Epesus 2:1-22
2 Kelimpah ari nya, Petara udah ngidupka kita taja pan kita udah mati ketegal dosa enggau penyalah kita.
2 Suba kita bejalai nitihka dunya* tu. Kita nitihka pemerintah ke bekuasa atas angin, iya nya runding enggau ulah* ke benung nguasa orang ke enda ngasi.
3 Au, semua kitai kala idup nitihka pengingin tubuh ti bedosa. Kitai ngereja utai ke dikinginka tubuh enggau runding kitai ti bedosa. Kenyau ari ada, kitai endang anak ke patut nerima pengeringat Petara baka orang bukai.
4 Tang ketegal Petara bisi pengasih ti besai sereta balat rinduka kitai,
5 Iya ngidupka kitai lalu nyerakupka kitai enggau Kristus, taja pan kitai udah mati ketegal penyalah kitai. Pemanah ati Iya ti besai meh ke nyelamatka kita.
6 Nambahka nya, Petara udah ngidupka kitai lalu meri kitai penuduk ba serega, laban kitai beserakup enggau Jesus Kristus.
7 Enggau nya, ba jeman* ti deka datai, Petara deka mandangka pemanah ati Iya ti besai ke nadai tatak, lebuh Iya ngayanka pengerah jari Iya ngagai kitai ke beserakup enggau Jesus Kristus.
8 Nengah pemanah ati ti besai nya, kita selamat ketegal kita arap. Kita selamat ukai ketegal utai ke dikereja kita, tang ketegal nya pemeri ari Petara.
9 Au, ukai ketegal utai ti dikereja kita. Nya alai, nadai siku pan orang bisi kebuah deka bejaku begah.
10 Kitai tu asil ari pengawa Petara ke ditempa* ngambika beserakup enggau Jesus Kristus kena ngereja pengawa ti manah. Nya meh utai ke udah dulu ditetapka Petara ngambika dikereja kitai.
11 Nya alai, kingatka, suba “orang ke besunat,”* iya nya sida ke disunat* mensia, kala ngangauka kita, peturun bansa bukai, “orang ke enda besunat.”
12 Maya nya, kita enda ngelala Kristus. Kita diseraraka ari bansa Israel. Kita nadai kaul enggau sempekat ke digaga nitihka semaya Petara. Ba dunya, kita nadai utai ke ulih dianti kita enggau andal lalu kita enda ngelala Petara.
13 Tang diatu, kita beserakup enggau Jesus Kristus. Taja pan suba kita jauh ari Petara, tang diatu kita semak enggau Iya ketegal darah Kristus.
14 Kristus meh ke nulung kitai bebaik. Iya udah nyerakupka dua iti raban nya, lalu ngeruntuhka dinding ke nyeraraka sida.
15 Iya udah nyerahka tubuh iya, kena ngujungka Adat ti ngembuan atur ke ngasuh dua iti raban nya bemunsuh. Tuju iya, ngambika dua iti raban nya bebaik lalu beserakup enggau iya nyadi siti bansa* ti baru.
16 Nengah tiang perinsa,* iya ngasuh dua iti raban nya nyadi siti tubuh, lalu nulung sida bebaik enggau Petara. Nengah pemati iya empu, dua iti raban nya badu agi bemunsuh.
17 Iya udah datai nusui Berita Manah pasal pengelantang,* ngagai kita ke jauh ari Petara enggau ngagai sida ke semak enggau Petara.
18 Nengah iya, semua kitai ke ari kedua-dua raban nya, enda disekat lebuh kitai besampi ngagai Apai, laban semua kitai nerima kuasa kudus ti sama.
19 Nya alai, kita ukai agi orang ke enda dikelala enggau orang asing. Tang kita sama nyadi rayat enggau nembiak Petara ti kudus, lalu sebagi ari ruang bilik Petara.
20 Kita udah didirika ba atas siti pugu bengunan, iya nya bala rasul enggau bala nabi, lalu Jesus Kristus empu nyadi batu sukut ti pemadu beguna.
21 Bengunan nya enggau semua begian iya bejantil manah enggau pangan diri, lalu beserakup enggau Kristus. Bengunan nya majak besai, nyentukka iya nyadi rumah sembiang ti kudus ke Jehovah.*
22 Kita ke beserakup enggau Kristus mega didirika begulai nyadi endur alai Petara diau, laban kuasa kudus Iya bisi ba dia.
Nota Kaki
^ Tauka “jeman; sistem dunya.” Peda Penerang Leka Jaku, “Sistem dunya.”
^ Jaku Gerika, “pneu′ma.” Peda Penerang Leka Jaku, “Pneu′ma.”
^ Tauka “sistem dunya.” Peda Penerang Leka Jaku, “Sistem dunya.”
^ Tauka “digaga.”
^ Tauka “betutus.”
^ Tauka “ditutus.”
^ Jaku Asal, “siku mensia.”
^ Peda Penerang Leka Jaku.
^ Tauka “bebaik.”
^ Peda nota kaki ba Matthew 1:20.
