Ester 9:1-32
9 Kena hari ke-13 ba bulan ti ke-12, iya nya ba bulan Adar,* orang patut ngereja utai ke diasuh pesan enggau undang-undang raja. Nya alai, ba hari nya bala munsuh orang Judah ngarapka diri deka ngalahka orang Judah. Tang lain utai ke nyadi. Pengujung iya, orang Judah ke ngalahka orang ke begedika sida.
2 Ba semua wilayah ke dipegai Raja Ahasurus, semua orang Judah begempuru ba kuta sida, laban sida deka nyerang sapa-sapa ke deka ngemediska sida. Nadai siku pan ari bansa bukai ulih ngalahka orang Judah, laban sida takutka orang Judah.
3 Semua tuai wilayah, bala pemerintah wilayah, bala gabenor, enggau semua orang ke gawa ke raja nyukung orang Judah laban sida takutka Mordikai.
4 Mordikai bisi pangkat ti tinggi ba istana raja. Iya dikelala ba semua wilayah, laban kuasa iya majak nambah-menambah.
5 Orang Judah nyerang semua munsuh sida ngena pedang. Sida munuh lalu ngemunaska semua munsuh sida. Sida ngereja nama-nama utai sepeneka ati sida ngagai orang ke begedika sida.
6 Ba istana ba Sushan, orang Judah udah munuh lalu ngemunaska 500 iku orang.
7 Sida mega munuh Parsandata, Dalpon, Aspata,
8 Porata, Adalia, Aridata,
9 Parmasta, Arisai, Aridai, enggau Vaisata,
10 iya nya 10 iku anak lelaki Haman anak Hamedata. Haman nya meh munsuh orang Judah. Tang pengudah orang Judah munuh sida, orang Judah enda ngerampas reta sida.
11 Ba hari nya, penyampau orang ke dibunuh ba istana ba Sushan dipadahka ngagai raja.
12 Ku raja madah ngagai Kuin Ester: “Ba istana ba Sushan, orang Judah udah munuh lalu ngemunaska 500 iku orang enggau 10 iku anak lelaki Haman. Baka ni enggau wilayah aku ke bukai deh, berapa iku udah dibunuh sida? Bisi agi utai ke deka dipinta nuan? Aku ulih meri nya ngagai nuan. Padah aja utai ke dikedekaka nuan. Semua nya deka diberi aku magang.”
13 Ku Ester nyaut: “Enti tuan raja lantang ati enggau aku, awakka orang Judah ke ba Sushan ngereja utai ti sama pagila, nitihka undang-undang seharitu. Udah nya, aku minta bangkai 10 iku anak lelaki Haman digantung ba tiang.”
14 Raja pan meri pesan ngambika utai nya nyadi. Siti atur dipadahka ba Sushan, lalu bangkai 10 iku anak lelaki Haman pan digantung.
15 Orang Judah ba Sushan begempuru baru kena hari ke-14 ba bulan Adar, lalu udah munuh 300 iku orang ba Sushan. Tang, orang Judah enda ngerampas reta sida.
16 Orang Judah ba wilayah bukai mega begempuru, lalu ngelaban munsuh ke nyerang sida. Sida munuh sereta ngemunaska 75,000 iku orang ke begedika sida. Tang, orang Judah enda ngerampas reta sida.
17 Utai nya nyadi ba hari ke-13 ba bulan Adar, lalu sida berehat ba hari ke-14. Ba hari ke-14, sida berami gaga ati.
18 Orang Judah ba Sushan begempuru ba hari ke-13 enggau ba hari ke-14. Ba hari ke-15, sida berehat sereta berami gaga ati.
19 Nya meh kebuah orang Judah ke diau ba kuta-kuta ti mit, iya nya sida ke diau ba luar kuta Sushan, berami gaga ati ba hari ke-14 bulan Adar. Ba hari nya, sida mega nganjung pemakai ngagai pangan diri.
20 Mordikai nulis semua utai ke nyadi nya nyadika rekod, lalu nganjung surat ngagai semua orang Judah ba semua wilayah ke dipegai Raja Ahasurus, enda ngira jauh tauka semak.
21 Iya ngasuh sida ngintu hari ke-14 enggau hari ke-15 bulan Adar ninting taun,
22 laban ba hari nya sida bibas ari bala munsuh sida. Ba bulan nya, pengirau ati sida ti balat betukar nyadi pengaga, lalu hari ti balat ngenusahka ati sida* betukar nyadi hari sida berami. Orang Judah patut berami gaga ati ba hari nya. Sida mega patut nganjung pemakai ngagai pangan diri, sereta meri pemeri ngagai orang ke miskin.
23 Orang Judah setuju deka terus ngintu pengerami ke udah diintu sida. Sida mega setuju ngereja utai ke udah ditulis Mordikai ngagai sida.
24 Orang Agak ke benama Haman anak Hamedata, iya nya munsuh semua orang Judah, udah ngaga pelan deka ngemunaska semua orang Judah. Nya alai, iya muai Pur, iya nya undi, ngambika orang Judah takut lalu ulih dipunaska.
25 Tang, pengudah Ester betemu enggau raja, raja pan madahka pesan iya nengah surat munyi tu: “Awakka pelan Haman ti jai ngagai orang Judah ninggang iya empu.” Nya alai, Haman enggau bala anak lelaki iya pan digantung ba tiang.
26 Nya meh kebuah pengerami nya dikumbai Pengerami Purim. Purim nya datai ari leka jaku Pur.* Nya alai, pengudah orang Judah macha surat Mordikai, lalu sida mega udah ngasaika sereta meda utai ke udah nyadi ngagai sida,
27 sida pan ngaga siti atur ke sida empu, ke bala peturun sida, enggau semua orang ke nitihka sida. Nitihka atur nya, sida mesti ngintu dua hari nya ninting taun. Sida mega deka ngereja utai ba maya ke udah ditetapka, baka ke ditulis Mordikai bekaul enggau pengerami nya.
28 Pengerami nya mesti dikingatka sereta diintu semua generasi,* semua ruang bilik, semua wilayah, enggau semua kuta. Pengerami Purim patut diintu orang Judah, lalu bala peturun sida mesti terus ngintu pengerami nya.
29 Kuin Ester enggau Mordikai, orang Judah nya, ngena pangkat seduai iya nulis surat ti kedua kena ngesahka Pengerami Purim.
30 Surat nya dianjung ngagai semua orang Judah ke ba 127 iti wilayah ke dipegai Ahasurus. Surat nya ditulis ngena jaku ti manah sereta ulih dikearapka.
31 Surat nya ngesahka Pengerami Purim patut diintu ba hari ke udah ditetapka, baka ke diasuh Mordikai enggau Kuin Ester. Kelimpah ari nya, orang Judah enggau bala peturun sida patut bepuasa sereta bebendar besampi.
32 Pesan Ester ke ngesahka pekara ke bekaul enggau Pengerami Purim bisi direkod ba siti bup.
Nota Kaki
^ Peda Rujukan B15.
^ Tauka “hari sida ngulit.”
^ “Pur” mai reti “Undi.” “Purim” nya kata jamak ke “Pur” lalu merujuk ngagai pengerami orang Judah ke diintu ba bulan ke-12. Peda Rujukan B15.
^ Tauka “rebak.”
