Ester 7:1-10
7 Raja enggau Haman pan datai ba endur alai Kuin Ester nyediaka makai besai.
2 Ba hari ti kedua, lebuh sida benung ngirup wain, raja nanya Ester baru: “Bisi utai ke dikedekaka nuan Kuin Ester? Bisi utai ke ka dipinta nuan? Indah setengah ari perintah aku pan deka diberi aku ngagai nuan. Nama-nama utai ke dipinta nuan sigi deka diberi aku magang.”
3 Ku Kuin Ester nyaut: “Enti tuan raja lantang ati enggau aku lalu enti tuan raja setuju, awakka aku minta nyawa aku empu enggau nyawa orang ke sebansa enggau aku.
4 Aku enggau bansa aku udah dijual, ngambika dibunuh lalu dipunaska magang. Enti semua kami semina dijual nyadi ulun, enda aku bemunyi. Taja pia, penusah tu enda patut nyadi, laban tu ulih ngasuh tuan raja empu rugi.”
5 Raja Ahasurus lalu madah ngagai Kuin Ester: “Sapa ke berani ngaga utai ke baka nya? Sapa nya?”
6 Ku Ester nyaut: “Orang ke jai nya Haman! Iya meh munsuh kami.”
Haman pan balat amat takut ngagai raja enggau kuin.
7 Raja balat amat ringat lalu angkat ari endur nya. Iya pan mupuk ngagai taman istana. Udah nya, Haman bediri lalu bebendar minta kasih ari Kuin Ester, ngambika iya enda dibunuh, laban iya nemu raja tentu deka ngukum iya.
8 Lebuh raja pulai ari taman istana, raja tepedaka Haman nyungkurka diri ba kerusi panjai endur Ester duduk. Raja lalu madah enggau inggar: “Nama iya tu, ka ngerugul kuin ba istana aku empu, pia?” Pengudah raja nyebut nya, sida lalu nutup mua Haman.
9 Siku ari pegawai istana ke benama Harbona lalu madahka: “Tuan raja, Haman mega bisi ngaga tiang ke ngeninggi kira-kira 22 meter* ba rumah iya. Mordikai ke udah nyelamatka tuan raja suba, deka digantung iya ba tiang nya.” Raja lalu madahka: “Gantung Haman ba tiang nya!”
10 Sida pan ngantung Haman ba tiang ke udah digaga iya ke Mordikai. Nya baru raja badu agi ringat.
Nota Kaki
^ Jaku Asal, “50 kiubit.” Peda Rujukan B14.
