Esra 6:1-22
6 Udah nya, Raja Darius ngasuh orang meresa bup rekod ke bisi ba endur alai nyimpan reta ba Babilon.
2 Sida lalu tetemuka siti gulung surat ba kuta ke bisi kubu ba Ekbatana ke ba wilayah Media. Tu utai ke ditulis ba gulung surat nya:
3 “Ba taun ti keterubah Raja Sairus merintah, Raja Sairus meri pesan tu pasal Rumah Petara ba Jerusalem: ‘Rumah nya mesti didirika baru ngambika sida ulih nyerahka pemeri sida. Asas Rumah nya patut digaga enggau teguh. Peninggi Rumah nya patut 60 kiubit,* lalu buka iya 60 kiubit.
4 Dinding Rumah nya patut digaga ngena tiga lapis batu ti besai enggau selapis kayu. Perintah deka mayar semua ungkus ke dikena ngaga Rumah nya.
5 Nambahka nya, semua pekekas emas enggau pirak, ke udah dibai Nebukadnesar ngagai Babilon ari Rumah Petara ba Jerusalem, patut dipulaika baru. Semua pekekas nya patut disimpan ba Rumah Petara ba Jerusalem.’
6 “Nya alai, Tatenai, iya nya gabenor kawasan seberai Sungai Eupratis,* Setar-bosenai, enggau bala kaban seduai, iya nya bala pegawai kawasan seberai Sungai Eupratis, anang ngachau sida.
7 Anang ngachau pengawa orang ke ngaga Rumah Petara. Awakka gabenor enggau bala tuai orang Judah nirika baru Rumah Petara ba endur iya ti asal.
8 Kelimpah ari nya, aku mega meri kita arahan ngambika kita ngereja tu ke bala tuai orang Judah ke benung nirika baru Rumah Petara. Duit perintah, iya nya chukai ke digumpul ari kawasan seberai Sungai Eupratis, patut dikena melanja pengawa sida ngaga Rumah nya. Duit nya patut diberi ngagai sida enggau lengkas ngambika pengawa sida enda ngetu.
9 Tiap hari, kita mesti meri utai ke diguna sida, iya nya utai ke dipinta bala imam ba Jerusalem, baka sapi lelaki ke agi biak, bedus lelaki, enggau anak bedus nyadika pemeri tunu ke Petara ke ba serega, nyengkaum gandum, garam, wain, enggau minyak.
10 Nya deka nulung sida ngambika sida seruran ulih nyerahka pemeri ti ngelantangka ati Petara ke merintah serega, sereta besampika raja enggau bala anak iya ngambika sida gayu.
11 Aku mega udah netapka, barang sapa ke ngelanggar atur tu, sebatang tiang deka dichabut ari rumah iya, lalu iya deka digantung* ba tiang nya, lalu rumah iya deka nyadi jamban awam.*
12 Ngarapka Petara ke udah ngengkahka nama Iya ba endur nya ngalahka raja enggau orang ke ngelanggar atur tu, sereta orang ke deka nganchurka Rumah Petara ba Jerusalem. Aku, Darius, udah netapka atur tu. Titihka atur tu enggau lengkas.”
13 Tatenai, iya nya gabenor kawasan seberai Sungai Eupratis, Setar-bosenai, enggau bala kaban seduai iya, lalu ngereja semua utai ke diasuh Raja Darius enggau lengkas.
14 Ketegal diperansang jaku benabi ke dipadahka Nabi Hagai enggau uchu Ido ke benama Sekariah, bala tuai orang Judah neruska pengawa ngaga Rumah nya, lalu pengawa sida makin mujur. Sida tembu ngaga Rumah nya baka ke diasuh Petara orang Israel, Sairus, Darius, enggau Raja Artaserses ari Persia.
15 Rumah nya tembu digaga sida ba hari ketiga dalam bulan Adar,* iya nya ba taun keenam Raja Darius merintah.
16 Udah nya, orang Israel, bala imam, orang Lewi, enggau bala sida ke bukai ke kala dibuai ngagai menua bukai berasai amat gaga ati ngerasmika* Rumah Petara.
17 Lebuh ngerasmika Rumah Petara, sida nyerahka 100 iku sapi lelaki, 200 iku bedus lelaki, enggau 400 iku anak bedus. Sida mega nyerahka 12 iku kambin lelaki nyadika pemeri kena ngulihka pengampun dosa ke semua orang Israel. Siku kambin diserahka ke tiap iti raban bansa.
18 Bala imam enggau orang Lewi dibagi nitihka raban kena ngereja pengawa ke Petara ba Jerusalem. Raban nya dibagi nitihka utai ke ditulis ba bup Moses.
19 Sida ke kala dibuai ngagai menua bukai ngintu Pengerami Paska ba hari ke-14 dalam bulan ti keterubah.
20 Semua imam enggau orang Lewi pan nuchi diri magang. Pengudah sida nyadi tuchi, sida nyayat korban Paska ke semua orang ke kala dibuai ngagai menua bukai, ke bala imam ke bukai, enggau ke sida empu.
21 Udah nya, orang Israel, iya nya sida ke udah pulai baru pengudah dibuai ngagai menua bukai, makai korban nya. Orang bukai ke enggau sida mega makai korban nya. Orang tu meh ke udah badu ngereja pengawa ti kamah ke digaga bansa bukai, ngambika sida ulih nyembah Jehovah, Petara orang Israel.
22 Sida mega amat rindu ati ngintu Pengerami Roti ti Enda Beragi pengelama tujuh hari. Jehovah udah ngasuh sida berasai gaga ati, lalu Iya mega ngasuh raja Asiria lantang ati ngagai sida, ngambika raja nya nyukung sida begagaka Rumah Petara ti bendar, iya nya Petara orang Israel.
Nota Kaki
^ Kira-kira 26.7 m. Peda Rujukan B14.
^ Tauka “dipantang.”
^ Tauka engka, “endur alai muai sampah; tugung tai.”
^ Peda Rujukan B15.
^ Tauka “nyerahka.”
