Hebrew 12:1-29
12 Nya alai, ketegal kitai bisi mayuh amat saksi ke baka remang ti ngelingi kitai, aram meh kitai mega muai semua utai ke nating kitai sereta dosa ke ulih melit kitai enggau senang. Aram meh kitai belanda enggau ati ti tan ba lumba ke udah ditetapka ke kitai.
2 Lebuh kitai belanda, kitai bebendar beratika Jesus ke nyadi Ketuai sereta iya ke ngasuh pengarap kitai sempurna. Iya tan napi pemedis ba tiang perinsa,* lalu iya enda maluka nya laban iya nemu jemah ila iya deka gaga ati. Diatu, iya duduk ba sepiak kanan kerusi diraja Petara.
3 Bebendar meh beratika iya ke udah ngenatka diri lebuh orang ke bedosa bejaku jai pasal iya, taja pan kebendar iya, sida benung bejaika diri empu. Enggau nya, kita enda nyadi lelak sereta putus asa.
4 Lebuh kita bebendar ngelaban dosa nya, kita bedau kala belaban sampai bedarah.
5 Kita nyau udah amat enda ingatka agi jaku lalau ke nuju ngagai kita, bala anak: “Anak aku, anang ngumbai disiplin ke datai ari Jehovah enda berega. Anang putus asa lebuh Iya ngemetulka nuan,
6 laban Jehovah disiplin semua orang ke dikerinduka Iya. Kebendar iya, Iya ngukum* semua orang ke diterima nyadi anak Iya.”
7 Kita patut tan ngenatka nya laban nya sebagi ari disiplin* ke diberi ngagai kita. Ba Petara, kita nya bala anak Iya. Ni bagi anak ke enda kena disiplin apai iya?
8 Tang enti semua kita enda nerima disiplin nya, reti nya kita ukai anak ti sah lalu kita ukai amat-amat anak Iya.
9 Nambahka nya, apai kitai ke ba dunya biasa meri disiplin ngagai kitai, lalu kitai bebasaka sida. Enti pia, endaka kitai patut lebih agi ngasika Apai ke ngiring pengidup kitai ngena kuasa kudus Iya ngambika kitai ulih idup?
10 Apai kitai ke ba dunya disiplin kitai enda lama nitihka utai ke dikumbai sida manah. Tang Petara ngereja nya ke penguntung kitai ngambika kitai nyadi kudus baka Iya.
11 Sigi amat, lebuh kitai diberi disiplin, kitai enda gaga ati tang berasai pedis.* Tang udah nya, orang ke udah dilatih nengah disiplin deka bulih pengelantang ari pengidup ti lurus.
12 Nya alai, keringka jari kita ke lemi enggau patung kita ke gegutak.
13 Terus meh ngaga jalai ke ditengah kaki kita rurus ngambika kaki ke pinchat enda majak pinchat tang nyadi gerai.
14 Bebendar meh ngulihka kaul ti manah enggau semua orang lalu diau kudus. Orang ke enda kudus enda ulih meda Tuan.
15 Bejimat meh enggaika kita lenyau pemanah ati Petara ti besai, sereta enggaika urat ti berachun tumbuh lalu ngerachun* mayuh orang, sereta mai penanggul ngagai sida.
16 Bejimat meh enggaika bisi ari bala kita ke ngereja ulah seks ti kamah* tauka nyadi baka Esau ke ngumbai utai ti kudus enda berega. Esau muai hak iya ke nyadi anak tuai ketegal deka ngulihka mimit pemakai.
17 Kita nemu, udah nya iya deka ngulihka berekat nya nyadika pesaka, tang iya dikumbai enda layak. Taja pan iya bebendar nyabak deka ngubah runding apai iya, tang iya enda mujur.
18 Kita ukai nya mansang ngagai bukit ke ulih ditegu, ke balat petang, ke bisi api ti mau, ke bisi mua hari ti chelum, enggau kabut ti balat.
19 Ba dia mega, bisi bunyi terumpit ti inggar enggau nyawa ke bejaku. Orang ke ninga nyawa nya bebendar minta ngambika nyawa nya badu bejaku ngagai sida.
20 Nya ketegal sida nyau enda ulih tan agi pengudah ninga jaku pesan tu: “Indah jelu siga ke negu bukit tu pan mesti dituku ngena batu.”
21 Utai ke dipeda ba dia amat ngenakutka sida nyentukka Moses madahka: “Aku balat kesal sereta balat takut.”
22 Tang kita udah mansang ngagai Bukit Sion enggau ngagai nengeri Petara ti idup, iya nya Jerusalem ke ba serega ke bisi chukup mayuh* melikat
23 ke begelumu. Ba dia mega, bisi raban gempuru bala anak tuai ke udah direjista ba serega, bisi Petara ke nyadi Hakim semua utai, bisi orang ke lurus sereta sempurna ke idup sejalai enggau kuasa kudus,
24 bisi Jesus ke nyadi orang tengah ke sempekat ti baru, sereta bisi darah ke dipechikka ke manah agi ari darah Abel.
25 Tentuka kita mendingka* Iya ke bejaku. Enti orang ke ba dunya ke enggai mendingka jaku tangkan Petara enda ulih ngelepaska diri ari diukum, anang agi kitai. Kitai tentu enda ulih ngelepaska diri ari diukum, enti kitai enda mendingka Iya ke bejaku ari serega!
26 Maya nya, nyawa Iya udah ngusak dunya, tang diatu Iya udah besemaya: “Sekali agi Aku ukai aja deka ngusak dunya, tang mega langit.”
27 Rambai jaku “sekali agi” nunjukka utai ke digusak, iya nya utai ke ukai digaga Petara, deka dibuai ngambika utai ke enda ulih digusak deka mengkang bisi.
28 Nya alai, ketegal kitai deka nerima Perintah ke enda ulih digusak, aram meh kitai terus nerima pemanah ati Petara ti besai. Pemanah ati nya ngasuh kitai ulih bejalaika pengawa ti tuchi ngagai Petara enggau chara ti diterima Iya sereta enggau ati ti nangi enggau basa.
29 Nya ketegal Petara kitai baka api ke ngemunaska utai abis lengis.
Nota Kaki
^ Peda Penerang Leka Jaku.
^ Tauka “nyipat.”
^ Tauka “latih.”
^ Tauka “tusah ati.”
^ Tauka “ngamahka.”
^ Peda Penerang Leka Jaku.
^ Tauka “bepuluh-puluh ribu.”
^ Tauka “anang ngiga dalih enggai mendingka; anang enda ibuhka.”
