Daniel 9:1-27
9 Darius anak Ahasurus ke datai ari peturun Media dilantik nyadi raja ke megai perintah orang Kaldea.
2 Ba taun keterubah iya merintah, pengudah aku, Daniel, mansik bup* ke bisi jaku Jehovah ngagai Nabi Jeremiah, aku ulih meretika pasal Jerusalem ke ditejuka nyadi tembawai pengelama 70 taun.
3 Nya alai, aku minta tulung* ngagai Jehovah, Petara ti bendar. Aku besampi ngagai Iya, bepuasa, ngena kain guni, sereta nabur amau ba diri empu.
4 Aku besampi ngagai Petara aku, Jehovah, lalu ngaku dosa kami. Ku aku besampi:
“O Jehovah, Petara ti bendar, Nuan meh Petara ti bekuasa ke patut dipebasa sereta dikenangi, lalu Nuan ngamatka sempekat Nuan. Nuan mega ngayanka pengerindu ti setia ngagai orang ke rinduka Nuan sereta ngasika pesan Nuan.
5 Kami udah bedosa sereta ngereja penyalah. Kami ngereja penyai sereta ngelaban Nuan. Kami udah limpang ari pesan Nuan sereta atur Nuan.
6 Kami enda mendingka bala nabi Nuan ke bejaku dalam nama Nuan ngagai bala raja kami, bala tuai kami, bala aki ini kami, sereta ngagai semua orang ba menua kami.
7 O Jehovah, Nuan Petara ti lurus, tang kami udah ngemaluka diri empu baka seharitu. Orang Judah, orang Jerusalem, enggau semua orang Israel ke diachirka Nuan ngagai endur ti jauh tauka semak mega udah ngemaluka diri, laban sida enda setia ngagai Nuan.
8 “O Jehovah, kami, bala raja kami, bala tuai kami, enggau bala aki ini kami malu magang, laban kami udah bedosa ngagai Nuan.
9 O Jehovah, Nuan Petara ti pengasih sereta rindu ngampun, tang kami udah ngelaban Nuan.
10 Petara kami, Jehovah, kami enda ngasika jaku Nuan. Kami enda nitihka adat ke diberi Nuan ngagai kami nengah bala nabi Nuan.
11 Semua orang Israel udah ngelanggar Adat Nuan. Kami limpang sereta enda ngasika jaku Nuan. Nya meh kebuah Nuan ngasuh kami ditinggang sumpah ke bisi ba Adat ke ditulis nembiak Nuan, Moses, laban kami udah bedosa ngagai Nuan, Petara ti bendar.
12 Nuan udah ngereja utai ke disebut Nuan ngagai kami enggau bala pemerintah kami. Nuan ngenataika penulah ti balat ngagai kami. Ba serata dunya, nadai utai ke balat agi ari utai ke udah nyadi ba Jerusalem.
13 Semua penulah tu ninggang kami, baka ke udah ditulis dalam Adat Moses. Tang, agi ga kami enda nguji ngelantangka ati Nuan, Jehovah, Petara kami. Kami enda nesal ati ke penyalah kami, lalu kami nunjukka diri enda pedulika Nuan ke seruran ngamatka jaku Diri.*
14 “O Petara kami, Jehovah, Nuan majak beratika pengawa kami, lalu Nuan ngenataika penulah ngagai kami. Nya ketegal semua pengawa Nuan lurus magang. Taja pia, agi meh kami enda ngasika Nuan, Jehovah.
15 “O Jehovah, Petara kami, Nuan meh ke udah nyelamatka bala nembiak Nuan ari Ejip ngena jari Nuan ti bekuasa. Nya meh kebuah nama Nuan ditemu mayuh orang sampai ke seharitu. Tang, kami udah bedosa sereta ngereja utai ti jai.
16 O Jehovah, utai ke dikereja Nuan lurus magang. Nya alai, kami minta ngambika Nuan enda agi ringat tauka pedis ati ngagai kuta Nuan, Jerusalem, iya nya gunung Nuan ti kudus. Ketegal dosa kami enggau dosa aki ini kami, orang ke ngelingi kami ngeleseka Jerusalem enggau bala nembiak Nuan.
