Ester 5:1-14
5 Ba hari ti ketiga, Ester ngena gari diraja, lalu iya bediri ba laman dalam ba rumah raja, ke bisi ba depan istana raja. Maya nya, raja benung duduk ba kerusi diraja ke betunga enggau pintu penama.
2 Lebuh raja nya meda Kuin Ester bediri ba laman nya, raja nya pan gaga ati, lalu ngunjurka tungkat emas diraja ngagai Ester. Ester datai semak ngagai raja nya, lalu negu ujung tungkat nya.
3 Raja nya pan nanya iya: “Bisi nama-nama utai Kuin Ester? Bisi utai ke ka dipinta nuan? Indah setengah ari perintah aku pan deka diberi aku ngagai nuan.”
4 Ku Ester nyaut: “Enti tu ngelantangka ati tuan raja, aku deka nyediaka makai besai, lalu aku deka mai nuan enggau Haman sama datai seharitu.”
5 Raja pan meri pesan tu: “Asuh Haman datai jampat baka ke dipinta Ester.” Raja enggau Haman pan datai makai enggau Ester.
6 Lebuh sida benung ngirup wain, raja lalu nanya Ester: “Nama utai ke ka dipinta nuan? Nama-nama utai ke dipinta nuan deka diberi aku ngagai nuan magang. Indah setengah ari perintah aku deh deka diberi aku ngagai nuan.”
7 Ku Ester nyaut: “Tu meh utai ke dipinta aku:
8 Enti aku udah ngelantangka ati tuan raja lalu tuan raja deka meri utai ke dipinta aku, aku deka mai tuan raja enggau Haman datai makai begulai enggau aku pagila. Pagila baru aku madah utai ke deka dipinta aku.”
9 Ba hari nya, Haman balat amat gaga ati lebuh iya pulai. Tang, lebuh iya meda Mordikai ke ba pintu istana raja enda bediri sereta enda takut ke iya, Haman pan balat amat ringat ngagai Mordikai.
10 Taja pia, Haman nagang diri lalu pulai ke rumah iya. Udah nya, iya ngasuh bala kaban iya enggau bini iya, Seres, datai.
11 Haman balat amat temegah bejaku pasal pengaya diri, pasal pemayuh anak lelaki iya, pasal baka ni raja udah nikika pangkat iya, sereta baka ni raja udah ngemuliaka iya tinggi agi ari bala tuai enggau bala pegawai raja ke bukai.
12 Ku Haman nampung baru: “Ukai nya aja, Kuin Ester mega bisi mai aku makai begulai enggau raja. Aku aja bai iya, au. Pagila pan, iya mai aku baru makai enggau raja.
13 Tang, aku agi enda puas ati seagi-agi aku meda Mordikai, orang Judah nya, duduk ba pintu istana raja.”
14 Udah nya, bini iya, Seres, enggau semua bala kaban iya madahka: “Enti pia, gaga tiang ke ngeninggi kira-kira 22 meter.* Pagi pagila, padah ngagai raja, Mordikai patut digantung ba tiang nya. Udah nya, baru nuan ulih lantang ati makai begulai enggau raja.” Haman pan rindu ninga utai ke dipadah sida nya. Nyadi, iya pan ngasuh orang ngaga tiang nya.
Nota Kaki
^ Jaku Asal, “50 kiubit.” Peda Rujukan B14.
