Esra 8:1-36
8 Tu lis ruang bilik bala tuai suku ke mupuk enggau aku ari Babilon maya jeman Raja Artaserses merintah:
2 Gersom ari peturun Pinehas; Daniel ari peturun Itamar; Hatus ari peturun David;
3 Sekariah ari peturun Sekaniah enggau Paros, lalu bisi 150 iku lelaki enggau Sekariah;
4 Elieho-enai anak Serahiah ari peturun Pahat-moap, lalu bisi 200 iku lelaki enggau Elieho-enai;
5 Sekaniah anak Jahasiel ari peturun Zattu, lalu bisi 300 iku lelaki enggau Sekaniah;
6 Ebet anak Jonatan ari peturun Adin, lalu bisi 50 iku lelaki enggau Ebet;
7 Jesayah anak Ataliah ari peturun Elam, lalu bisi 70 iku lelaki enggau Jesayah;
8 Sebadiah anak Mikael ari peturun Sepatiah, lalu bisi 80 iku lelaki enggau Sebadiah;
9 Obadiah anak Jehiel ari peturun Joap, lalu bisi 218 iku lelaki enggau Obadiah;
10 Selomit anak Josipiah ari peturun Bani, lalu bisi 160 iku lelaki enggau Selomit;
11 Sekariah anak Bebai ari peturun Bebai, lalu bisi 28 iku lelaki enggau Sekariah;
12 Johanan anak Hakatan ari peturun Asgat, lalu bisi 110 iku lelaki enggau Johanan;
13 Elipelet, Jiel, enggau Semayah ari peturun Adonikam (sida tiga meh ke penudi pulai), lalu bisi 60 iku lelaki enggau sida;
14 sereta Yutai enggau Zabut ari peturun Bikvai, lalu bisi 70 iku lelaki enggau seduai iya.
15 Aku ngempuruka sida ba tebing sungai ke mengalir ngagai Ahaba. Kami nirika kem lalu diau ba dia pengelama tiga hari. Tang, lebuh aku beratika semua orang enggau bala imam, aku nadai meda orang Lewi ba dia.
16 Aku pan ngangauka bala tuai, iya nya Elieser, Ariel, Semayah, Elnatan, Jarip, Elnatan, Natan, Sekariah, enggau Mesulam. Aku mega ngangauka dua iku pengajar, iya nya Joyarip enggau Elnatan.
17 Udah nya, aku ngasuh sida betemu enggau siku tuai ke benama Ido ba Kasipia. Aku ngasuh sida madah ngagai Ido enggau bala iya ba Kasipia ngambika nganjung orang gawa ba Rumah Petara kami. (Bala Ido nya orang ke gawa ba Rumah Sembiang.*)
18 Ketegal Petara kami udah nulung kami, sida lalu nganjung Serebiah, bala anak iya, enggau bala iya ke lelaki. Semua sida 18 iku lelaki. Serebiah nya orang ke bepenemu-dalam ke datai ari peturun Mahli. Mahli nya uchu Lewi anak Israel.
19 Sida mega nganjung Hasabiah enggau Jesayah ari peturun Merari, nyengkaum bala Jesayah ke lelaki enggau bala anak sida. Semua sida 20 iku lelaki.
20 Pia mega, bisi 220 iku orang ke gawa ba Rumah Sembiang* ke udah direjista. Suba, sida meh ke diasuh David enggau bala pegawai iya nulung orang Lewi.
21 Udah nya, ba Sungai Ahaba, aku madahka jaku gerah pasal kami patut bepuasa sereta ngemaruhka diri ba depan Petara. Kami minta Petara ngiring pejalai kami sereta nyaga kami, bala anak kami, enggau semua barang kami.
22 Aku malu deka minta raja nyediaka bala soldadu enggau raban soldadu ke nepan kuda kena ngelindung kami ari bala munsuh ba sepemanjai pejalai kami, laban kami kala madah ngagai raja: “Petara kami deka nulung semua orang ke ngiga Iya, tang Iya deka ngayanka pengering enggau pengeringat Iya ngagai semua orang ke ninggalka Iya.”
