Esra 9:1-15
9 Pengudah semua utai nya tembu dikereja, bala tuai datai ngagai aku lalu madahka: “Orang Israel, bala imam, enggau orang Lewi agi enda nyeraraka diri ari orang ke diau ba menua tu, iya nya orang Kanaan, orang Het, orang Peris, orang Jebus, orang Amon, orang Moap, orang Ejip, enggau orang Amor. Sida mega nitihka bansa bukai ngereja pengawa ke dipegedika Petara.
2 Sida mega udah ngambi bala anak indu orang nya nyadika bini sida empu enggau ke bala anak lelaki sida. Peturun ti kudus nyau udah bechampur enggau orang ba menua tu. Bala tuai enggau bala sida ke tinggi pangkat meh ke dulu ngereja penyalah tu, lalu nyadi enda setia.”
3 Pengudah ninga nya, aku pan nyarikka gari diri lalu mabut sekeda buk enggau ragum aku. Aku lalu nudukka diri, laban balat amat tekenyit.
4 Udah nya, semua sida ke balat bebasaka* jaku Petara orang Israel begelumu ngelingi aku. Sida mega tusah ati, laban orang ke kala dibuai ngagai menua bukai nya enda setia. Aku balat amat tekenyit lalu duduk sampai ke lemai maya orang nyerahka pemeri bijirin.
5 Lemai nya, maya orang nyerahka pemeri bijirin, aku pan bediri lalu badu agi tusah ati. Udah nya, aku besugang lalu ngangkatka jari aku ngagai Petara aku, Jehovah. Maya nya, aku agi ngena gari aku ke charik.
6 Ku aku madahka: “O Petara aku, aku malu amat lalu ngasaika diri enda layak deka besampi ngagai Nuan. O Petara aku, dosa kami nyau betugung tinggi agi ari pala kami, lalu penyalah kami nyau bedunjung nyentuk ke langit.
7 Dosa kami mayuh amat kenyau ari jeman aki ini kami nyentukka seharitu. Ketegal dosa kami nya, kami, bala raja kami, enggau bala imam kami udah diserahka ngagai bala raja bansa bukai. Kami dibunuh ngena pedang, ditangkap, dirumpak, sereta dikemaluka baka ke nyadi seharitu.
8 Taja pia, Jehovah, Petara kami, dalam timpuh ti enda lama, Nuan udah manah amat enggau kami. Nuan udah nyelamatka sekeda ari bala kami, lalu nentuka kami likun ba endur Nuan ti kudus. O Petara kami, nya ngasuh mata kami beperenching ketegal pengaga ati, lalu nya ngasuh ati kami lantang mimit taja pan kami nyadi ulun.
9 Taja pan kami nyadi ulun, Nuan enda ninggalka kami lalu enda nejuka kami terus nyadi ulun. Tang, Nuan ngayanka pengerindu ti setia ngagai kami ba depan bala raja Persia. Nya alai, kami bulih pengering baru kena ngaduka Rumah Nuan ke udah runtuh nya, lalu berasai likun* ba Judah enggau ba Jerusalem.
10 “O Petara kami, nama agi utai ke ulih disebut kami diatu pengudah utai tu nyadi? Kami enda ngasika pesan Nuan,
11 ke diberi Nuan nengah bala nabi Nuan. Ku Nuan madahka: ‘Menua ke deka diempu kita nya menua ti kamah, laban orang ba dia ngamahka menua nya. Sida ngereja pengawa ti dipegedika Aku. Ari ujung siti ngagai ujung siti, serata menua nya penuh laban pengawa sida ti kamah.
12 Nya alai, anang nejuka anak indu kita kawin enggau anak lelaki sida, lalu anang ngambi anak indu sida nyadika bini anak lelaki kita. Anang nulung sida idup lantang tauka ngulihka pengaya. Nya baru kita deka nyadi majak kering sereta makai asil ti manah ari menua nya, lalu menua nya deka diempu bala anak kita nyentukka belama iya.’
13 Diatu semua utai tu nyadi ba kami, laban kami udah ngereja mayuh dosa sereta ngereja mayuh utai ti jai. Taja pia, O Petara kami, ukum ke diterima kami enda setipak enggau penyalah ke udah digaga kami. Nuan indah ngelepaska kami.
14 Enti pia, patut kami ngelanggar pesan Nuan baru, lalu kawin* enggau orang ke ngereja utai ti dipegedika Nuan? Endaka nya deka ngasuh Nuan ringat, lalu ngemunaska kami magang nyentukka nadai siku pan ke selamat?
15 O Jehovah, Petara orang Israel, kami datai ngagai Nuan laban kami udah ngereja penyalah. Kebendar iya, kami enda layak datai ngagai Nuan ketegal utai ke udah digaga kami. Taja pia, Nuan Petara ti lurus. Nya alai, sekeda ari bala kami agi idup nyentukka seharitu.”
Nota Kaki
^ Tauka “nangika.”
^ Tauka “lalu Nuan meri kami dinding batu.”
^ Tauka “kawin kena ngulihka kaul ti rapat.”
