Esra 7:1-28
7 Pengudah sesiti timpuh, maya Raja Artaserses ari Persia merintah, Esra* pulai ngagai Jerusalem. Esra nya anak Serayah, Serayah nya anak Asariah, Asariah nya anak Hilkiah,
2 Hilkiah nya anak Salum, Salum nya anak Sadok, Sadok nya anak Ahitup,
3 Ahitup nya anak Amariah, Amariah nya anak Asariah, Asariah nya anak Merayot,
4 Merayot nya anak Serahiah, Serahiah nya anak Usi, Usi nya anak Buki,
5 Buki nya anak Abisua, Abisua nya anak Pinehas, Pinehas nya anak Eleasar, lalu Eleasar nya anak tuai imam ke benama Aron.
6 Esra mupuk ari Babilon. Iya siku penyalin* ke amat nemu pasal Adat Moses,* iya nya Adat ke diberi Jehovah, Petara orang Israel. Nama-nama utai ke dipinta iya diberi raja magang laban Jehovah, Petara iya, bisi nulung iya.
7 Ba taun ti ketujuh Raja Artaserses merintah, sekeda ari orang Israel, bala imam, orang Lewi, bala penyanyi, bala orang ke nyaga pintu, enggau orang ke gawa ba Rumah Sembiang* mupuk ngagai Jerusalem.
8 Esra datai ba Jerusalem kena bulan kelima ba taun ti ketujuh Raja Artaserses merintah.
9 Kena hari keterubah ba bulan ti keterubah, iya mupuk ari Babilon lalu datai ba Jerusalem kena hari keterubah ba bulan ti kelima. Ba sepemanjai pejalai iya, Petara iya bisi nulung iya.
10 Esra udah nyediaka ati diri ngambika ulih belajarka Adat Jehovah,* lalu ngereja utai ke dipadah ba Adat nya. Iya mega deka ngajar atur enggau peraturan ke bisi ba Adat nya ngagai orang Israel.
11 Tu salinan surat ke diberi Raja Artaserses ngagai Imam Esra, ke mega siku penyalin* sereta orang ke landik belajarka pesan enggau atur ke diberi Jehovah ngagai orang Israel:
12 * “Ari Artaserses, raja atas semua raja, ngagai Imam Esra, ke mega penyalin* Adat Petara ke merintah serega: Tabi basa ngagai nuan.
13 Aku udah meri atur tu ngagai orang ke diau ba kawasan ke dipegai aku: Semua orang Israel, bala imam, enggau orang Lewi ulih mupuk enggau nuan enti sida deka pulai ngagai Jerusalem.
14 Aku enggau tujuh iku penasihat* aku ngasuh nuan nasat utai ke nyadi ba Judah enggau ba Jerusalem, kena nentuka orang ba dia amat nitihka Adat Petara nuan ke bisi ba nuan.
15 Bai meh pirak enggau emas ke diberi aku enggau bala penasihat aku. Kami ikhlas meri nya ngagai Petara orang Israel ke diau ba Jerusalem.
16 Bai mega semua pirak enggau emas ke diterima nuan ba semua wilayah Babilon, nyengkaum hadiah ti ikhlas ari bala rayat enggau bala imam ke Rumah Petara sida ba Jerusalem.
17 Kena meh duit nya lalu beli enggau jampat sapi lelaki, bedus lelaki, anak bedus, pemeri bijirin, enggau pemeri wain. Serahka semua pemeri nya ba atas alta Rumah Petara kita ba Jerusalem.
18 “Enti pirak enggau emas nya bisi laluh, barang ku nuan enggau bala nuan meh baka ni ka ngena iya, seagi-agi nya sejalai enggau peneka Petara kita.
19 Semua pekekas ke diberi ngagai nuan ke dikena bejalaika pengawa ba Rumah Petara nuan patut dibai nuan ngagai Petara ba Jerusalem.
20 Enti bisi utai bukai ke diguna Rumah Petara nuan, nuan ulih ngena duit perintah kena nyediaka utai nya.
21 “Aku, Raja Artaserses, udah meri atur ngagai semua pegawai kewangan ke ba kawasan seberai Sungai Eupratis.* Sida mesti lengkas nyediaka semua utai ke dipinta Imam Esra, ke mega penyalin* Adat Petara ke merintah serega.
22 Sida ulih meri nyentukka 3,420 kilogram* pirak, gandum 100 guni,* 2,200 liter* wain, enggau 2,200 liter minyak. Garam ulih diberi nitihka pemayuh ke diguna.
23 Semua utai ke diasuh Petara ke merintah serega bekaul enggau Rumah Iya patut dikereja enggau ransing, ngambika Iya enda ringat ngagai bala rayat aku enggau bala anak aku.
24 Pia mega, anang minta chukai* ari bala imam, orang Lewi, bala penyanyi, orang ke nebah perengka musik, orang ke nyaga pintu, orang ke gawa ba Rumah Sembiang,* enggau pekereja ke bukai ke gawa ba dia.
25 “Nuju nuan Esra, kena meh penemu-dalam ke diberi Petara ngagai nuan kena ngelantik bala pegawai majistret enggau bala hakim, ngambika sida ulih ngakim semua orang ke ba kawasan seberai Sungai Eupratis, iya nya sida ke nemu Adat Petara nuan. Nuan mega patut ngajar sapa-sapa ke enda nemu pasal Adat nya.
26 Sapa-sapa ke enda ngasika Adat Petara nuan enggau adat raja patut diukum enggau lengkas sekalika nya diukum bunuh, dibuai ari menua, didenda, tauka dijil.”
27 Puji meh Jehovah, Petara aki ini kitai, ke udah meransang ati raja ngambika ngaga Rumah Jehovah ba Jerusalem nyadi manah agi.
28 Iya udah ngayanka pengerindu ti setia ngagai aku ba depan raja, bala penasihat raja, enggau semua pegawai raja ke tinggi pangkat. Aku bisi pemerani laban Petara aku, Jehovah, bisi nulung aku. Udah nya, aku mai bala tuai Israel mupuk enggau aku.
Nota Kaki
^ Reti nya “Tulung.”
^ Tauka “orang ke ngupi Adat.”
^ Tauka “amat landik ngupi Adat Moses.”
^ Tauka “Netinim.” Jaku Asal, “orang ke diberi.”
^ Tauka “Ati Esra keran deka belajarka Adat Jehovah.”
^ Tauka “orang ke ngupi Adat.”
^ Tauka “orang ke ngupi Adat.”
^ Asal iya, Esr 7:12 ngagai 7:26 ditulis dalam bansa jaku Aramaik.
^ Tauka “penyanding penemu.”
^ Tauka “orang ke ngupi Adat.”
^ Jaku Asal, “100 talenta.” Peda Rujukan B14.
^ Jaku Asal, “100 kor.” Peda Rujukan B14.
^ Jaku Asal, “100 bath.” Peda Rujukan B14.
^ Tauka “Netinim.” Jaku Asal, “orang ke diberi.”
