Galatia 2:1-21
2 Empat belas taun udah nya, aku enggau Barnabas mupuk baru ngagai Jerusalem. Aku mega mai Titus.
2 Aku mupuk kin ketegal utai ke udah dipandangka ngagai aku. Aku semina betemu enggau bala menyadi ti amat dipebasa, lalu madahka sida Berita Manah ke ditusui aku ngagai bansa bukai. Aku ngereja nya kena nentuka chara aku belanda suba tauka diatu enda lebu ngapa.
3 Taja pan Titus ke enggau aku nya orang Gerika, tang iya enda dipejal ngambika besunat.*
4 Tang utai nya nyadi penanggul, laban bala menyadi ti pelesu udah enselit tama ngagai raban gempuru, ngambika ulih ngemataka pengelepas ke diasaika kitai ketegal beserakup enggau Jesus Kristus. Tuju sida ngereja nya, laban deka ngasuh kitai nyadi ulun baru.
5 Tang kami enggai ngalahka diri tauka nunduk ngagai sida. Mimit* pan enggai, ngambika kita ulih terus bepegai ba pemendar ke bisi ba Berita Manah.
6 Tang pasal sida ke dikumbai orang penting, iya nya bala menyadi ti amat dipebasa nya, sida nadai madahka utai ti baru ngagai aku. Enda ngira sapa sida iya suba, nya enda penting ba aku, laban Petara enda beratika orang beduduk ba utai ke ulih dipeda.
7 Sida meda aku udah diberi pengawa nusui Berita Manah ngagai orang ke enda besunat, baka Peter ke diberi pengawa nusui Berita Manah ngagai orang ke besunat.
8 Nya ketegal Petara ke udah meri kuasa ngagai Peter ngambika nyadi rasul ngagai orang ke besunat, mega udah meri kuasa ngagai aku ngambika nyadi rasul ngagai orang bansa bukai.
9 Lebuh sida meda Petara ngayanka pemanah ati Iya ti besai ngagai aku, James, Kefas,* enggau John, ke baka tiang ba raban gempuru, betabi jari enggau kami duai Barnabas. Nya nunjukka sida iya setuju kami mupuk ngagai orang bansa bukai, lalu sida mupuk ngagai orang ke besunat.
10 Sida semina minta kami ingatka bala menyadi ke seranta, lalu aku udah enggau naka ulih ngereja nya.
11 Tang lebuh Kefas* datai ngagai Antiok, aku ngerara iya enggau terus terang, laban iya nyengala amat salah.
12 Suba, iya suah makai begulai enggau orang bansa bukai. Tang pengudah orang ke dianjung James datai, iya enda agi begulai enggau orang bansa bukai. Iya nyeliahka sida, laban iya takutka raban orang ke udah besunat.
13 Orang Judah ke bukai nyau pura-pura baka iya, nyentukka Barnabas pan nyau pura-pura baka sida.
14 Tang lebuh aku meda sida enda nitihka pemendar ke bisi ba Berita Manah, aku madah ngagai Kefas* ba mua semua bala sida: “Nuan empu orang Judah, tang nuan idup baka orang bansa bukai, ukai baka orang Judah. Nya alai, nama kebuah nuan mejal orang bansa bukai idup nitihka adat orang Judah?”
15 Kitai ada nyadi orang Judah, lalu kitai ukai orang ke bedosa ari bansa bukai.
16 Kitai nemu, orang dikumbai lurus ukai ketegal iya nitihka adat, tang ketegal iya arapka Jesus Kristus. Nya alai, kitai ngayanka diri arapka Jesus Kristus, ngambika kitai ulih dikumbai lurus, ketegal arapka Kristus, ukai ketegal nitihka adat. Nadai siku pan tau dikumbai lurus ketegal ngereja utai ke diasuh adat.
17 Enti kitai agi dikumbai bedosa taja pan kitai bebendar deka dikumbai lurus nengah Kristus, kati nya reti iya Kristus meransang kitai ngereja dosa? Enda!
18 Enti utai ke udah diruntuhka aku suba didirika aku baru, reti nya aku udah ngelanggar adat.
19 Ketegal aku nitihka adat, aku dilepaska ari* adat, ngambika aku ulih idup ke Petara.
20 Aku dipantang ba tiang enggau Kristus. Nya alai, ukai aku ke idup, tang Kristus ke idup beserakup enggau aku. Nyadi diatu, aku idup sejalai enggau pengarap aku ba Anak Petara ke rinduka aku sereta udah nyerahka nyawa diri ke aku.
21 Aku enda nulak pemanah ati Petara ti besai, laban enti orang dikumbai lurus nengah adat, reti nya lebu ngapa Kristus mati.
Nota Kaki
^ Tauka “betutus.”
^ Jaku Asal, “Sejam.”
^ Mega dikumbai Peter.
^ Mega dikumbai Peter.
^ Mega dikumbai Peter.
^ Tauka “mati bekaul enggau.”