17 O Petara kami, dingaka meh sampi sereta peminta nembiak Nuan tu. O Jehovah, ketegal nama Nuan ti kudus, awakka Nuan lantang ati ngagai endur Nuan ti kudus ke udah nyadi tembawai.
18 O Petara aku, pendingka meh lalu dinga meh. Buka meh mata Nuan lalu peda meh pemerinsa kami. Peratika meh kuta ke dikangau ngena nama Nuan. Kami minta ngagai Nuan ukai ketegal kami tu lurus, tang ketegal Nuan bisi pengasih ti besai.
19 O Jehovah, dingaka meh kami. O Jehovah, ampunka meh kami. O Jehovah, pendingka meh kami lalu selamatka kami. O Petara aku, ketegal nama Nuan anang meh betangguh, laban kuta Nuan enggau bala nembiak Nuan dikangau ngena nama Nuan.”
20 Lebuh aku benung bejaku enggau Petara dalam sampi, ngaku dosa diri enggau dosa bansa aku, Israel, sereta minta kasih ari Jehovah, Petara aku, bekaul enggau gunung Iya ti kudus,
21 au, lebuh aku agi besampi, siku lelaki datai ngagai aku. Nama iya Gabriel. Iya meh lelaki ke dipeda aku lebuh Petara mandangka utai dalam runding aku sebedau tu. Iya datai ngagai aku kira-kira maya pemeri lemai diserahka. Aku berasai amat lelak maya nya.
22 Iya pan nulung aku ngambika aku ulih meretika utai ke deka nyadi. Ku iya:
“O Daniel, aku datai laban aku deka ngajar nuan sereta nulung nuan meretika utai ke deka nyadi.
23 Lebuh nuan berengkah besampi, aku nerima pesan ari Petara. Nyadi, aku pan datai deka madah pasal nya ngagai nuan laban nuan orang ti amat berega.* Nya alai, pendingka enggau manah lalu uji meretika utai ke dipandangka Petara ngagai nuan.
24 “Bisi 70 minggu* ke udah ditetapka ke bansa nuan enggau kuta nuan ti kudus kena muai penyalah, kena muai dosa, kena ngampunka penyalah, kena mai pengelurus ti meruan belama iya, kena ngechop utai ke dipandangka Petara dalam runding, kena ngechop jaku benabi, sereta kena nata Endur ti Pemadu Kudus.*
25 Nuan patut nemu sereta faham, berengkah ari maya atur ke ngasuh Jerusalem diaduka sereta didirika baru dikeluarka, nyentuk ngagai maya penatai Kepala, iya nya Messiah,* deka bisi 7 minggu pia mega 62 minggu. Jerusalem deka diaduka sereta didirika baru, nyengkaum dataran awam enggau parit. Tang utai nya nyadi ba maya ti tusah.
26 “Pengudah 62 minggu, Messiah deka dibunuh lalu mati nadai utai.
“Siku tuai enggau raban soldadu iya deka datai nganchurka kuta tu enggau endur ti kudus. Ai bah deka nganchurka endur nya. Perang deka nyadi nyentukka pengujung iya. Utai deka anchur baka ke udah ditentuka Petara.
27 “Iya deka nentuka sempekat dipejalaika ke mayuh orang pengelama seminggu. Ba tengan minggu, iya deka ngetuka pengawa nyerahka korban sereta pemeri ke bukai.
“Orang ke ngasuh utai anchur deka datai ngena sayap utai ti keji. Utai ke udah ditentuka Petara deka ninggang iya ke ditinggalka nya nyentukka semua utai anchur.”
Nota Kaki
^ Iya nya, bup-bup ti kudus.
^ Jaku Asal, “aku nguingka mua aku.”
^ Tauka “ke setia.”
^ Tauka “amat dikesayau; amat dipebasa.”
^ 1 minggu ngambarka 7 taun.
^ Jaku Asal, “nata Ti Kudus atas Semua ti Kudus.” Engka merujuk ngagai endur alai Petara diau ba serega.
^ Tauka “Iya ke Ditata.”
