Epesus 1:1-23
1 Aku, Paul, ke nyadi rasul Jesus Kristus nitihka peneka Petara, nulis surat tu ngagai nembiak Petara ti kudus ba Epesus, ke tetap ati sereta ke beserakup enggau Jesus Kristus:
2 Ngarapka semua kita bulih pemanah ati ti besai sereta pengelantang ari Petara ti Apai kitai, enggau ari Tuan Jesus Kristus.
3 Puji ke Petara enggau Apai Tuan kitai Jesus Kristus. Nengah kuasa kudus,* Iya udah meri kitai berekat ba serega, laban kitai beserakup enggau Kristus.
4 Sebedau penumbuh dunya,* Petara udah milih kitai beserakup enggau Kristus, ngambika kitai ngayanka pengerindu, kudus, sereta tuchi ba mua Iya.
5 Kenyau ari suba, Iya udah nentuka kitai nyadi anak ambu Iya nengah Jesus Kristus, sejalai enggau utai ti dikedeka sereta dikerinduka Iya.
6 Enggau nya, Iya deka dipuji ketegal pemanah ati Iya ti besai ke bemulia, ke diayanka ngagai kitai nengah Anak ti dikerinduka Iya.
7 Nengah Anak nya, kitai ditebus lalu dilepaska. Au, nengah darah iya, dosa kitai diampunka. Naka meh pemesai pemanah ati Petara!
8 Petara udah meri pemanah ati Iya ti chukup besai ngagai kitai, lebuh Iya meri kitai semua macham penemu-dalam enggau pemereti ati.*
9 Iya udah madahka resia ti kudus pasal peneka Iya ngagai kitai. Resia nya sejalai enggau utai ke ngerinduka Iya sereta peneka Iya,
10 kena ngaga siti atur lebuh timpuh ke ditetapka Iya abis. Nengah atur nya, semua utai ba serega enggau ba dunya ulih digempuruka lalu nunduk ngagai Kristus. Au, semua utai deka digempuruka lalu nunduk ngagai iya.
11 Kami beserakup enggau Kristus lalu sama enggau iya nerima pesaka ari Petara. Kenyau ari suba, kami udah dipilih sejalai enggau tuju Petara ke ngereja utai sejalai enggau peneka Iya.
12 Enggau nya, Petara dipuji sereta dimuliaka nengah kami, orang ti keterubah iya arapka Kristus.
13 Tang kita mega arapka iya pengudah kita ninga ajar ti bendar, iya nya Berita Manah pasal kita ke deka diselamatka. Pengudah kita pechayaka iya, kita ditanda* ngena kuasa kudus ke udah disemayaka Petara, lalu nya nyadi nengah Kristus.
14 Kuasa kudus nya jamin ke nunjukka* kitai deka bulih pesaka ke disemayaka Petara. Tuju iya, ngambika nembiak Petara dilepaska nengah tebus, lalu Petara dipuji enggau penuh mulia.
15 Nya alai, kenyau ari aku ninga pasal kita ke arapka Tuan Jesus, enggau pasal pengerindu ke diayanka kita ngagai semua nembiak Petara ti kudus,
16 aku enda ngetu-ngetu meri terima kasih pasal kita. Aku majak besampi ke kita,
17 ngambika Petara Tuan kitai Jesus Kristus, Apai ti bemulia, meri kita penemu-dalam ngambika kita ulih meretika enggau betul utai ke dipandangka Iya.
18 Iya udah muka mata ati kita, ngambika kita ulih nemu utai ke dianti kita, iya nya utai ke diberi Iya ngagai kita. Enggau nya, kita deka nemu pemesai mulia pengaya ke diberi Iya nyadi pesaka ke bala nembiak Iya ti kudus.
19 Kita mega deka nemu, kuasa ti chukup balat besai ke diayanka Iya ngagai kitai ke arap. Pemesai kuasa nya ulih dipeda
20 lebuh Iya ngidupka Kristus ari mati, lalu meri Kristus penuduk ba sepiak kanan Iya ba serega.
21 Penuduk Kristus jauh tinggi agi ari tiap iti perintah, piak ti bekuasa, pemerintah, pemesai, enggau semua nama, enda ngira ba jeman* tu tauka ba jeman ti deka datai.
22 Petara mega ngasuh semua utai nunduk ba baruh kaki iya, lalu milih iya nyadi kepala atas semua utai ke bekaul enggau raban gempuru.*
23 Raban gempuru nya tubuh Kristus ke penuh laban semua utai ke bekaul enggau iya. Iya meh ke ngasuh semua utai chukup ba semua pekara.
Nota Kaki
^ Peda Penerang Leka Jaku.
^ Iya nya, sebedau anak Adam seduai Awa ada.
^ Tauka “penau berundingka utai enggau manah.”
^ Jaku Asal, “dichop.”
^ Tauka “bayar pala ke nunjukka; ngesahka.”
^ Tauka “sistem dunya.” Peda Penerang Leka Jaku, “Sistem dunya.”
^ Tauka “sidang.”
