Daniel 7:1-28
7 Ba taun ti keterubah Raja Belsasar merintah Babilon, Daniel bemimpi lebuh iya tinduk. Dalam mimpi nya, iya meda beberapa iti utai ke dipandangka Petara. Udah nya, iya pan nulis semua utai ke dipeda iya dalam mimpi nya.
2 Ku Daniel madahka:
“Maya malam hari, nengah bantu kuasa kudus,* aku meda empat iti angin ari langit bepuput lalu ngasuh tasik beumbak.
3 Empat iku jelu ti besai ke enda sebaka gamal lalu pansut ari tasik.
4 “Jelu ti keterubah nya baka gamal singa. Iya bisi sayap baka menaul. Aku meda jelu nya sampai sayap iya ditingkilka. Udah nya, jelu nya diangkatka ngambika bediri baka mensia. Jelu nya mega diberi ati mensia.
5 “Jelu ti kedua nya baka beruang. Jelu nya ngangkatka siti ari kaki iya sereta manggum tiga iti tulang kerigai. Tu utai ke dipadah ngagai jelu nya: ‘Angkat, empa mayuh agi dagin.’
6 “Aku majak beratika lalu meda siku da agi jelu. Jelu nya baka rimau bintang, lalu jelu nya bisi empat iti sayap baka sayap burung. Jelu nya bisi empat iti pala, lalu iya diberi kuasa merintah.
7 “Udah nya, dalam utai ke dipandangka ngagai aku malam nya, aku meda jelu ti keempat. Jelu nya siga sereta balat ngenakutka. Pengering iya amat luar biasa, lalu iya bisi ngeli besi ti besai. Iya nelan sereta nganchurka semua utai, lalu nama-nama utai ke agi tinggal diindik iya ngena kaki iya. Jelu tu enda sebaka enggau jelu ke bukai. Iya bisi 10 iti tanduk.
8 Lebuh aku beratika semua tanduk nya, aku meda siti tanduk ti mit pansut ba entara semua tanduk nya, lalu tiga iti tanduk ke ba depan tanduk ti mit nya dichabut. Tanduk ke mit nya bisi mata baka mata mensia enggau mulut ke bejaku begah.*
9 “Aku majak beratika lalu aku meda kerusi diraja ditusun. Iya ke Bisi Kenyau ari Kelia duduk ba kerusi diraja Iya. Gari Iya burak baka seleju. Buk Iya baka bulu bedus ti beresi. Kerusi diraja Iya baka api ti mau, lalu roda kerusi nya beapi-api.
10 Api mengalir baka sungai pansut ari kerusi diraja Iya. Seribu kali seribu melikat gawa ke Iya, lalu sepuluh ribu kali sepuluh ribu melikat bediri ba depan Iya. Pengawa pechara pan berengkah, lalu bisi bup dibuka.
11 “Aku majak beratika utai ke dipandangka ngagai aku, laban aku meda tanduk nya bejaku begah.* Udah nya, aku meda jelu nya dibunuh, lalu bangkai iya ditunu sampai anchur.
12 Tang kuasa merintah jelu ke bukai dirampas, lalu sida ditejuka idup pengelama sesiti timpuh.
13 “Udah nya, dalam utai ke dipandangka ngagai aku malam nya, aku meda siku orang ke baka anak mensia datai enggau remang* ke ba langit. Iya dikemendarka betemu enggau Iya ke Bisi Kenyau ari Kelia, lalu iya dibai ngagai Iya ke Bisi Kenyau ari Kelia.
14 Iya lalu diberi kuasa merintah, basa, enggau perintah, ngambika orang ari semua menua, bansa, enggau jaku betuaika iya. Kuasa iya merintah meruan belama iya lalu enda nemu abis. Perintah iya enda ulih dipunaska.
15 “Tang aku, Daniel, balat amat irau, laban utai ke dipandangka ngagai aku nya ngenakutka aku.
16 Nyadi, aku pan datai semak ngagai siku ari sida ke bediri ba dia, laban aku deka nanya iya pasal reti semua utai tu. Iya nyaut aku lalu madahka reti iya.
17 “‘Empat iku jelu ti besai nya ngambarka empat iku raja ke deka bekuasa ba dunya.*
18 Tang, bala nembiak ti kudus ke enggi Petara ti Pemadu Tinggi deka nerima perintah nya. Perintah nya meruan diempu sida. Au, nyentukka belama iya.’
19 “Udah nya, aku deka nemu mayuh agi pasal jelu ti keempat nya, ke nyelai agi ari jelu ke bukai. Jelu nya balat amat ngenakutka, lalu iya bisi ngeli besi sereta kukut temaga. Jelu nya nelan sereta nganchurka semua utai, lalu nama-nama utai ke agi tinggal diindik iya ngena kaki iya.
20 Aku mega deka nemu pasal 10 iti tanduk ke bisi ba pala jelu nya. Kelimpah ari nya, aku pan deka nemu pasal tanduk ke siti da agi, ke besai agi ari tanduk ke bukai. Lebuh tanduk nya pansut, tiga iti tanduk dichabut. Tanduk ke pansut nya bisi mata enggau mulut ke bejaku begah.*
21 “Aku majak beratika lalu meda tanduk nya beperang enggau bala nembiak ti kudus. Tanduk nya ngalahka sida.
22 Pengujung iya, Iya ke Bisi Kenyau ari Kelia datai lalu meri pemutus ke bepiak ngagai bala nembiak ti kudus ke enggi Petara ti Pemadu Tinggi. Maya ti udah ditetapka pan datai alai bala nembiak ti kudus nerima perintah nya.
23 “Ku iya nampung jaku iya: ‘Jelu ti keempat nya ngambarka perintah ti keempat ke deka bisi ba dunya. Perintah tu enda sebaka enggau semua perintah ke bukai. Iya deka nelan, ngindik, sereta nganchurka serata dunya.
24 Sepuluh iti tanduk nya ngambarka 10 iku raja ke deka datai ari perintah nya. Udah nya, siku da agi raja deka datai. Raja nya lain ari semua raja ke bukai, lalu iya deka ngalahka tiga iku raja.
25 Iya deka bejaku ngelaban Petara ti Pemadu Tinggi, lalu iya deka majak ngemediska bala nembiak ti kudus ke enggi Petara ti Pemadu Tinggi. Iya ingin deka ngubah adat enggau maya ke udah ditetapka, lalu sida deka diserahka ngagai iya pengelama siti timpuh, dua iti timpuh, enggau setengah timpuh.*
26 Tang Hakim* ngepunka pengawa pechara, lalu kuasa iya merintah pan dirampas sida, lalu iya dipunaska abis lengis.
27 “‘Perintah, kuasa merintah, enggau mulia semua perintah ke ba baruh langit diberi ngagai bala nembiak ti kudus ke enggi Petara ti Pemadu Tinggi. Perintah sida perintah ti meruan belama iya, lalu semua perintah ke bukai deka gawa ke sida sereta ngasika sida.’
28 “Nya meh utai ke dipeda aku dalam mimpi aku. Aku, Daniel, berasai balat amat takut nyentukka mua aku nyau puchat. Tang aku nyimpan semua nya ba dalam ati aku.”
Nota Kaki
^ Peda Penerang Leka Jaku.
^ Tauka “mulut ke sumbung.”
^ Tauka “bejaku enggau sumbung.”
^ Tauka “awan.”
^ Jaku Asal, “deka angkat ari dunya.”
^ Tauka “mulut ke sumbung.”
^ Iya nya, tiga timpuh setengah.
^ Jaku Asal, “Kot.”
