Ester 3:1-15
3 Pengudah sesiti timpuh, Raja Ahasurus nikika pangkat siku orang Agak ke benama Haman anak Hamedata. Raja meri iya penuduk ti tinggi agi ari semua bala tuai ke bukai.
2 Raja meri pesan ngasuh semua pegawai istana ke ba pintu istana besugang sereta meremi ngagai Haman kena nunjukka basa. Tang, Mordikai enggai ngereja nya.
3 Nyadi, bala pegawai ke ba pintu istana nya nanya Mordikai: “Nama kebuah nuan enda ngasika pesan raja?”
4 Tiap hari, sida deka nanya iya tanya ti sama, tang Mordikai enggai mendingka sida. Udah nya, sida madahka pasal nya ngagai Haman, laban deka nemu sekalika utai ke digaga Mordikai nya ulih diterima tauka enda. Mordikai kala madahka sida iya orang Judah.
5 Lebuh Haman meda Mordikai enggai besugang sereta meremi ngagai iya, Haman pan balat amat ringat.
6 Tang, Haman enda puas ati enti iya munuh Mordikai aja, laban orang bisi madahka iya pasal orang ke sebansa enggau Mordikai. Nya alai, Haman pan ngiga chara kena ngemunaska semua orang Judah, iya nya semua orang ke sebansa enggau Mordikai, ke ba semua kawasan ke dipegai Ahasurus.
7 Kena bulan ti keterubah, iya nya bulan Nisan,* kena taun ke-12 Raja Ahasurus merintah, sida muai Pur (iya nya, undi) ba depan Haman kena nentuka hari enggau bulan utai nya patut nyadi. Undi nya pan labuh ba bulan ke-12, iya nya bulan Adar.*
8 Ku Haman bejaku ngagai Raja Ahasurus: “Tuan raja, bisi siti bansa ke diau ngachir ba semua wilayah ke dipegai nuan. Adat sida lain ari adat semua bansa bukai, lalu sida enda ngasika atur raja. Enda manah enti tuan raja nejuka sida baka nya.
9 Enti tuan raja setuju, tulis meh pesan diraja ke ngasuh sida dipunaska. Aku deka mayar 342,000 kilogram* pirak ngagai bala pegawai, ngambika disimpan ba endur alai nyimpan reta perintah.”*
10 Nyadi, raja muka tinchin ari jari iya lalu meri nya ngagai orang Agak nya, iya nya Haman anak Hamedata, ke mega munsuh orang Judah. Tinchin nya bisi chop diraja.
11 Ku raja madah ngagai Haman: “Duit pirak enggau orang ari bansa nya diserahka aku ngagai nuan. Gaga aja nama-nama utai ti patut ba runding nuan.”
12 Kena hari ke-13 ba bulan ti keterubah, raja ngangauka bala sekretari iya. Sida nulis semua pesan ke dipadah Haman lalu ngirumka surat nya ngagai bala pemerintah wilayah, bala gabenor wilayah, enggau bala tuai tiap iti bansa. Surat nya ditulis ngena tulisan sereta bansa jaku ke dikena ba tiap iti wilayah sereta tiap iti bansa. Surat nya ditulis dalam nama Raja Ahasurus sereta dichop ngena tinchin raja.
13 Surat nya dikirumka orang ke gawa nganjung pesan raja ngagai semua wilayah ke dipegai raja. Nitihka surat nya, semua orang Judah, nyengkaum sida ke biak, sida ke tuai, sida ke indu, enggau anak mit patut dibunuh sereta dipunaska magang dalam timpuh sehari aja. Utai nya patut digaga kena hari ke-13 ba bulan ke-12, iya nya bulan Adar. Semua reta sida mega patut dirampas.
14 Utai ke dipadah ba surat nya patut ditetapka nyadi undang-undang ba tiap iti wilayah, lalu patut dipadahka ngagai semua orang ngambika sida besedia sebedau hari nya datai.
15 Orang ke gawa nganjung pesan raja terus mupuk pengudah diasuh raja. Undang-undang nya digaga ba istana ba Sushan. Maya nya, raja enggau Haman sama duduk sereta ngirup, tang orang ba kuta Sushan begau magang.
Nota Kaki
^ Peda Rujukan B15.
^ Peda Rujukan B15.
^ Jaku Asal, “10,000 talenta.” Peda Rujukan B14.
^ Tauka engka, “Aku deka nyimpan 342,000 kg pirak ba endur alai nyimpan reta perintah kena orang ngereja pengawa tu.”
