Galatia 4:1-31
4 Aku madahka, seagi-agi orang ke deka bempu pesaka nya agi anak mit, iya sama aja baka ulun taja pan iya tuan atas semua utai.
2 Iya dikemataka bala penyaga enggau bala pengurus rumah nyentuk ngagai hari ke udah ditetapka apai iya datai.
3 Pia mega, lebuh kitai agi anak mit, kitai nyadi ulun pekara asas ba dunya.
4 Taja pia, pengudah timpuh ke ditetapka udah abis, Petara ngirumka Anak Iya ke diadaka siku indu ke idup ba baruh adat.
5 Enggau nya, anak nya ulih meli lalu ngelepaska orang ke idup ba baruh adat, ngambika kitai ulih nyadi anak ambu Petara.
6 Ketegal kita anak Petara, Petara udah ngirumka kuasa kudus ke bisi ba Anak Iya ngambika tama ke dalam ati kita. Kuasa kudus nya ngasuh kita ngangau enggau nyawa ti inggar: “Abba,* Apai!”
7 Nyadi, kita ukai agi ulun tang kita anak Petara. Enti kita anak Petara, kita mega deka bempu pesaka ke diberi Petara.
8 Taja pia, lebuh kita enda ngelala Petara, kita nyadi ulun bala petara pelesu.
9 Tang diatu, kita udah ngelala Petara, tauka ke betul agi kita udah dikelala Petara. Nya alai, nama kebuah kita pulai baru ngagai pekara asas ke nadai reti sereta nadai guna, lalu deka nyadi ulun pekara nya baru?
10 Kita bendar amat ngintu hari, bulan, musin, enggau taun.
11 Aku irauka kita, enggaika lebu ngapa aku bebendar nulung kita.
12 Bala menyadi, aku minta kita nyadi baka aku, laban suba aku mega baka kita. Kita nadai ngereja penyalah ngagai aku.
13 Kita nemu, aku bisi peluang nusui Berita Manah ngagai kita keterubah iya ketegal penyakit aku.
14 Taja pan penyakit aku ngenusahka kita, tang kita enda ngemaruhka aku tauka berasai keji ngagai aku.* Kita nyambut aku baka ke nyambut melikat Petara, baka ke nyambut Jesus Kristus.
15 Dini alai pengaga ati kita suba? Aku empu nyadi saksi maya nya. Enti ulih, kita sanggup ngeruk mata diri lalu meri nya ngagai aku.
16 Nya alai, kati aku udah nyadi munsuh kita, laban aku madahka utai ti amat ngagai kita?
17 Sekeda orang bebendar deka ngambi ati kita, tang tuju sida enda manah. Sida deka nyeraraka kita ari aku, ngambika kita deka nitihka sida.
18 Taja pia, endang manah enti orang bebendar ngambi ati kita ketegal tuju ti manah, ukai aja maya aku bisi enggau kita.
19 Bala anak aku, sekali agi aku pedis baka indu ke benung beranak, nyentukka kita ngayanka ulah enggau runding Kristus.
20 Aku ngarap amat aku ulih enggau kita diatu, lalu bejaku enggau nelap agi ngagai kita, laban runding aku charut amat pasal kita.
21 Kita ke ka idup ba baruh adat, padahka ngagai aku: Kati kita enda nemu utai ke dipadahka Adat?
22 Ambika chunto, baka ke ditulis: Abraham bisi dua iku anak lelaki. Siku diadaka indu ke nyadi ulun, lalu siku da agi diadaka indu ke ukai ulun.
23 Anak ke diadaka indu ke nyadi ulun diadaka nengah chara biasa, tang anak ke diadaka indu ke ukai ulun diadaka nitihka semaya Petara.
24 Utai nya bisi reti ti bukai: Dua iku indu nya ngambarka dua iti sempekat. Hagar ngambarka sempekat ke digaga ba Bukit Sinai, lalu bala anak iya ada nyadi ulun.
25 Hagar ngambarka Bukit Sinai, iya nya siti bukit ba menua Arab, lalu iya ngambarka Jerusalem ke diatu, laban iya enggau bala anak iya udah nyadi ulun.
26 Tang Jerusalem ke ba serega nya indai kitai, lalu iya ukai ulun.
27 Baka ke udah ditulis: “Gaga ati meh indu ke mandul, ke bedau ngadaka anak! Manjung gaga ati enggau nyawa ti inggar, kita indu ke bedau kala ngasaika pemedis maya beranak, laban indu ke ditinggalka laki deka bisi mayuh agi anak ari indu ke bisi laki.”
28 Bala menyadi, kita meh anak ke ada nitihka semaya Petara, sama baka Isak.
29 Suba, anak ke ada nengah chara biasa nya berengkah merinsaka anak ke ada nengah kuasa kudus. Lalu diatu, utai ti sama nya mega nyadi.
30 Taja pia, nama dipadahka Bup Kudus? “Buru ulun ke indu nya enggau anak iya, laban anak ulun ke indu nya enda ulih bempu pesaka sama enggau anak ari indu ke ukai ulun nya.”
31 Nya alai, bala menyadi, kitai ukai anak ari indu ke ulun nya, tang kitai anak ari indu ke ukai ulun.