23 Nya alai, kami bepuasa lalu madahka peminta kami ngagai Petara pasal tu. Iya pan ningaka peminta kami.
24 Aku milih 12 iku tuai imam, iya nya Serebiah enggau Hasabiah, sereta 10 iku bala seduai iya.
25 Udah nya, aku nimbang pirak, emas, enggau pekekas ke deka dikena ba Rumah Petara kami. Semua pemeri nya diberi raja, bala penasihat iya, bala pegawai iya, enggau semua orang Israel ke bisi ba dia. Semua pemeri nya diberi aku ngagai bala tuai imam nya.
26 Tu meh penyampau pemeri ke udah ditimbang aku, sereta ke udah diberi aku ngagai sida: Kira-kira 22 tan* pirak, 100 iti pekekas pirak ke ngemerat kira-kira 68 kilogram,* 3,420 kilogram* emas,
27 20 iti mangkuk emas ti mit ke berega 1,000 darik,* enggau 2 iti pekekas temaga ti tulin ti bewarna mirah sereta bekilat. Pekekas nya sama berega baka emas.
28 Udah nya, aku madah ngagai sida: “Kita udah dikuduska ke Jehovah, nyengkaum pekekas tu. Pirak enggau emas tu pemeri ti sukarela ke Jehovah, Petara aki ini kita.
29 Jaga manah-manah barang tu nyentukka kita datai ba Jerusalem. Ba bilik* Rumah Jehovah, kita patut nimbang barang tu ba depan bala tuai imam, orang Lewi, enggau bala tuai suku orang Israel.”
30 Pengudah ditimbang, bala imam enggau orang Lewi pan mai pirak, emas, enggau pekekas nya ngagai Rumah Petara kami ba Jerusalem.
31 Pengujung iya, ba hari ke-12 ba bulan ti keterubah, kami mupuk ari Sungai Ahaba ngagai Jerusalem. Ba sepemanjai pejalai kami, Petara kami bisi nulung kami. Iya nyelamatka kami ari bala munsuh sereta ari orang ke nyerang kami enggau ngenyit.
32 Nyadi, kami pan datai ba Jerusalem lalu diau ba dia pengelama tiga hari.
33 Ba hari keempat, kami nimbang pirak, emas, enggau pekekas ba Rumah Petara kami, lalu nyerahka nya ngagai Imam Meremot anak Urijah. Bisi mega orang enggau Meremot, iya nya Eleasar anak Pinehas, enggau dua iku orang Lewi ke benama Josabat anak Jesua enggau Noadiah anak Binui.
34 Semua utai nya diitung sereta ditimbang, lalu pemerat semua utai nya direkod magang.
35 Orang ke udah pulai pengudah dibuai ngagai menua bukai nyerahka pemeri tunu ngagai Petara orang Israel. Sida nyerahka 12 iku sapi lelaki ke semua orang Israel, 96 iku bedus lelaki, 77 iku anak bedus lelaki, enggau 12 iku kambin lelaki nyadika pemeri kena ngulihka pengampun dosa. Semua nya diserah nyadika pemeri tunu ke Jehovah.
36 Udah nya, kami madahka pesan raja ngagai bala pemerintah wilayah* enggau bala gabenor ke ba kawasan seberai Sungai Eupratis.* Sida nyukung bala rayat lalu meri utai ke diguna Rumah Petara ti bendar.
Nota Kaki
^ Tauka “Netinim.” Jaku Asal, “orang ke diberi.”
^ Tauka “Netinim.” Jaku Asal, “orang ke diberi.”
^ Jaku Asal, “650 talenta.” Peda Rujukan B14.
^ Jaku Asal, “2 talenta.”
^ Jaku Asal, “100 talenta.”
^ Iya nya, duit seling emas Persia. Peda Rujukan B14.
^ Tauka “bilik-bilik makai.”
^ Dalam jaku asal, gelar tu mai reti “orang ke nyaga pengelikun perintah,” lalu merujuk ngagai gabenor wilayah ba empayar Persia.
