Daniel 8:1-27
8 Ba taun ti ketiga Raja Belsasar merintah, aku, Daniel, meda utai ke dipandangka Petara ngagai aku ke lain agi ari ke dipeda aku sebedau tu.
2 Aku ba istana* ba Sushan,* ke ba wilayah Elam. Dalam utai ke dipandangka nya, aku meda aku benung bediri ba tebing Sungai* Ulai.
3 Aku meda siku bedus lelaki bediri ba depan sungai nya. Bedus nya bisi dua iti tanduk ti panjai. Siti ari tanduk iya panjai agi ari ke siti da agi. Tanduk ke panjai agi nya pansut dudi.
4 Aku meda bedus nya nanduk tunga ke barat, utara, enggau selatan. Nadai jelu bukai ke ulih ngelaban iya, lalu nadai sapa-sapa ke ulih nyelamatka bala jelu nya ari kuasa iya. Iya ngereja utai nitihka peneka iya, lalu iya ngenyumbungka diri.
5 Udah nya, aku meda siku kambin lelaki datai ari barat. Iya meraka serata dunya enggau naka pengelaju, nyentukka kaki iya enda terengkah ba tanah. Ba entara mata iya bisi tanduk ti besai.
6 Kambin nya belanda enggau naka pengeringat, nuju ngagai bedus ke bisi dua iti tanduk ke bediri ba depan sungai nya.
7 Aku meda kambin nya majak semak ngagai bedus nya. Iya balat amat ringat ngagai bedus nya. Iya pan nyerang bedus nya lalu matahka dua iti tanduk bedus nya, nyentukka bedus nya nyau nadai daya deka ngelaban iya. Kambin nya ngempaska bedus nya lalu ngindik iya. Nadai sapa-sapa ke ulih nyelamatka bedus nya ari kuasa kambin nya.
8 Udah nya, kambin nya balat amat ngenyumbungka diri. Lebuh iya nyadi kering, tanduk iya ke besai nya pan terus patah. Udah nya, empat iti tanduk ti besai tumbuh nganti tanduk ke patah nya. Lalu empat iti tanduk nya nunjuk ngagai arah ti enda sama.*
9 Ari siti tanduk nya, pansut siti tanduk ti mit. Tanduk ti mit nya pan mansang majak besai tunga ngagai selatan, timur, enggau ngagai Menua ti Lawa.
10 Tanduk nya nyadi amat besai nyentukka iya datai ba raban soldadu ba langit.* Ketegal tanduk nya, sekeda ari raban soldadu nya enggau sekeda ari bintang labuh ke dunya, lalu semua nya diindik iya magang.
11 Tanduk nya indah mencabar Ketuai raban soldadu nya. Pemeri ke diserahka ninting hari ngagai Ketuai nya dirampas, lalu endur ti kudus ke udah didirika Iya diruntuhka.
12 Ketegal penyalah, raban soldadu enggau pemeri ninting hari nya diserahka ngagai tanduk nya. Tanduk nya majak muai pemendar ke dunya. Iya ngereja utai sepeneka ati diri, lalu iya mujur ngereja nya.
13 Udah nya, aku ninga siku melikat bejaku, lalu siku da agi melikat nanya iya: “Berapa lama agi utai ke dipandangka tu deka nyadi, iya nya pasal pemeri ke diserahka ninting hari sereta pasal penyalah ke ngasuh utai anchur abis lengis? Berapa lama agi endur ti kudus enggau raban soldadu nya deka diindik?”
14 Melikat nya pan madah ngagai aku: “Pengelama 2,300 malam enggau pagi. Pengudah nya, endur ti kudus tentu deka diaduka baru ngambika nyadi baka asal.”
15 Lebuh aku, Daniel, benung meda utai ke dipandangka nya sereta bebendar nguji meretika iya, siku orang ke baka gamal mensia tiba-tiba bediri ba depan aku.
16 Udah nya, aku ninga nyawa siku lelaki bejaku ari tengah-tengah Sungai Ulai. Ku iya: “Gabriel, terangka reti utai ke dipeda iya.”
17 Gabriel pan datai semak ngagai endur aku bediri, tang aku balat amat takut lalu nyungkurka diri ke tanah. Ku iya madah ngagai aku: “Anak mensia, nuan mesti meretika tu. Utai ke dipeda nuan nya deka nyadi ba timpuh ti penudi.”
18 Lebuh iya benung bejaku enggau aku, aku pan tetinduk lalu tetingkap ke tanah. Nyadi, iya pan negu aku lalu nulung aku bediri baru.
19 Udah nya iya madah: “Aku deka madah ngagai nuan utai ke deka nyadi ba pengujung timpuh pengeringat Petara, laban nya deka nyadi ba maya ke udah ditetapka ba timpuh ti penudi.
20 “Bedus lelaki ke bisi dua iti tanduk ke dipeda nuan nya ngambarka bala raja Media enggau Persia.
21 Kambin lelaki ke bebulu lebat nya ngambarka raja Greece, lalu tanduk ti besai ba entara mata kambin nya ngambarka raja ti keterubah.
22 Udah nya, tanduk ti besai nya patah, lalu empat iti da agi tanduk tumbuh. Empat iti tanduk nya ngambarka empat iti perintah ke deka datai ari bansa iya, tang perintah nya enda kuat baka perintah iya.
23 “Ba pengujung timpuh sida merintah, lebuh penyalah sida nyau chukup penuh, siku raja ke mangah gamal deka angkat merintah. Iya landik ngaga pelan kena nipu.*
24 Iya deka nyadi amat bekuasa, tang ukai ketegal pengering iya empu. Iya deka ngasuh utai anchur enggau chara ti ngalitka ati,* lalu semua utai ke dikereja iya deka mujur magang. Orang ti kering enggau bala nembiak ti kudus deka dipunaska iya.
25 Iya pintar nipu mayuh orang ngambika iya ulih mujur. Iya deka ngenyumbungka diri, lalu iya deka ngemunaska mayuh orang maya orang idup likun.* Iya indah deka ngelaban Ketuai atas bala ketuai. Taja pia, iya deka dipunaska, tang ukai ngena jari mensia.
26 “Ba utai ke dipandangka Petara ngagai nuan, utai ke dipadahka pasal malam enggau pagi nya sigi amat. Tang nuan mesti nyimpan iya nyadi resia, laban agi lama sebedau utai nya nyadi.”*
27 Aku, Daniel, balat amat lelak lalu aku sakit pengelama beberapa hari. Udah nya, aku angkat lalu ngereja pengawa ke diasuh raja. Taja pia, aku agi charut runding ketegal utai ke udah dipeda aku nya, lalu nadai orang ke ulih meretika iya.
Nota Kaki
^ Tauka “kuta ke bisi kubu.”
^ Tauka “Susa.”
^ Tauka “Saluran.”
^ Jaku Asal, “ngagai empat angin langit.”
^ Tauka “serega.”
^ Tauka “lya ulih meretika jaku ti tusah dimeretika.”
^ Tauka “chara ti teruk.”
^ Tauka engka, “lalu nadai meri amaran sebedau ngemunaska mayuh orang.”
^ Tauka “laban jemah ila baru utai nya nyadi.”
