Ester 4:1-17
4 Lebuh Mordikai nemu pasal semua utai ke udah nyadi, iya nyarikka gari diri lalu ngerasukka kain guni. Iya mega naburka amau ba atas pala iya empu. Udah nya, iya bejalai ngagai tengah kuta lalu rauh-rauh nyabak.
2 Iya semina bejalai naka pintu istana raja, laban orang ke ngena kain guni enda tau tama nengah pintu nya.
3 Orang Judah ba tiap iti wilayah ke nerima pesan raja nya, balat amat tusah ati.* Sida bepuasa lalu bekeduie sereta rauh-rauh nyabak. Mayuh ari bala sida gali ba atas kain guni enggau amau.
4 Bala indu ke ngintu Kuin Ester enggau bala pegawai tinggi* Ester madah ngagai Ester utai ke udah nyadi. Tu ngasuh iya balat amat tusah ati. Udah nya, iya nganjung gari ngagai Mordikai, ngambika Mordikai enda ibuh agi ngena kain guni. Tang, Mordikai enggai nerima utai nya.
5 Nya alai, Ester pan ngangauka Hatak, iya nya siku pegawai tinggi ke udah diasuh raja gawa ke Ester. Ester ngasuh Hatak nanya Mordikai nama utai ke udah nyadi sereta nama kebuah utai nya nyadi.
6 Hatak pan mupuk betemu enggau Mordikai ba dataran awam kuta nya, ke ba depan pintu istana raja.
7 Mordikai pan madahka semua utai ke udah nyadi ngagai iya. Mordikai mega madahka penyampau duit ke disemayaka Haman kena ngemunaska orang Judah. Duit nya deka disimpan ba endur alai nyimpan reta perintah.
8 Mordikai mega meri Hatak siti salinan surat ke udah digaga ba Sushan, pasal bansa sida ke deka dipunaska. Iya ngasuh Hatak nunjukka surat nya ngagai Ester lalu nerangka nya ngagai Ester. Iya mega minta ngambika Ester betemu enggau raja lalu bebendar minta kasih ari raja, ngarika bansa Ester empu.
9 Udah nya, Hatak pulai baru ngagai Ester lalu madahka utai ti udah dipadahka Mordikai.
10 Ester pan ngasuh Hatak madahka tu ngagai Mordikai:
11 “Sapa-sapa ke datai ngagai laman dalam istana raja deka diukum bunuh, enti raja nadai ngangauka orang nya kia. Semua bala pegawai raja enggau bala rayat ba semua wilayah ke dipegai raja nemu pasal nya. Tang, enti raja ngunjurka tungkat emas diraja ngagai orang nya, iya deka ditejuka idup. Naka ke diatu, udah 30 hari raja nadai ngangauka aku.”
12 Pengudah Mordikai ninga saut Ester,
13 iya lalu ngirumka pesan tu ngagai Ester: “Anang ngumbai diri lebih agi selamat ari orang Judah ke bukai, semina ketegal nuan diau ba istana.
14 Enti nuan enda ngereja nama-nama utai maya tu, agi meh orang Judah deka bulih tulung lalu diselamatka nengah chara bukai. Tang, nuan enggau bala kaban belayan nuan deka dipunaska. Ni nemu, engka tu meh tuju nuan nyadi kuin ngambika ulih nulung bansa nuan.”
15 Ku Ester nyaut Mordikai:
16 “Gempuruka semua orang Judah ke bisi ba Sushan, lalu bepuasa meh ke aku. Anang makai tauka ngirup pengelama tiga hari enggau tiga malam. Aku enggau bala indu ke ngintu aku mega deka sama bepuasa. Udah nya, aku deka betemu enggau raja, taja pan nya ngelanggar undang-undang. Enti sema aku mati, nadai ku enggau meh.”
17 Mordikai pan mupuk lalu ngereja semua utai ke dipinta Ester.
