Esra 10:1-44
10 Esra besampi sereta ngaku dosa ke bansa iya. Iya nyabak sereta besugang ba depan Rumah Petara ti bendar. Maya nya, mayuh orang Israel datai. Sida ke lelaki, indu, enggau anak mit ngelingi iya lalu sida bendar amat nyabak.
2 Udah nya, siku ari peturun Elam ke benama Sekaniah anak Jehiel bejaku ngagai Esra: “Kami enda setia ngagai Petara, laban kami udah kawin enggau indu bansa bukai ba menua tu. Taja pia, orang Israel agi bisi harapan.
3 Aram meh kitai ngaga sempekat enggau Petara. Kitai deka muru semua indu bansa bukai enggau anak ke diadaka sida. Kitai deka nitihka iring Jehovah enggau orang ke bebasaka* pesan Petara. Aram meh kitai ngasika Adat.
4 Angkat meh Esra, laban tu tanggungjawap nuan. Kami bisi enggau nuan. Nuan mesti berani lalu ngereja utai ti patut.”
5 Esra pan angkat lalu ngasuh bala tuai imam, orang Lewi, enggau semua orang Israel besumpah ngambika ngereja utai ke dipadahka sida. Nya alai, sida lalu besumpah.
6 Udah nya, Esra mupuk ari Rumah Petara ti bendar lalu mansang ngagai bilik* Jehohanan anak Eliasip. Ba dia, iya nadai makai sereta ngirup, laban iya balat tusah ati* ketegal orang ke kala dibuai menua nya enda setia.
7 Udah nya, sida madahka jaku gerah ba serata Judah enggau Jerusalem pasal semua orang, iya nya orang ke kala dibuai menua, patut begempuru magang ba Jerusalem.
8 Nitihka pemutus ke udah digaga bala pegawai enggau bala tuai, enti bisi orang ke enda datai dalam timpuh tiga hari, semua reta orang nya deka dirampas, lalu orang nya deka diburu ari bala orang Israel.*
9 Nyadi, semua orang Judah enggau orang Benjamin begempuru magang ba Jerusalem dalam timpuh tiga hari. Kena hari ke-20 dalam bulan kesemilan, semua sida duduk magang ba laman Rumah Petara ti bendar. Sida getar-getar natka diri laban ari bangat amat ujan sereta laban aum nya amat penting.
10 Udah nya, Imam Esra bediri lalu madah ngagai sida: “Kita enda setia laban kawin enggau indu bansa bukai. Utai ke digaga kita udah nambahka dosa orang Israel.
11 Nya alai, kita mesti ngaku dosa diri ngagai Jehovah, Petara aki ini kita, lalu kereja meh peneka Iya. Seraraka diri ari orang ba menua tu sereta ari bini kita ke bansa bukai.”
12 Semua orang ke begempuru nya pan nyaut enggau nyawa ti inggar: “Tiap iti utai ke dipadahka nuan deka dikereja kami magang.
13 Tang, mayuh amat orang ditu. Udah ga tu musin ujan. Enda tan kami bediri ba luar. Tentu pekara tu enda ulih diputarka sehari dua aja, laban mayuh ari kami udah ngereja dosa ti amat besai.
14 Nyadi, awakka bala pegawai kami meh ngarika semua kami ngatur pekara tu. Udah nya, semua orang ke ba kuta ke udah kawin enggau indu bansa bukai patut datai kitu ba maya ke udah ditetapka. Sida patut datai enggau bala tuai sereta bala hakim ari kuta sida empu. Nya baru Petara enda agi ringat ngagai kami pasal utai ke nyadi tu.”
15 Semina Jonatan anak Asahel enggau Jahseyah anak Tikbah aja ke enda setuju, lalu orang Lewi ke benama Mesulam enggau Sabetai nyukung seduai iya.
16 Taja pia, orang ke kala dibuai menua nya setuju deka ngereja utai ke dipadah. Ba hari keterubah dalam bulan ke-10, Imam Esra enggau bala tuai suku ke bisi nama dalam lis begempuru lalu mansik pekara nya.
17 Ba hari keterubah dalam bulan keterubah, sida pan tembu mansik pekara ke bekaul enggau semua lelaki ke kawin enggau indu bansa bukai.
18 Nya alai, sida nemu sekeda anak bala imam udah kawin enggau indu bansa bukai. Sida nya Maseyah, Elieser, Jarip, enggau Gedaliah. Sida nya ari peturun Jesua anak Jehosadak enggau bala menyadi lelaki iya.
19 Taja pia, sida besemaya deka muru bini sida. Ketegal sida udah bedosa, sida deka nyerahka siku bedus lelaki.
20 Tu mega nama orang ke udah bedosa: Hanani enggau Sebadiah ari peturun Imer;
21 Maseyah, Elijah, Semayah, Jehiel, enggau Usiah ari peturun Harim;
22 sereta Elionai, Maseyah, Ismail, Netanel, Josabat, enggau Eleasah ari peturun Pashur.
23 Kelimpah ari nya, bisi mega Josabat, Shimei, Kelayah (iya nya, Kelita), Petahiah, Judah, enggau Elieser ari peturun Lewi;
24 Eliasip ari bala penyanyi; sereta Salum, Telem, enggau Uri ari bala orang ke nyaga pintu.
25 Ari bala orang Israel: Ramiah, Isiah, Malkijah, Mijamin, Eleasar, Malkijah, enggau Benayah ari peturun Paros;
26 Mataniah, Sekariah, Jehiel, Abdi, Jerimot, enggau Elijah ari peturun Elam;
27 Elionai, Eliasip, Mataniah, Jerimot, Zabat, enggau Asisa ari peturun Zattu;
28 Jehohanan, Hananiah, Sabai, enggau Atlai ari peturun Bebai;
29 Mesulam, Maluk, Adayah, Jasup, Sil, enggau Jerimot ari peturun Bani;
30 Adna, Kelal, Benayah, Maseyah, Mataniah, Bezalel, Binui, enggau Manasi ari peturun Pahat-moap;
31 ari peturun Harim bisi Elieser, Isijah, Malkijah, Semayah, Shimeon,
32 Benjamin, Maluk, enggau Semariah;
33 ari peturun Hasum bisi Matenai, Matatah, Zabat, Elipelet, Jeremai, Manasi, enggau Shimei;
34 ari peturun Bani bisi Maadai, Amram, Uil,
35 Benayah, Bedeyah, Cheluhi,
36 Baniah, Meremot, Eliasip,
37 Mataniah, Matenai, enggau Jasu;
38 ari peturun Binui bisi Shimei,
39 Selemiah, Natan, Adayah,
40 Maknadebai, Sasai, Sharai,
41 Azarel, Selemiah, Semariah,
42 Salum, Amariah, enggau Josep;
43 lalu ari peturun Nebo bisi Jiel, Matitiah, Zabat, Sebina, Jadai, Joel, enggau Benayah.
44 Semua sida nya udah kawin enggau indu bansa bukai, tang sida muru bini sida enggau bala anak sida.
Nota Kaki
^ Tauka “nangika.”
^ Tauka “bilik makai.”
^ Tauka “ngulit.”
^ Tauka “ari raban orang ke kala dibuai ngagai menua bukai.”
