Ester 1:1-22
1 Tu utai ke nyadi maya jeman Ahasurus.* Iya merintah 127 iti wilayah ari India sampai ngagai Etiopia.*
2 Maya nya, Raja Ahasurus merintah ari istana* ba Sushan.*
3 Ba taun ti ketiga iya merintah, iya nyediaka pengerami makai besai ke bala tuai enggau bala pegawai iya. Bala ketuai soldadu Persia enggau Media, bala orang ke tinggi pangkat, enggau bala tuai wilayah datai ngagai pengerami nya.
4 Pengelama 180 hari, iya mandangka pengaya enggau pemanah perintah iya, sereta pengering enggau pemesai mulia iya ngagai sida.
5 Pengudah timpuh nya, raja nyediaka pengerami makai besai ba laman taman istana raja. Iya nyediaka pengerami nya ke semua orang, enda ngira orang ke tinggi pangkat tauka orang biasa, ke ba istana ba Sushan. Pengerami nya diatur pengelama tujuh hari.
6 Laman taman nya diias ngena kain tirai ke bewarna burak enggau biru, lalu ditanchang ngena tali ke digaga ari kain ungu* enggau kain burak. Semua tirai nya digantungka ba gelang-gelang pirak ke udah dipasangka ba tiang marmar. Kelimpah ari nya, bisi mega kerusi-kerusi panjai ke digaga ari emas enggau pirak. Semua kerusi nya diengkahka ba atas lantai ke digaga ngena batu mirah, mutiara, enggau batu marmar ke bewarna burak enggau chelum.
7 Wain dienahka ngena cawan emas, lalu tiap iti cawan emas nya enda sebaka. Amat mayuh wain disediaka laban raja amat kaya.
8 Raja nadai ngaga atur ke maksa* orang ngirup, laban iya enggau bala pegawai istana iya udah ngaga atur ngambika tiap iku orang ulih ngereja utai nitihka peneka diri.
9 Kuin Vasti mega nyediaka pengerami makai besai ke bala indu ba istana Raja Ahasurus.
10 Ba hari ti ketujuh, raja balat gaga ati pengudah ngirup wain. Nya alai, iya ngangauka tujuh iku pegawai istana, ke mega nyadi penulung iya empu, iya nya Mehuman, Bista, Harbona, Bikta, Abakta, Setar, enggau Karkas.
11 Iya ngasuh sida mai Kuin Vasti ngagai iya. Kuin Vasti diasuh ngena makota* diraja. Kuin amat bajik, lalu raja deka mandangka pemajik iya ngagai bala tuai sereta bala rayat.
12 Tang, Kuin Vasti majak madahka diri enggai ngasika pesan raja ke dipadah nengah pegawai istana. Nya alai, raja balat amat ringat.
13 Udah nya, raja minta penemu ari orang ke landik pasal atur maya jeman nya. (Raja seruran berandau enggau sida, laban sida landik pasal adat enggau undang-undang.
14 Orang ke pemadu rapat enggau raja nya Karsena, Setar, Admata, Tarsis, Meres, Marsena, enggau Memukan. Sida nya meh tujuh iku bala tuai Persia enggau Media. Sida meh ke selalu betemu enggau raja, lalu sida bisi pangkat ti pemadu tinggi ba perintah).
15 Ku raja madah: “Aku udah ngasuh bala pegawai istana madahka pesan aku, Raja Ahasurus, ngagai Kuin Vasti, tang iya enggai ngasika pesan aku. Nyadi, enti nitihka adat, nama patut digaga ngagai iya?”
16 Ku Memukan bejaku ba depan raja enggau bala tuai: “Kuin Vasti ukai aja ngereja penyalah ngagai raja, tang mega ngagai semua bala tuai enggau semua rayat ke ba semua wilayah ke dipegai Raja Ahasurus.
17 Utai ke digaga kuin nya deka ditemu semua indu ke udah belaki, lalu tu ulih ngasuh sida enda bebasaka laki sida. Sida deka madah: ‘Indah Kuin Vasti deh enggai datai lebuh Raja Ahasurus ngangauka iya.’
18 Seharitu, bala bini pegawai Persia enggau Media ke nemu pasal utai ke udah digaga kuin, tentu deka nyebut utai ti sama ngagai laki sida. Utai tu ulih ngasuh pemenchi enggau pengeringat nyadi.
19 Enti tuan raja setuju, gaga meh siti pesan diraja ke madahka Kuin Vasti enda tau agi datai betemu enggau raja. Perintah nya patut ditulis ba undang-undang Persia enggau Media, ngambika perintah nya enda ulih dikinsil. Udah nya, beri meh pangkat kuin nya ngagai indu bukai ke manah agi ari iya.
20 Lebuh semua rayat ba kawasan ti luas ke dipegai nuan ninga pasal pesan nya, semua indu ke udah belaki tentu deka bebasaka laki sida, enda ngira laki sida nya orang ke tinggi pangkat tauka orang biasa.”
21 Raja enggau bala tuai rindu ninga penemu nya, lalu raja pan ngereja utai ke dipadahka Memukan.
22 Nyadi, raja ngirumka surat ngagai semua wilayah ke dipegai iya. Tiap iti wilayah nerima surat ke ditulis ngena tulisan sereta tiap iti bansa jaku ke dikena ba wilayah nya empu. Surat nya madahka laki patut nyadi tuai bilik,* lalu iya patut ngena bansa jaku iya empu ba ruang bilik iya.
Nota Kaki
^ Merujuk ngagai Serses I, iya nya anak lelaki Darius ti Tebilang (Darius Hystaspis).
^ Tauka “Kus.”
^ Tauka “kuta ke bisi kubu.”
^ Tauka “Susa.”
^ Tauka “kain ungu ke digaga ari bulu bedus.”
^ Tauka “nagang.”
^ Tauka “serban.”
^ Tauka “tuan.”
