Esra 1:1-11
1 Ba taun keterubah Raja Sairus ari Persia merintah, Jehovah nentuka jaku ke dipadah Iya nengah Jeremiah dikeamatka. Nya alai, Jehovah meransang ati Raja Sairus ngambika madahka pesan ngagai semua endur ke dipegai perintah iya. Pesan nya mega ditulis, lalu tu meh utai ke dipadah ba pesan nya:
2 “Tu meh utai ke dipadah Raja Sairus ari Persia: ‘Jehovah, Petara ke merintah serega, udah meri semua perintah ke ba dunya ngagai aku. Iya mega ngasuh aku nirika Rumah ke Iya ba Jerusalem ke ba Judah.
3 Sapa bala kita ke nyembah Iya? Awakka Iya bisi enggau kita. Mupuk meh kita ngagai Jerusalem ke ba Judah, lalu dirika baru Rumah Jehovah, Petara orang Israel. Iya meh Petara ti bendar, lalu Rumah Iya suba bisi ba Jerusalem.*
4 Orang ke deka pulai kin deka bulih tulung ari bala jiran iya. Sida deka meri iya pirak, emas, sekeda reta sida, jelu tupi sida, enggau pemeri sukarela ke Rumah Petara ti bendar ba Jerusalem.’”
5 Udah nya, bala tuai suku orang Judah enggau orang Benjamin, bala imam, enggau orang Lewi besedia deka mupuk lalu nirika baru Rumah Jehovah ba Jerusalem. Petara ti bendar udah meransang ati semua sida ngereja pengawa nya.
6 Kelimpah ari meri pemeri sukarela, bala jiran sida mega meri pekekas ke digaga ari pirak enggau emas, sekeda reta sida, jelu tupi, enggau barang ti berega ngagai sida. Semua jiran sida ngereja tu laban deka nyukung sida.
7 Raja Sairus mega mulaika baru pekekas Rumah Jehovah. Sebedau tu, Nebukadnesar udah ngambi pekekas nya ari Jerusalem, lalu nyimpan nya ba dalam kuil petara iya.
8 Raja Sairus ari Persia ngasuh Mitredat mai semua pekekas nya pansut. Mitredat nya siku pegawai kewangan. Udah nya, Mitredat ngaga lis pasal semua pekekas nya, lalu meri lis nya ngagai siku tuai orang Judah ke benama Sesbasar.*
9 Tu meh lis pekekas nya: 30 iti bakul emas, 1,000 iti bakul pirak, 29 iti bakul ke bukai,
10 30 iti mangkuk emas ke mit, 410 iti mangkuk pirak ke mit, enggau 1,000 iti pekekas ke bukai.
11 Semua pekekas ke digaga ari emas enggau pirak nya bisi 5,400 iti. Sesbasar mai semua pekekas nya lebuh orang ke ditaban ngagai Babilon pulai ngagai Jerusalem.
Nota Kaki
^ Tauka engka, “lalu Iya meh Petara ke bisi ba Jerusalem.”
