Galatia 1:1-24
1 Aku, Rasul Paul, nulis surat tu ngagai kita. Ukai mensia ke milih aku nyadi rasul, tang Jesus Kristus enggau Petara ti Apai kitai, ke ngidupka baru Jesus ari mati.
2 Au, aku enggau semua bala menyadi ke enggau aku, nulis surat tu ngagai semua raban gempuru* ba Galatia:
3 Ngarapka semua kita bulih pemanah ati ti besai enggau pengelantang ari Petara ti Apai kitai sereta ari Tuan Jesus Kristus.
4 Kristus nyerahka diri ke dosa kitai ngambika iya ulih nyelamatka kitai ari dunya* ti jai tu. Nya sejalai enggau peneka Petara ti Apai kitai.
5 Awakka Petara dimuliaka belama iya. Amin.
6 Aku balat alit ati. Petara udah ngangauka kita nengah pemanah ati Kristus ti besai, tang kita jampat amat nguing ari Petara, lalu mendingka berita manah ti bukai,
7 taja pan nadai Berita Manah ti bukai. Kebendar iya, bisi orang ke benung nyarutka Berita Manah pasal Kristus ngambika kita limpang.
8 Tang, taja pan siku ari kami tauka melikat ari serega nusui berita manah ti enda sama ari Berita Manah ke ditusui kami ngagai kita, awakka iya kena sumpah.
9 Kami udah nyebut pasal nya sebedau tu, lalu aku deka nyebut nya baru: Barang sapa nusui berita manah ti enda sama ari Berita Manah ke ditusui kami ngagai kita, awakka iya kena sumpah.
10 Kati aku nguji deka ngelantangka ati orang tauka ati Petara? Enti aku agi nguji deka ngelantangka ati orang, aku ukai ulun Kristus.
11 Bala menyadi, aku deka kita nemu, Berita Manah ke ditusui aku ngagai kita ukai datai ari mensia.
12 Aku enda bulih Berita Manah nya ari mensia, lalu aku enda diajar pasal nya. Tang Jesus Kristus meh ke mandangka Berita nya ngagai aku.
13 Kita tentu kala ninga pasal pengawa aku sebedau tu. Lebuh aku megai pengarap orang Judah, aku enda ngetu-ngetu balat merinsaka raban gempuru Petara, lalu bebendar nguji deka ngemunaska sida.
14 Ba pengarap orang Judah, aku ngaga pemansang ti jauh besai agi enti dibandingka enggau sida ke serambau enggau aku sereta ke sama bansa enggau aku. Aku mega jauh agi ransing nitihka adat aki ini aku.
15 Tang taja pia, Petara ke udah ngasuh aku ada nengah indai aku, sereta ke udah ngangauka aku nengah pemanah ati Iya ti besai, berasai lantang ati
16 mandangka Anak Iya nengah aku ngambika aku ulih nusui Berita Manah pasal Anak Iya ngagai bansa bukai. Pengudah dikangauka ngereja nya, aku enda beguai minta runding ari sapa-sapa.
17 Aku mega enda ngagai Jerusalem betemu enggau sida ke udah nyadi rasul dulu agi ari aku. Tang aku ngagai menua Arab, lalu udah nya pulai baru ngagai Damaskus.
18 Tiga taun udah nya, aku nemuai ngagai Kefas* ba Jerusalem. Aku diau enggau iya pengelama 15 hari.
19 Tang aku enda betemu enggau bala rasul ke bukai. Aku semina betemu enggau James, menyadi Tuan kitai.
20 Aku besumpah ba mua Petara, aku enda bula pasal semua utai ke ditulis aku ngagai kita.
21 Pengudah nya, aku ngagai menua Siria enggau Kilikia.
22 Tang bala raban gempuru ba Judea, ke beserakup enggau Kristus, bedau kala betemu enggau aku.
23 Ngelama tu, sida semina ninga orang madahka: “Lelaki ke kala merinsaka kitai, diatu nusui Berita Manah pasal pengarap ke deka dipunaska iya suba.”
24 Nya alai, sida lalu ngemuliaka Petara ketegal aku.
Nota Kaki
^ Tauka “sidang.”
^ Tauka “jeman; sistem dunya.” Peda Penerang Leka Jaku, “Sistem dunya.”
^ Mega dikumbai Peter.
