. Raja mega udah meri iya nama Beltesasar. Pemintar runding iya amat luar biasa, lalu iya bisi penemu enggau runding ti dalam. Ketegal nya iya ulih madahka reti mimpi, nerangka teka-teki, sereta mutarka penanggul ti tusah. Nya alai, kangauka Daniel kitu, ngambika iya madah ngagai nuan reti utai ke ditulis nya.”
13 Nyadi, Daniel pan dibai ngagai raja. Ku raja nanya Daniel: “Nuan tu Daniel, ke udah ditangkap apai aku ari Judah?
14 Aku ninga nuan bisi kuasa bala petara, penemu, runding ti dalam, enggau penemu-dalam ti luar biasa.
15 Aku udah ngasuh orang ke bepenemu-dalam enggau bala orang ke nemu nilit nasit macha utai ke ditulis nya, lalu madahka reti iya ngagai aku. Tang, sida enda ulih ngereja nya.
16 Aku ninga nuan nemu nerangka reti utai sereta mutarka penanggul ti tusah. Enti nuan nemu macha utai ke ditulis nya lalu madahka reti iya ngagai aku, nuan deka diberi baju jubah ke bewarna ungu, lalu tenggak emas deka dirasukka ba rekung nuan. Nuan mega deka nyadi pemerintah ti ketiga ba perintah tu.”
17 Ku Daniel nyaut raja: “Simpan meh pemeri nuan nya tuan raja, lalu beri hadiah nuan ngagai orang bukai. Aku deka macha utai ke ditulis nya, lalu madahka reti iya ngagai nuan.
18 Tuan raja, Petara ti Pemadu Tinggi udah meri perintah, penuduk ti tinggi, basa, enggau mulia ngagai apai nuan, Nebukadnesar.
19 Ketegal Petara meri iya penuduk ti tinggi, orang ke datai ari semua menua, bansa, enggau jaku gegetar takutka iya. Iya ngereja nama-nama utai ke dikedeka iya. Iya ulih munuh tauka nejuka orang idup, lalu iya mega ulih meri orang kuasa tauka ngemaluka orang nitihka peneka iya.
20 Tang udah nya, iya nyadi sumbung sereta degil, lalu ngereja utai sepeneka ati diri. Nya alai, iya dibuai ari kerusi diraja iya lalu nadai agi dibasa orang.
21 Iya diburu ari bala mensia, lalu ati iya nyadi baka ati jelu. Iya diau begulai enggau bala keledai ti liar, lalu makai rumput baka sapi. Tubuh iya basah ketegal ambun ari langit. Iya nyadi baka nya nyentukka iya nemu Petara ti Pemadu Tinggi meh Pemerintah ke bekuasa atas perintah mensia, lalu Iya ulih meri kuasa merintah nya ngagai sapa-sapa ke dikedekaka Iya.
22 “Tang nuan Belsasar, nuan anak* iya, lalu nuan nemu semua utai tu. Tang, nuan enda ngemaruhka ati diri.
23 Nuan ngeninggika diri ngelaban Tuan ke ba serega, lalu nuan ngasuh orang mai pekekas ke udah dirampas ari Rumah Iya. Udah nya, nuan, bala sida ke tinggi pangkat, bala bini, enggau bala gundik nuan ngirup wain ngena pekekas nya. Kita mega muji bala petara ke digaga ari pirak, emas, temaga, besi, kayu, enggau batu, iya nya bala petara ke enda ulih meda, enda ulih ninga, sereta enda nemu utai. Taja pia, nuan enda ngemuliaka Petara ke udah meri nuan seput pengidup, sereta ke bekuasa atas seluruh pengidup nuan.
24 Nya meh kebuah Petara nganjung jari nya lalu nulis utai nya.
25 Tu meh utai ke ditulis nya: MENE, MENE, TEKEL, enggau PARSIN.
26 “Tu meh reti utai ke ditulis nya: MENE, Petara udah ngitung timpuh nuan merintah lalu ngujungka iya.
27 “TEKEL, nuan udah ditimbang ngena dachin, lalu ditemu bisi utai kurang.
28 “PERES, perintah nuan udah dibagi, lalu diberi ngagai orang Media enggau orang Persia.”
29 Udah nya, Belsasar ngasuh orang ngerasukka baju jubah ke bewarna ungu ba Daniel, sereta ngerasukka tenggak emas ba rekung iya. Sida mega madahka jaku gerah pasal Daniel ke deka nyadi pemerintah ti ketiga ba perintah nya.
30 Malam nya mega, Belsasar, raja orang Kaldea nya, dibunuh.
31 Udah nya, perintah nya diserahka ngagai orang Media ke benama Darius ke beumur kira-kira 62 taun.
Nota Kaki
^ Engka mai reti “aki” tauka “moyang.”
^ Iya nya, seraban orang ke landik nilit nasit sereta landik nujum nengah bintang.
^ Peda Penerang Leka Jaku, “Ilmu sihir.”
^ Iya nya, seraban orang ke landik nilit nasit sereta landik nujum nengah bintang.
^ Engka mai reti “uchu” tauka “peturun.”
