Ester 6:1-14
-
Mordikai dimuliaka raja (1-14)
6 Malam nya, raja enda ulih tinduk. Nya alai, iya ngasuh orang ngambi bup sejarah pasal jeman nya, lalu minta orang macha bup nya ke iya.
2 Dalam bup nya, bisi rekod pasal Mordikai ke udah ngeriput pasal Biktana enggau Teres ke bisi pelan deka munuh Raja Ahasurus. Biktana enggau Teres nya pegawai istana ke nyaga pintu.
3 Ku raja nanya: “Nama utai ke udah digaga kitai kena nunjukka terima kasih kitai ngagai Mordikai?” Ku bala pegawai ke nyadi penulung raja nyaut: “Nadai, tuan raja.”
4 Udah nya, raja nanya: “Sapa ke ba laman nyin?” Maya nya, Haman bisi ba laman luar istana, laban iya deka bejaku ngagai raja pasal pelan iya ke deka ngantung Mordikai ba tiang ke udah digaga ke Mordikai.
5 Ku bala penulung raja madahka: “Haman ke bediri ba laman nya, tuan raja.” Nyadi, raja pan madah: “Asuh iya tama.”
6 Lebuh Haman tama, raja lalu nanya iya: “Nama utai ke patut digaga aku enti aku deka ngemuliaka sesiku orang?” Ku Haman bejaku dalam ati: “Sapa ke deka diberi raja mulia nya? Nadai orang bukai pelaba ku, enti ukai aku.”
7 Ku Haman nyaut raja: “Tu utai ke patut digaga tuan raja enti tuan raja deka ngemuliaka orang nya:
8 Sediaka gari diraja ke dikena tuan raja sereta kuda ke ditepan raja. Pia mega, engkahka hiasan diraja ba pala kuda nya.
9 Udah nya, asuh siku ari pegawai ke tinggi pangkat ngatur gari enggau kuda nya. Orang ke deka dimuliaka tuan raja patut ngerasukka gari diraja. Udah nya, iya patut nepan kuda raja ba dataran awam kuta. Ba depan iya, patut bisi orang ke nyebut tu enggau inggar: ‘Tu meh utai ke digaga raja ngagai orang ke dimuliaka raja!’”
10 Nyadi, raja terus madah ngagai Haman: “Jampat! Ambi gari enggau kuda aku, lalu kereja utai ke dipadah nuan nya ngagai orang Judah ke benama Mordikai, ke benung duduk ba pintu istana. Semua utai ke dipadah nuan mesti dikereja nuan magang.”
11 Nya alai, Haman pan ngambi gari enggau kuda raja. Iya ngerasukka gari diraja ba Mordikai, lalu mai Mordikai nepan kuda ba dataran awam kuta. Haman lalu nyebut tu enggau inggar ba depan iya: “Tu meh utai ke digaga raja ngagai orang ke dimuliaka raja.”
12 Udah nya, Mordikai pulai baru ngagai pintu istana. Tang, Haman nudung pala iya lalu jampat-jampat pulai ke rumah iya laban iya amat malu.
13 Iya lalu nusui utai ke nyadi nya ngagai bini iya, Seres, enggau semua kaban iya. Bala iya ke bepenemu-dalam enggau bini iya, Seres, madah ngagai iya: “Udah alah nuan laban Mordikai. Enti Mordikai nya sigi bansa Judah, nadai jalai nuan ulih ngalahka iya. Nuan tentu enda ulih menang.”
14 Lebuh sida agi benung berandau, bala pegawai istana pan datai. Bala pegawai nya mai Haman ngagai endur alai Ester nyediaka makai besai.
